16
Yawe mu marak ningo bagara ko lage suanta
(David ko wur)
1 O aga Kaem, aga bitaruko,
mu awuk, ani nika ningi aga yumura kuwim ningo arigem.
2 Ani nu manorsam, “Ni aninga Kari Biya;
ni mena mu, ani ningo bo me arigekko.”
3 Ale nika kariimet ali imi te mu nunga balsam,
“Nuna ningo, se ani nunga amilmilasam.”
4 Bare awiriya kaem kawel nogowom karowasan mu,
ikup numi awote nunga morukko;
ani nunga tama bita nunga kaem nungara mu ningi me bagarikko;
ale nunga kaem nunup me ta patawurikko.
5 Yawe, ni aninga mel ningo ningo suen biya;
ni aninga ali welang ningo, aga tammanga mel suen la te ningo la aragoso iwita.
6 Ni ani ka munan suen la aisem mu am yawarakala nunguningkiri,
se ani ninguru ko amilmilasam.
7 Ani Yawe ko nup patawurikko, mu awuk, nu ikia ningo ani aisiso;
ale tirom karogotala aga kiti guruguso.
8 Ani pempem la Yawe te ira sanamasam;
nu ani agiting duap ningi aga iluso,
bore te se ani gek am bagasam.
9 Ale bore te se, aninga angamang motam lila aso se ninguru amilmilasam;
ale aninga adera angimik me maga namarukko tala,
10 mu awuk, ni ani nika kari, ni bowa ningi la lagara, mu agarkiwer se,
kuera mutim ningi me kua iwi namarikko.
11 Ni marak pempem bagara ko lage aga kasursam;
se ani ni kerak amilmil te baga se,
ka kiting sengam mu te ningo la pempem bagarikko.