71
Kaem pempem la nanga bitua bagarukko guranek
1 O Yawe, ani ni kete taisam,
aga bitaru se dolara me aga irokko.
2 Agiring iki ale nika kiwem ningo diram
mu te aga sangaru ale aga bataguru toko.
3 Ni pempem aninga manga aora bager se ani te nagu nama yumurekko;
ni la balu se ani terong la bagarikko,
mu awuk, ni aninga manga gek am se aninga yumura kuwim.
4 O aga Kaem, kari memek nuguting te aga bataguru toko;
kari memek kiwem memek bitawara mu me aga kau tamonko.
5 O Yawe, aninga kulak te la, ni keta
suanta kete aga loagara bita lagasam.
6 Ni aga ayam tuagu te aga bituem
se tom ani bilangerem mu ani nikate la ira sanami lagasam.
Ani nika nip pempem la patawu se lagarikko.
7 Kariimet suen biya ani mel memek bo iwita agarkasan,
bare ni mu aninga bitua kari aora.
8 Ani pempem nika nip patawusam ale
nika nikim sokel garagar mu ko balsam.
9 Tom ani garukarik ale asokel kaparuk
mu ni me agarki daleluwur ale due ko me aga sarumu bitarko.
10 Mu awuk, kari memek aninga balu maguwusan;
ale ilu biguwusan ale aga momon se kuerikko balsan.
11 Ale “Kaem me sangukkowo!” masan.
“Iluwal ale taliparalko;
kariimet bo nu me sangukko.”
12 O aga Kaem, aga bitar ale awar biya me bagerko;
tairate tair ale aga sangaruko.
13 Kari den te aga atumusan mu dolara memek te nunga menawurko;
kari aninga bita maguwumonko bagasan
mu memek biya te nunga bitar se dolomonko.
14 Bare aninga loagara mu pempem la nikate bita se,
ka nip butata patawu se lagarikko.
15 Ani nika munan ningo diram te nanga
sangaru tasam mu ko iki saparikko me terong,
bare tirom woremkalal ko balu se lagarikko.
16 O Kaem Yawe, ani nika kiwem bibiya mu ko balikko;
ani ni keta suanta ka munan ningo diram mu ko balu pagikko.
17 O Kaem, ani kuriang kulak la ni ka munan ningo ningo mu aga kausem,
se tai aitak mu ani am ko baluwasam.
18 Se tom ani garukarik ale amone yak mauk mu
ni me ta biring gurugu aisuko;
O Kaem, aga sangaru se nika sokel aora
garagar mu ko balik se kuriang gue luan udagi taiwasan mu ikimonko.
19 O Kaem, awiri nika iwita? Mena.
Nigita ni munan bibiya beterem;
nika kiwem ningo diram mu taiti gomang ningi kalel biya.
20 Ni ikiwerem se ani ikup yaman suen biya giem;
ani mutim du biya ningi iwita kaperem,
bare ani ikisam ni akingtala sokel iru aisu ale aga patawur se bausekko.
21 Ni aninga aip kaparam mu aking patawur ale angamang motam sokel tuiko.
22 O aga Kaem, Israel ko Kaem Laili,
ani nika munan diram la ago ko betera mu ko gita morik ale nip patawurikko.
23 Ni aninga sangaru taem,
se ani amilmil te airik ale wur te nip patawurikko.
24 Kariimet aninga maguwumonko mu ni
nosokel menawurem se dolara biya taman;
se tirom woremkalal ani nika kiwem ningo diram mu ko balu se lagarikko.