49
Jacob ko namarari marak nungaram
1 Jacob ko namarari suen la nunga auram ale mam, “Tai biguwural se mel maingte ningimik te aratukko wore ninga manikko,” mam.
2 “Tai biguwural ale nede gurugalko;
nina Jacob ko namarari, ninga nenet Israel munakaruk bore ikialko.
3 “Reuben, ni aninga kuriang laun, ni aninga gue gira nunguning se aninga sokel;
ni nip ago se sokel ago, saki alo nunga iwita mena.
4 Bare ni nimi ira mena, mu awuk, ni yu lom iwita kuwim suanta te bagara me ikisam;
ni aninga anira kuwim te aragem ale karur tugumem.* Genesis 35:22.
5 “Simeon se Levi mu launuria,
memek betera te mu nunga munan koma suanta:
nunga baenat mu te kager daong betesan ale kariimikiri nunga moa batutumusan.† Genesis 34:25-26.
6 Ani nunga biguwura ningi me namarikko,
ikia memek ko den kalosan mu ningi me daigekko,
mu awuk, nuna nunga nongomang memek te kariimikiri nunga moman se kueman,
se bulmakau nusuwik pisi batutumuman mu kumik duap bo mena.
7 Nononga nongomang magara mu memek biya, se koma memek arigimonko!
Ani nunga parusuwurik se Israel ningi kuwim suanta te me bagamonko.
8 “Judah, nika launuria mu nip patawumonko;
nika kager kari mu nodogotak te nunga ilup ale nunga menawurko;
ka launuria mu nubugura kulukuru kisimonko.
9 Ni lion kulak bo iwita, O Judah aninga namar;
nika inang moa nasam ale pelesam
ka kiwim te nimi dingumusam ale taga anisam.
Awiri kumik nguangara mena nika amuma ikiso? Mena.
10 Supuling ura betera ko tam, Judah kuting
te iluwa ko kualuwong luan te beteram se aniso mu,
gue kigilik bo tairuk me taukko;
bare kotam nunguning, noko gue, mu tairuk tauk ale iluwok,
ale te kariimet suen la nunga bituok se kuring bowa ningi bagamonko.‡ Israel ko king suen la mu Judah ko gue te arataman, tai Jesus aratam: Revelation 5:5.
11 Nu ko donkey tam waen karogo kalok,
ale donkey ko gotek waen kower ningo mu karogo kalokko;
ale ko guang mu waen kiri gueyam mu karogo lilim aruk ale te numi bala tuokko.
12 Noko motam mu kaetam, waen ko kiri mu kiaram,
se ko kore nikim mu amin kiri siraram mu kiaram.
13 “Zebulun mu langi gagi duap te bagarukko;
se noko saun korang mu dal te tai nagu aratu namamonko;
se noko ali ko tom mu nama Sidon karogo numi iluwokko.
14 “Issachar mu nu donkey sokel ago iwita,
bare nu mel kota giokko wore ningi kaposo ale am ani lagoso.
15 Nu anira kuwim bo se ali ningo arigiso,
te noman saparukko yawara, mu te dagiso,
ale umu te kari nobowa ningi dungan ura bita se mel ikup ikup gi lagoso.
16 “Dan mu Israel ningi,
noko kariimet motam mu nunga tutera kari bagarukko.
17 Nu mot memek iwita lage norogen ko baga se,
horse suwik ponor usiso se kari horse awote mu buring ko daguloso,
iwita bagarukko.
18 “O Yawe, ani ni aga sangaruko nikate la loaga lagasam.
19 “Gad mu tere kari motam bo taimon ilak kagermonko,
bare nu nunga moruk ale nunga karukko.
20 “Asher ko inang mu duap duap se ningo ningo;
se na inang mu king naukko koma.
21 “Naphtali mu deer bo mayang batagorman se
ko gomang te geraga se kuriang ningo ningo nunga iluso iwita.
22 “Joseph mu mayang waen nunguning karogo,
yu gotek bo duap te wore toroman;
se ko kower maiso namoso ale kar aragoso kiaso komasang ko kaposo wore iwita.
23 Kager kari memek nongomang memek te nunga daga wol kote tagiman.
24 Bare nu gek am baga se kiaram;
noko kuting daga wol karogo mu sokel me kuakaso,
mu awuk, Jacob ko Kaem Sokel Garagar,
Israel ko Bitua Kari, se ko Manga Gek am, mu nu saongam.§ Joseph gek am bagaram: 2 Corinthians 10:4; Ephesians 6:10-13.
25 Joseph, nika niet ko Kaem ni ninguru ka sangarso,
Kaem Sokel Garagar melmasak suen biya te marak kisiso:
tuwik se worem te munan kisiso,
yu ali ningi se yu naguwoso mu te marak kisiso,
kuriang suen biya te marak kisiso.
26 Nika niet ko marak kisam mu girakala
ko duruk bibiya imi mu nunga kiaram, ale kumik menara mena.
Marak suen la ni Joseph kete la nama saparam,
se ni ka launuria ningi ni kari dom bagerko.
27 “Benjamin mu kausik diwang bo daong karogo wore iwita bagoso;
nu tumongola mel diwang bo moa kam daongaso,
ale bainga ningi ko sikisaki arungu mel diwang mu parusuwu numi tui kam melmasak parusuwuso.”
28 Se imi Israel ko kariimet motam 12 mu nunga nonet marak den nongoma nongoma nunga kiwem te iki se nungaram.
Jacob kueram se mutim tuguman
29 Tom nu kiti guruga ko den imi nungaram mu nu mam, “Aninga kariimet giriman aniwasan mu nongote namarikko tom pingi aram. Ani agarak nama Heth kari Ephron ko ali te, manga gogong ningi aga beteralko. 30 Manga gogong mu Machpelah aniso, Mamre duap te se Canaan sor te. Manga gogong mu Abraham noko ali motam ko diaram, ale ko ali karogo diaram. 31 Se Abraham ko nuwus Sarah ilak umu te nunga mutim tuguman. Ale Isaac ko nuwus Rebekah ilak umu te tala nunga mutim tuguman. Se ani aga imet Leah kuwim suanta nukung te la mutim tugumem. 32 Abraham ali se manga gogong umu Heth kari nongote dia tam. Se ani umutang te tala aga mutim tugumalko.”
33 Jacob den umu ko namarari nunga manaru saparam, mu nu suwik tagi patatuwu ko anira kuwim te awuram, ale kuamili kutuwam se ko nuet nongotak nogowom karo namaram.
‡49:10: Israel ko king suen la mu Judah ko gue te arataman, tai Jesus aratam: Revelation 5:5.
§49:24: Joseph gek am bagaram: 2 Corinthians 10:4; Ephesians 6:10-13.