3
Jesus mu Moses kiaram ale nup biya nunguningkiri
1 Bore te se, aga launuria laili alo, nina ta ana suen la kualala ko aira taman umu, Jesus nu apostle se priest supuling ko ana wetang la balsan umu kote, nanga ikia se loagara pempem bita se laganakko. 2 Nu Kakirip atumukiram ale beteram se tai kaparam mu kuring diram la, Moses Kaem ko kariimet ningi ura diram la bitakaso iwitatala, ura beteram. 3 Bare iwita ikinakko, kari kawam kaloso mu ko nup biya mu kawam ko nup biya mu kiaram, iwitatala Jesus ko nup biya mu Moses ko nup biya kiaram nunguningkiri.*Kawam kaola ko kari ko balso umutang Jesus, se kawam ko balso umutang Kaem ko kariimet biguwura suanta. 4 Kawam kasik la mu kari kaloso, bare Kaem melmasak suen la kalo nunguru saparam. 5 Moses mu Kaem ko ura kari, se nu Kaem ko kariimet ningi mu ura diram la bitakaso, ale den gilalong kam udagi aratukko wore giram ale balu karokaso. 6 Bare Kristus mu Kaem ko Namar, se Kaem ko kariimet ningi ura mu diram la beteso. Se ana sangam sokel ago la anapeya ko namotam bitawasan mu balu patawuwanak mu asele, ana noko kawam digo nunguning baganakko.
Nangamang ningi nunguning mena ko sinar den
7 Bore te se, Bur Laili baluwoso iwita:
“Nina awiriya aitakta noko kuring ikial
mu, nina girakala ninga girigir alo,
8 ira ariga ko tom, sor garagarayam mu
ningi nu ilak dun kopa ilukasan iwita nengemang motam me aurokko.
9 Tom umu te nenenga girigir alo ani ira
ariga ko munan bitakasan.
Yar 40 ningi ani munan aguwaya
bitakasam mu nuna ari iki sapakasan.
10 Bare me ikia iwita bitakasan, bore te se,
ani kariimet motam umu nunga angamang magakaso.
Se ani balem, ‘Nononga nongomang
motam mu lage diram me karokaso,
se nuna aninga lage diram mu me ko ikikasan.’
11 Se ani aga angamang magara mu ningi
den aora biya balem ale maem:
‘Nuna aninga sor nuna te nonoman sapamon ale dagi bagamonko mu ningi me ta kasu nagumonko.’ ”†Psalm 95:7-11. Israel alo: Numbers 20:2-5.
12 Umutang ko aga singsang alo, nina ninguru sinar talko. Ninga ningi bo ta ko gomang motam ningi memek agi aora biya te Kaem pempem la marak bagoso mu me ta bita taukko. 13 Se day ko balso “Aitakta” mawoso mu day aitakta ewere ko baluwoso, bore te se, nina day suan suan te pempem la ninimi sangam tui se, munan umu te nenenga ningi bo memek ko kawel munan ningi gomang motam me ta aurokko. 14 Mu awuk, ana nangamang motam lilim iru la Kristus kote beteman mu am ilukuawunak mu, ana nu ilak wete bagara suanta baganakko. 15 Se ani maingkala balem uwutatala:
“Nina awiriya aitakta noko kuring ikial
mu, nina girakala ninga girigir alo,
ira ariga ko tom, sor garagarayam mu
ningi, nu ilak dun kopa ilukasan iwita nengemang motam me aurokko.”‡Psalm 95:7-8.
16 Se nuna mu kariimet awuk wore nu kuring ikikasan bare me karo tuikasan? Mu awiriya mena, mu nanga girigir alo Moses nongorak Egypt beteram ale aratam wore kiwem la lagakasan. 17 Se nu yar 40 ningi mu kariimet awuk wore nunga gomang maga lagakaso? Agi kariimet umu mena, kariimet saki kigilik nunga memek koma sor garagarayam umu ningi kua parangakasan agila? 18 Agi kariimet umu mena, kariimet saki kigilik nu kuring me karo tuikasan se ko den aora biya balam ale mam, nuna noko sor nuna te nonoman sapamon ale dagi bagamonko mu ningi me kasu nagumonko mam agila? 19 Bare ana aitak ikisan, nuna nongomang ningi nunguning mena, bore te se, nuna sor umu ningi kasu nagumonko me terong.