11
Kariimet ningo diram mu Kaem ilak bagamonko
(David ko wur)
Yawe mu aninga yumura kuwim.
Se nina anape ko aninga manorsan,
ani inangnang iwita bingek nama
duruk duap ningi yumurekko aga manorsan?
“Arikko!” masan. “Kari memek nunga
daga wol tagi muruwuman ale yumura la
kariimet ningo diram aolak iluwasan mu te nunga momonko bagasan.
Munan ningo ningo ko nukuri maga
saparam imi mu kariimet ningo diram mu awuk betemonko? Mena.”
 
Bare ikialko. Yawe ko temple laili ningi bagoso;
nu ko daiga kuwim te kualala bagoso.
Nu loagoso ale kariimet ninguru nungarki kutuwuso.
Nu nungarkoso ale kariimet ningo diram mu nunga amilmiloso;
bare kager daong ko kariimet memek mu me nunga kueso.
Noko gomang magara mu tama iwita
sisuwurok se nungumik kuali kaparukko;
se daula bo kowar biya mu nunga maguwurokko.
Mu awuk, Yawe mu ningo se diram;
nu munan diram la anirukko kueso,
se kariimet munan diram la betesan mu nu arigimonko.