77
Ikup kam ningi nangamang me namaruk tairukko
(Asaph wur imi batogam)
1 Ani Kaem kote sail ago niarem;
ani Kaem agiring ikiokko kote niarem.
2 Tom ani ikup ningi kaperem, ani Kari Biya kote wosengem;
tirom angimik anira mena ani aira wosenga te la lagerem,
bare angamang motam me ta kua kaparam.
3 O Kaem, ani ni ko ko angamin tugu se aeman biya gotek sapakasam,
ale angamang motam sokel menakaso.
4 Ni nungurukasam se ani amotam anira me arikaso;
ani angamang ninguru yukuwakaso se munakarikko me terong.
5 Ani yia se tom nama lagaram mu ko ikia to lagakasam.
6 Ale aga wur tirom ilukasam mu ko angamin ares makaso.
Tom ikia bitakasam mu agata aimi iwita isarukasam:
7 “Kari Biya pa, buring gurugu aisam ta agi?
Agi ago ko yam ikiwoso agi?
8 Agi ko gomang ani kua aisuwaram mu menaram agi?
Se agarak ikia kaolam mu dagulu namaram agi?
9 Kaem pa, noko gomang lila mu ko kuamili saparam agi?
Agi noko gomang memek mu noko gomang lila kuwim tam agi?”
10 Bare angamin namara taira ningi iwita
ikiem, “Kaem Kalel Biya yia suen
biya ningi nanga sangaru lagaram,
se ani mel umu te ira sanamasam.”
11 O Yawe, ani ni girakala mel bibiya beterem mu ko angamin ares maso;
ani nika kiwem bibiya ni girakala bita lagerem mu aga ikia te taiso.
12 Ani ni ura bibiya beterem mu ko iki gurugekko;
ani nika kiwem bibiya suen la beterem mu ko angamin tugumekko.
13 O anananga Kaem, nika kiwem suen la betesam mu laili biya.
Kaem bo awuk wore noko nup biya nika iwita?
14 Ni keta Kaem, ni mel duap duap sokel karogo betesam se arataso;
nika sokel aora biya sor suen la ko
kariimet nunga kasursam se arigisan.
15 Nika kiting sokel aora garagar mu te ka kariimet nunga sangaru taem;
ni Jacob se Joseph nunga nunumasari se taleng girigir nunga giem.
16 O Kaem, yu bibiya karkaman;
yu bibiya mu karkaman ale nguangakasan;
gagi nukum du biya mu uririkiram.
17 Tuwik taiti nuwi ningi wore kapakaso;
taiti gomang te pure pagakaso;
pure nikim biliwilik makaso ale gatu iwita nama taikaso.
18 Pure nirung daula biya ningi aratukaso,
se pure nikim ali sor lilim la nikim tuikaso;
ali uririkikaso ale wanara ko kapakaso.
19 Ni gagi tamun ningi aolak iluwem,
ale gagi naung du biya mu batagem koma sang ko namerem,
bare ka siwik molak me arigiman.* Exodus 14:21-22.
20 Ni ka kariimet sipsip iwita nunga giem;
ni Moses, Aaron ilak nunga kari gira ko
nunga awurem ale nongorak aolak iluwem.