62
Kaem kota suanta anananga saonga kari se nanga manga gek am
(David ko wur)
1 Ani Kaem kota aga sangukko mu ko iki se angamang lila te baga lagasam;
aninga saonga mu nukote tasam.
2 Nu kota aninga manga aora, se aninga saonga kari;
nu aninga manga gek am, se ani me soror maikko.
3 Se nina amaru aninga mora maguwura sowore beteralko?
Ani kar parasaram ale dalelawoso iwita bagasam,
bare awuk, am aga itakuawural se dagulu parasarikko e?
4 Nunguningta, nuna aninga ura nup ago te bagasam wore te am aga menawumonko nunguningkiri karogo kaesan;
nuna nuguring guang la angimik ko ningo balsan ale munan umu ko ninguru amilmilasan,
bare nongomang motam ningi mu am maga namarikko balsan.
5 Bare ani Kaem kota aga sangukko mu ko iki se angamang lila te bagarikko;
aninga angamang motam ko sangam mu nukote tasam.
6 Nu kota aninga manga aora, se aninga saonga kari;
nu aninga manga gek am, se ani me soror maikko.
7 Kaem kota aninga sangarso, ale kota nup biya aisiso;
nu aninga manga aora, se aga yumura kuwim.
8 O aga kariimet, Kaem kote la ira sanami se lagaralko;
nengemang motam lilim la kausalko;
mu awuk, nu anananga yumura kuwim.
9 Kariimet nunup mena mu marir nagiring
te pus masan se aratu nama menaso iwita;
se kariimet nunup ago mu mel nunguning
bo mena, am ko dora wore iwita;
se skel te ta nunga awumon mu nungumik ikup mena, wete guyak gotek.
10 Buta se nina tere daong te saki nunga
mel tagiral ale me ninimi te patawuralko;
se munan umu te mel gemaral, mu me te ira sanamaralko.
11 Kaem ko munan wetang te beteram se ani mel ilagala ko ikiem:
“O Kaem, ni sokel karogo,
12 O Kari Biya, ni kariimet ninguru nunga kuesam;
ni ana suen la nanga munan betesan mu
te iki se diram la koma nangaruko.”