102
Kari bo ikup yaman ningi baga se Kaem ko sangukko aruso
(Yaman ikup memek ningi baga se, Kaem ko saonga ko guranek)
1 O Yawe, aninga guranek ikiko;
ni aninga sangaruko ka arusam.
2 Ani ikup biya ningi kaperem ale
bagasam, se ni ani ago ko kema motam me kaluwurko.
Degewa gurugu ani aisuko;
tom ani airik mu ni tairate agiring ilupko.
3 Mu awuk, aninga marak bagara ko tom
ali imi te mu, tairate tama bur iwita mena namoso;
aga angimik sokel mu tama ningi barasuwoso iwita.
4 Aninga angamang motam mu, sirsir maraka namoso iwita marakam;
ale ani agiring inang dulam.
5 Ani yaman karogo sail te nia kika lagasam,
se angimik guang mu tairam angimik sokelel karogo numi iluwam.
6 Ani sor merang ko inangnang urkuk
iwita, sor magaram kueneram wore ningi bagasam.
7 Ani taga anisam bare angimik anira mena;
ani inangnang bo kota kawam gul te dagi pata lagoso iwita baga lagasam.
8 Kowarkalal maiya kager kari memek
angamang maguwura den balu lagasan;
nuna ninguru tala aip maguwusan ale am maga namarikko balsan.
9 Ani tama nuwi mu na ko iwita nasam,
ale amononge yu mu yu ko nasam,
10 mu awuk, nika gemang magara mu aromemek,
se ni aga tagi patawurem ale mel memek bo iwita due ko aga saperem.
11 Aninga marak bagara ko tom mu sor
awuru iluwam taiso ko tiromorom iwita;
ani sirsir merang maraka namoso wore iwitatala.
12 Bare O Yawe, ni king ko butata pempem baga se lagerko;
kariimet gue luan udagi taiwasan mu
nika nip biya mu balu iki se lagamonko.
13 Ni bares ale nika wonong Zion gemang
tuiko, nu imet itiwik bo ni gemang tua iwita gemang tuiko;
mu awuk, ko tom ni balu beterem mu tai aratam.
14 Nika kariimet alo Zion mu magaram kueneram bare am ko kuawasan;
ale parasaram magaram bare ko nongomang am batagawoso.
15 Sor suen la mu Yawe ko nguangamonko;
ali imi ko king suen la mu nika nikim aora garagar mu ko nguangamonko.
16 Mu awuk, Yawe mu Zion akingtala kalokko,
noko nikim aora garagar mu te numi wetang saparukko.
17 Nu ko kariimet magaman kueneman mu nunga guranek ikiokko;
nu nunga niara wosenga mu buring me tuokko.
18 Buta se kuriang gue luan udagi
taiwasan mu nunga den imi bataguru beteralko se
nunga tom udagi mu te, pempem kau
tutia iki se Yawe nup patawu se lagamonko.
19 Den umu iwita bataguru beteralko:
“Yawe kualala ko sor laili mu te loagaram se tai kaparam,
duruk wonong te baga se ali arigam gurugam ale
20 kariimet talipara ningi kua namamonko bagaman mu nunga niara ikiam,
ale nunga songkuring kaogam se arataman,” iwitata batogalko.
21-22 Umu te asele, tom kariimet nunga
kingdom koma koma te nup patawumonko tai Jerusalem ilu biguwumon, mu nuna
noko nup Zion ningi mu biyala balu pagarmon se nu nup biya taukko.
23 Ani kulak se asokel ago, bare nu aninga asokel menawuram;
nu aninga marak bagara ko tom tukunang awuram tala.
24 Se ani iwita balem:
“O aga Kaem, aninga tom luan kusumuri me bataguruko!
Ni kimik menara mena;
kuriang gue suen biya nama lagoso, bare ni am butata baga lagasam.
25 Duap te nunguningkiri girakala biya, ni ali imi ko nukuri yager beterem;
se taiti gomang kualala mu, nika kiting kiwol.
26 Melmasak suen la umu mena namamonko, bare ni mu butata baga se lagerko;
nuna suen la nanimi te ira ko guang iwita gigira amonko;
se guang gigira aram se waru sapara ale
iru gia ko iwita, ni nunga menawur se mena namamonko.
27 Bare ni am koma suanta bagasam,
ale ni mu kimik menara mena.
28 Nika kariimet nunga kuriang mu ni kema te bagamonko;
nononga gue te mu eng am ni kema te pempem butata baga se lagamonko.”