48
Zion wonong ko sokel aora biya ko wur
(Korah ko kuriang alo nunga wur bo)
1 Yawe nu Biya! Noko wonong te bagoso
umu ningi nup biya pempem to lagarukko!
Kaem ko duruk laili mu
2 kalel biya se yawarakala,
se ali imi ko kariimet suen la ko amilmilasan.
Duruk Zion mu koma north mu te aniso,
mu King Biya wore ko wonong.
3 Kaem kota ko kager ko yumura kuwim aora bibiya mu ningi baga se,
ko kariimet nunga bitarso ale ninguru nunga sinar taso.
4 Sor saki ko king nunumi gikasan ale
Kaem ko wonong mu ilak kagermonko taikasan,
duap te ilu biguwukasan,
5 bare tom wonong mu arikasan mu
nguangakasan ale nagukasan.
6 Nuna imet kuriang iluwokko yaman
taso ale numi tagi gurungumuso ale
nguangoso iwita, nguangara nunga iluwam.
7 Se Kaem nuna sor Tarshish ko dal
bibiya, daula worem bausa te taira ale
nunga maguwura iwita, nunga maguwuram.
8 Yawe Sokel Garagar ko wonong te
mel bitakaso se ana nadogowa iki
lagaram mu, aitak ana namotam te arigiman:
nanga Kaem mu ko wonong bitarso,
se pempem ningo la baga lagoso.
9 Anananga Kaem, ana nika temple ningi kapasan mu,
ana nika kua nangara ko munan mu ko iki gurugu se amilmil kisisan.
10 Nika kiting sokel garagar mu ali lilim te
kager bibiya menawusam, ale munan diram la betesam,
se nika nip biya mu sor suen la te patawusan.
11 Duruk Zion te amilmil barasoso,
se Judah sor lilim la nonoman nungeso,
mu awuk, ni ka munan ningo diram wore te nunga sangaru taem.
12 O kariimet, Zion wonong lilim ko por
kaloman mu duap kaoral geragal ale
ko kawam kalel bibiya mu ari gurugalko;
13 ale ko kager ko yumura kuwim aora bibiya mu ago arigalko;
mu awuk, nina mel arigiman mu suen
la gue udagi taiwasan mu nuguring te beteralko.
14 Mel suen la ari ko ikiman umu mu Kaem nungam;
nu anananga Kaem pempem baga se nanga kiti gurugokko.