9
Kaem ko sokel garagar se ko kiwem ningo ko amilmil wur
(David ko wur)
1 O Yawe, ani angamang motam lilim la te ka nip patawurikko;
ani nika kiwem bibiya duap duap beterem wore ko balikko.
2 Ani angamang motam ningo te nika amilmilarikko;
O Kaem Kalel Biya, ani wur te nika nip patawurikko.
3 Aninga kager kari ni karkaman ale naguman peleman;
nuna dagulaman ale mena namaman.
4 Mu awuk, ni aninga munan ningo wore ko aga atumu sangem;
ni ka daiga kuwim mu te daigem ale tutera ningo bitawasam.
5 Ni sor saki ining nungarem ale kari memek alo nunga maguwurem;
ni nunga nunup siwu saperem se menara biya menaram.
6 Kager kari alo mu memek ko memek,
kumik menara mena owore nunga maguwuram.
Ni nunga wonong lilim la menawu saperem;
se kariimet sor umu ko nungamili sapa namarukko.
7 Yawe mu nu Kaem pempem baga lagoso;
nu kiwem ningo ko kua tui lagoso.
8 Ale nu kariimet suen la munan ningo diram te nunga tuterukko;
nu tutera ningo te kariimet nunga bituokko.
9 Yawe mu kariimet nunga bita
maguwusan wore nunga yumura kuwim,
ikup tom te nu nunga manga gek am.
10 O Yawe, awiriya nika nip ko ikiso, mu nu ko loagara mu nikate la beteso,
mu awuk, awiriya nikate la loaga lagoso mu ni biring gurugu me tui arigem.
11 Yawe Zion bagoso;
wur iluwal ale nup patawuralko!
Noko kiwem bibiya beteram mu sor saki nunga ningi balu paogalko.
12 Nu kariimet ikup yaman giwasan mu nunga me buring gurugam, mena;
nu nunga niara ikiam ale kariimet nunga bita maguwusan mu koma memek nungarukko.
13 O Yawe, kariimet awiriya aninga bita maguwusan ewere nungarkiko!
Ago ko neman bataguk se kuera mutim kuring te aga patawu toko!
14 Se ani nika nip biya Zion ko kariimet nongoma te balu pagik ale
ni aninga sangaru taem wore ko amilmil biya bitirikko.
15 Sor saki nongota nunga mutim iluman wore ningi dagulaman;
nunga nusuwik mu nongota nunga dagarok kaluwu beteman mu ningi soraram.
16 Yawe kota ko munan diram mu te numi wetang saparam,
se kariimet memek alo mu nongota nunga munan mu giris palagam ale nunga taliparam.
17 Kariimet memek alo mu kariimet kuera nunga sor te namamonko,
kariimet Kaem nubiring tuman mu suen la karogotala.
18 Bare nu kariimet nungumik mel mena mu me ta nunga kuamili saparukko;
se kariimet ikup gi se nukote loaga lagasan mu nu nunga sangukko.
19 Yawe, baresko! Ni kariimet bo ari sager se me ka kiarukko;
sor suen la ni kema te taimon se nunga tuterko.
20 O Biya, ni nguangara aromemek te nunga maguwurko;
sor suen la nunga kasuru se ikimon, mu nuna ali ewere ko kariimet yam.