24
Yawe nu King nikim biya
(David ko wur)
1 Ali imi, se mel suen biya awote aniso, mu Yawe ko la;
ali imi lilim la, se kariimet suen la te anisan, mu Kaem ko la.
2 Nu yu gagi nungam asele balam se
yu nama kuwim suanta bolala awuman se ali sor aratam ale sokel ago aniso.
3 Arika Yawe ko duruk te nama tarigimonko terong?
Ale arika noko kuwim laili mu te sanamamonko terong?
4 Mu kariimet nuguting karur mena, se nongomang motam lilim,
se kaem kawel me nunup patawusan,
ale saki alo den kawel te me nunga kulursan,
kariimet uwuta mu Kaem ko kuwim umu te bagamonko terong.
5 Kariimet uwuta umu Yawe nunga
sangaru tauk ale ningo diram ko nunga baluk ale marak sokel yawara nungarukko.
6 Kariimet uwutata mu asele Kaem kote pingi namamonko terong maman,
ale Jacob ko Kaem nup patawumonko terong maman.
7 Songkuring kagaru karogo namaralko;
girakala ko songkuring kagaru ulal awural se nikim biya ko King te kasu nagurokko!
8 Se nikim biya ko King mu awiri ya?
Mu Yawe sokel garagar nunguningkiri,
nu kager te sokel karogo.
9 Se songkuring kagaru karogo namaralko;
girakala ko songkuring kagaru ulal awural se nikim biya ko King te kasu nagurokko!
10 Se nikim biya ko King mu awiri ya?
Mu Yawe Sokel Garagar umutang nikim biya ko King!