88
Kari bo Kaem kuting te kua namarukko iwita ikiam ale ko niaso
(Korah ko kuriang alo nunga wur bo)
1 O Yawe, ni aninga Kaem, aninga saonga kari;
ani tirom kowarkalal ni kema te ka aru wosenga lagasam.
2 Degewa gurugu ale aninga guranek ikiko;
aninga niara nikate betesam.
3 Mu awuk, aninga angamang motam ikup ninguru iram,
se ani kua namarikko tom pingi aram.
4 Ani kariimet sang mutim ningi kapaman uwutatala kaparikko pingi arem;
ale kari bo sokel mena wore turan bagasam.
5 Ani aga sapaman se kariimet kuera nunga ningi bagasam iwita;
ale kariimet nunga moman se kueman ale mutim ningi aniwasan
se ni nunga kamili sapa namaram se saonga bo me nungaruko iwita ani bagasam.
6 Ni ani mutim du biya wore iwita ningi aga beterem,
se mutim mu ningi mu tiromorom biya.
7 Nika gemang magara mu ninguru aga iramuram,
gagi tamun biya aga iramuram iwita.
8 Ni uwuta aga beterem se aninga tiran yawara mu nubiring aisiman,
ale mel memek bo iwita agarkasan.
Ani lauta biya ningi bagasam iwita se nagurekko me terong.
9 Ani angamang bataga se niara ma te amotam sisiram.
O Yawe, ani kowarkalal pempem abugura te baga se nika aru lagasam.
10 Ni kiwem bibiya duap duap mu
kariimet kuera nongote me betesam;
ale kariimet kuera mu barasasan ale nika nip me patawusan.
11 Nika kua ana nangara ko kiwem mu kuera mutim ningi me ko balsan;
ale nika gemang nangara nunguningkiri
ko munan mu maga namara ko sor te me ko balsan tala.
12 Agi kariimet kueman ale mutim
tiromorom biya mu ningi bagasan mu,
nika kiwem bibiya duap duap betesam mu ko ari ikimon i? Mena.
Kariimet nungamili sapa namara ko kuwim te namaman mu,
nika kiwem ningo diram betesam mu nuna me ko ikisan.
13 O Yawe, ani nikate saonga ko niawasam;
turomola pempem aninga wosenga nikate betesam.
14 Bare awuk se ni aninga biriruwusam,
ale ani ago ko kema motam kaluwusam?
15 Ani aga kulak ko tom te la yaman ikup
imi gi lagerem, ale kuerikko tom pingi aram;
ani nika gemang memek ko yaman gi lagerem ale angimik sail menaram.
16 Nika gemang memek ninguru aga iramuram;
se nguangara ninguru aga maguwuram.
17 Se kiwem imi kowarkalal maiya mu
lom iwita aga lautam ale ninguru aga ira baguram.
18 Ni aninga tiran gar ningo se aga gue
suan nunga tagi batagem se aninga bita sapaman;
ani tiromorom aga iramuram se agata ningi baga maguwu lagasam.