52
Kari kawel ko munan te kawela lagoso mu Kaem kuting te memek arigokko
(Edom kari Doeg yumura la Saul kote namaram ale David Ahimelek ko kawam te namaram mu ko Saul maonam, se ko David batoga imi batogam)* 1 Samuel 21; 22:9-19.
O kari sokel ago, ni anape ko kilek memek betesam mu ko nimi nip patawu lagasam?
Ni Kaem motam te mu ni memek,
se ni anape ko nimi patawu lagasam?
Ni kari maguwura ko den bala ko kua lagasam;
nika kawel ko munan betesam mu kapit
biling kore wuli karogo wore toroman.
Ni kiwem memek se den kawel bala mu ninguru ko kuesam,
ale kiwem ningo se den nunguning bala mu biriruwusam.
Ni kiring kawel ago!
Ale kariimet maguwura ko den baluko ninguru kuesam.
 
Bare ikiko, Kaem ka maguwura biya ka maguwurokko!
Nu ka kawam ningi ka woyuk ale ali mu
te ka menawura biya ka menawurokko!
Se kariimet ningo diram mu arigimon ale nonoman biyala sapamon,
ale gusi se balmon,
“Arigalko! Kari imitang Kaem te me ira sanami lagakaso,
kota ko mel suen biya te sanamikaso,
ale kariimet nunga maguwura te sokel ago bagakaso, mu aitak koma tam!”
 
Bare ani mu tam olive bo, Kaem ko
temple ko por ningi aragawara wore iwita,
ani pempem Kaem ko kua nangara ko
munan mu ko kua se te ira sanami lagasam.
O Kaem, ani ni kiwem beterem mu ko pempem amilmil kisu se lagarikko;
ani nika kariimet nunga biguwura ningi ka nip patawurik ale ilukuawurikko,
mu awuk, nika nip mu ningo.

*^ 1 Samuel 21; 22:9-19.