MATTHEW
Matthew ko batoga imi ningi mu kariimet Jesus ko dugu duap ninguru ikimon ale ko nongomang ningi nunguning aruk se te sokel ago bagamonko ko gomang. Nu takis tata kari, se Juda kari tala. Bore te se, nu prophet alo nunga den girakala Kristus ko balman umu tawun biya te sanamikaso. Saonga Kari tairukko Juda alo ko kimi bitawaman mu tairam, mu awiriya mena, Jesus i. Nu ali lilim ko kariimet nunga giokko tairam.
Se Juda kariimet saki mu Jesus ko nongomang ningi nunguning aram. Bare Juda nunga kagin ko supuling alo me ko nongomang ningi nunguning aram se ilak den tagikasan. Se Jesus nunga kilek kawel mu ko wetang te nongoma pagarukaso. Pharisee alo nongota nunga ikia te munan sang law ago biguwuman ale te kariimet ikup nungarukasan. Se Jesus munan owore ko iki se balam, “Ni awiriya ikup gi lagerem ale kimik titimam mu, ani agate tair ale neman saparko.”
Jesus mu kausa kari yawara. Se noko kausa bibiya sang mu chapter 5 nama 7 mu te aniso (kingdom ko munan sang), chapter 10 (olekem nunga kiti guruga ko den), chapter 13 (kingdom ko den pangan), chapter 18 (ko kingdom karo tua ko munan saki), se chapter 24-25 (tom nukum).
1
Jesus Kristus ko taleng girigir nunga nunup
(Luke 3:23-38; Ruth 4:18-22)
Imi Jesus Kristus ko taleng usir nononga nunup. Jesus mu David ko gue te tairam, se David mu Abraham ko gue te tairam.
Abraham ko namar mu Isaac.
Se Isaac ko namar mu Jacob.
Se Jacob ko namar mu Judah, se ko
kuriang saki ago.
Se Judah ko namar ilagala mu Perez se
Zerah. Nunga nunam mu Tamar.* Tamar: Genesis 38.
Se Perez ko namar mu Hezron.
Se Hezron ko namar mu Ram.
Se Ram ko namar mu Amminadab.
Se Amminadab ko namar mu Nahshon.
Se Nahshon ko namar mu Salmon.
Se Salmon ko namar mu Boaz. Boaz ko nuam mu Rahab.
Se Boaz ko namar mu Obed. Obed ko nuam mu Ruth.
Se Obed ko namar mu Jesse.
Se Jesse ko namar mu King David.
Se David ko namar mu Solomon.
Solomon ko nuam mu Bathsheba.
Nu Uriah ko nuwus bagaram bare
aking David nu tam.
 
Se Solomon ko namar mu Rehoboam.
Se Rehoboam ko namar mu Abijah.
Se Abijah ko namar mu Asa.
Se Asa ko namar mu Jehoshaphat.
Se Jehoshaphat ko namar mu Jehoram.
Se Jehoram ko namar mu Uzziah.
Se Uzziah ko namar mu Jotham.
Se Jotham ko namar mu Ahaz.
Se Ahaz ko namar mu Hezekiah.
10 Se Hezekiah ko namar mu Manasseh.
Se Manasseh ko namar mu Amon.
Se Amon ko namar mu Josiah.
11 Se Josiah ko namar mu Jeconiah,
se ko kuriang saki ago. Se tom mu te
Assyria alo taiman Israel alo nunga
talipaman arungak Babylon namaman.
 
12 Se tom nuna talipara ningi Babylon bagaman ko tom mu te, tai Jesus te bilangaram, mu nunga nunup mu iwita:
Se Jeconiah ko namar mu Shealtiel.
Se Shealtiel ko namar mu Zerubbabel.
13 Se Zerubbabel ko namar mu Abiud.
Se Abiud ko namar mu Eliakim.
Se Eliakim ko namar mu Azor.
14 Se Azor ko namar mu Zadok.
Se Zadok ko namar mu Akim.
Se Akim ko namar mu Eliud.
15 Se Eliud ko namar mu Eleazar.
Se Eleazar ko namar mu Matthan.
Se Matthan ko namar mu Jacob.
16 Se Jacob ko namar mu Joseph.
Se Joseph mu Maria ko kuari.
Se Maria tuagu te Jesus bilangaram. Se ana arusan Kristus masan.
17 Se Abraham ko tom te, tai David ko tom te, mu ko kari gue mu 14. Se David ko tom te, tai tom Israel alo nunga ilu talipi Babylon nongorak namaman, mu ko kari gue mu 14 tala. Se Israel alo Babylon talipara ningi bagaman tom te, tai Kristus te bilangaram, mu ko kari gue mu 14 tala.
Jesus bilangaram ko den
18 Jesus Kristus bilangaram ko duap mu iwita. Noko nuam Maria Joseph ilak naukko luan ilu beteman. Bare nuna ilagala nunumi me giman la, Maria numi ko ikiam nu Bur Laili ko sokel te nu kumik ago. 19 Noko kuari Joseph mu kari ningo diram, se nu Maria dolara tuokko me ko kueram. Buta se nu tetela la Maria bitirukko ikiam.
20 Nu uwutata ikiwakaso, bare Kaem ko engel bo ipingira te tairam ale maonam, “Joseph, David ko namar, ni Maria ka imet ko toko me nguangerko. Mu awuk, nu Bur Laili ko sokel te kumik ago bagoso. 21 Nu kuriang kari iluwok se ni nup bitar Jesus meko, mu awuk, nu ko kariimet nunga memek siwurok ale nunga sangaru taukko.
22 Mel suen biya imi maingkala Kari Biya ko prophet kuring te balam wore ko nunguning aratam. Nu iwita balam:
23 “Imet itiwik bo lilim biya, mu tuagu
aratuk se kuriang kari iluwokko.
Se nuna nup betemon ‘Immanuel’ mamonko.” Isaiah 7:14.
Nup mu ko nunguning mu “Kaem ana nangarak bagoso”.
24 Se Joseph barasam ale Kaem ko engel nu maonam butata beteram ale Maria ko imet ko tam. 25 Bare Maria kuriang mena la, Joseph nu ilak katir me taga aniram, mena. Se Maria kuriang kari iluwam, se Joseph nup beteram Jesus i mam.

*1:3: Tamar: Genesis 38.

1:23: Isaiah 7:14.