3
Kari ikup te dagulam ko dugu duap
1 Kaem Yawe melmasak giarum ningi aolak ilu geragasan mu suen biya nunga beteram, bare mot mu ko ikia kawel te suen la nunga kiaram. Se mot mu imet isuam, “Nunguningta Kaem iwita balam, nina tam suen la ningam ningi mu ko nunguning me nalko mam e?”
2 Se imet mot maonam, “Ana tam suen biya ningam ningi anisan mu ko nunguning am nanakko. 3 Bare tam suanta kusumuri sanamiwoso mu Kaem balam ana ko nunguning me nanakko mam. Nu balam ana tam mu ko nunguning nanak agi ilu tanak, mu ana kuenakko mam.”
4 Se mot aking imet maonam, “Mena, nina me kueralko. 5 Kaem ko ikiam, nina nal mu ninga ikia sinararuk se munan ningo se munan memek mu ko ikial ale nu turantala bagaralko. Duap owore te se nigiring kaolam.”
6 Se imet tam nunguning mu arigam, mu nana ko yawara, se ko ariga mu namotam barasa karogo, se ikia sinar ningo te ta ko yawara tala. Se nu tam mu ko nunguning bo tam ale nam. Ale sang kuari ilak bagaram mu tuam se nu agotala nam. 7 Asele nunga ikia nama sinararam, se nunumi arigiman mu nuna nunguning la bagasan, buta se tam fig ko gawa giman ale nunumi te ereman.
8 Sor baingam ale ipiram, se kari ko imet ilak Kaem Yawe ningam ningi aolak iluwam taikaso mu ko kumik nirung ikiman, ale nama tam duap ningi yumuman. 9 Bare Kaem Yawe kari mu auram, “Ni apalak bagasam a?” mam.
10 Se kari koma balam, “Ani ni ningam ningi aolak iluwem se kimik nirung ikiem, ale ani nunguning la, se nguangerem ale yumuwasam,” mam.
11 Se Yawe isuam, “Ni awuk ko ikiem ni nunguning la bagasam? Agi ni tam nunguning ani me noko balem wore ni naem agila?” mam.
12 Se kari balam, “Imet ni keta ani aisem ewere, nu ani tam nunguning aisam se naem.”
13 Se Yawe imet isuam, “Ni anape ko munan sowore beterem?”
Se imet balam, “Mot aninga kulam se naem.”*Satan nu kawel kari: John 8:44; Revelation 12:9. 1 John 2:15-17 ago arikko.
Yawe munan memek ko koma balam
14 Se Kaem Yawe mot iwita maonam,
“Ni munan memek beterem;
buta se giarum ningi melmasak suen la geragawasan mu nunga ningi
ni ikup memek giko.
Ni tom suen biya tagu luan te geraga se, kupkup no se lagerko.
15 Ni se imet mu ilak ninga kusumuri
nengemang motam suanta me ta anirukko;
nika gue te, se imet ko tuagu te, mu uwutata lagaralko.
Imet ko tuagu te mu nu nika sipiling ita parusuwurokko,
se ni noko suwik durum usirko.”
16 Yawe aking imet iwita maonam,
“Tom ni tagu ago se kuriang ilupko mu
ni ikup yaman biyala toko.
Bare ka kari mu ninguru ko kua lagerko;
se nu nika pulawura iwita baga se ka bituokko.”
17 Se aking Yawe Adam iwita maonam,
“Ni ka niwus ko kuring karem ale
tam nunguning ani me noko balem wore ni naem.
Buta se, ali imi na inang ninguru me te kaparukko;
ni ura kowar bita se kimik sail yaman ikiok asele na aratuk se no se lagerko.
18 Tam kore ago mu se, sum sirsir memek mu barasuk ka ningam irok,
se ni giarum ningi tam gawa gurek mu no se lagerko.
19 Nika ura kowar te inang aratuk se to noko,
se ura kowar la bita laga ali ningi namarko.
Ani ali gege te nika nungem;
buta se ni piler ali ningi namarko.ӠRomans 8:20-22 ago arikko.
20 Adam ko nuwus nup beteram Eve mam, mu awuk, nu kariimet suen la nunga nunam gira nunguningkiri bagarukko.
Yawe Adam se Eve ningam ningi nunga kaoram
21 Se Kaem Yawe sipsip mel saki nunga guang te guang sang nungam, ale Adam Eve ilak mu nungaram se kataman. 22 Asele balam, “Aitak kari ko ikia sinararam se ningo memek mu ko ikiam, ale ana iwitatala aratam. Buta se nu tam ko nunguning nasan ale marak pempem bagasan mu me tauk ale naukko,” mam. 23 Ale Yawe kariimet ilagala ningam Eden ningi bagaman mu nunga kaoram se arataman. Yawe ali gege te kari nungam, ale aitak kari kaoram se ali mu te ura to naukko namaram. 24 Tom kaoram se aratam mu engel cherubim mu ningam Eden mu ko koma worem bausa mu te nunga awuram se bagakasan. Ale kariimet bo marak nungara ko tam wore duap ningi namaruk bore ko, baenat bo, tama kuamili ago, koma mu te karogo beteram se nama pilawakaso.
*3:13: Satan nu kawel kari: John 8:44; Revelation 12:9. 1 John 2:15-17 ago arikko.
†3:19: Romans 8:20-22 ago arikko.