81
Kaem ko gomang mu ko kariimet kuring iki karo tui se lagamonko
(Asaph wur imi batogam)
1 Amilmil te ngata beteralko, Kaem anananga saonga kari;
wur te nup patawuralko, nu Jacob ko Kaem!
2 Galawalang sokelel te nirung duap beteralko;
ninga bawe se gita te yagowom yawara gurugalko.
3 Tom sige barare la mu kua sokel itugumalko;
ale nama garukaso se amilmil ko tom
biya arataso mu te akingtala itugumalko.
4 Mu awuk, imi mu Israel nunga munan
den, se den aora bo Jacob ko Kaem kote tairam.
5 Mu tom nu Egypt nongorak kager bitawa se, nu Joseph ko kariimet Israel munan den imi nungaram.
Tom umu te ani kuring bo iru nuam ikiem, se kuring mu iwita balam,
6 “Ani ikup nibiwinang te mu kututuwurem,
ale tam luan gi lagakasan mu kututuwurem.
7 Tom ikup ninga iram se nina aninga aruman mu ani ninga sangaru taem.
Aninga yumura kuwim taiti nuwi kaetam mu ningi baga se nigiring iluwem;
ale yu Meribah duap te ira ariga te ninga beterem.* Taiti nuwi kaetam mu Sinai sor te agila: Exodus 19:16. Nuna yu mena mu ko iningakasan: Exodus 17:1-7; Numbers 20:1-13.
8 Aga kariimet, nedegawa gurugal ale sinar den balsam ewere ikialko!
Israel kariimet, aga angamang mu aga agiring ewere ninguru ikialko!
9 Nina nebugura kulukal ale kaem bo kilimik me ta nup patawuralko!
10 Ani Yawe, nenenga Kaem; anigita, nina
Egypt memek bagaman se ninga giem ale nengerak tairem.
Mel i ko kueral mu balal se ani ningarikko.
11 Bare aninga kariimet agiring me ikiman nunguning;
Israel nunumi karogo me kapaman ale agiring me karo tuman.
12 Buta se ani nongomang motam aora biya mu ago nunga bita taem,
se nongota nunga ikia memek la karo tuikasan.
13 Aninga angamang motam nunguning
mu aga kariimet Israel ninguru agiring
ikimon ale aga munan karo tumonko aniso!
14 Uwuta mu asele, ani tairate kager kari
memek alo nunga maguwuwasan mu nunga morik ale nunga menawurikko.
15 Arikaya ani me aga kuesan mu
nguangamon ale ani asiwik duap ningi nubugura kulukurmonko;
se ikup memek nungarsam mu butata pempem anirukko.
16 Bare nina mu, ani inang yaman ningo
nunguningkiri mu se, honey yaman nuam mu ningarik se nal ale
ningimik karogo terong maukko.”
*81:7: Taiti nuwi kaetam mu Sinai sor te agila: Exodus 19:16. Nuna yu mena mu ko iningakasan: Exodus 17:1-7; Numbers 20:1-13.