104
Kaem mel suen biya beteram ale ko sinar taso, ko amilmil
1 Ani angamang motam lilim la te Yawe nup patawurikko.
O Yawe aninga Kaem, ni nip biya;
ni King Biya, se sokel karogo.
2 Ni kakirip bo yamel siraram biya te
numi ira iwita, ni ka nikim biya mu te
nimi irem ale nikinang biya ningi bagasam;
ni taiti gomang kari bo kawam sel tagi kam tagirem,
3 ale yu biya kualala* Genesis 1:6-7 arikko. mu ko kuali nunguningkiri ka wonong kalem.
Se taiti nuwi mu nika karis iwita,
se daula ka giso kerak namoso taiso.
4 Ni balsam se marir daula mu nika den gi karogo nama taisan;
se tama kuamili nikim aora biya mu nika ura kari ko bagasan.
5 Ni ali imi ko nukuri nungem ale nukuri mu awote ali imi nungem;
se me ta namoso taiso, mena.
6 Ni girakala yu mu guang iwita te duruk ali lilim la iramurem se aniram;
yu mu duruk suen la nunga iramuram.
7 Bare ni aking sail ago, pure paga kam, yu tagi taukko balem,
se palenga namaram ale
8 duruk bibiya ko gamung kaoram nama sor wolong ningi kapa nama,
ko kuwim ni maingkala nunguru beterem mu te ilu biguwuram.
9 Ni yu ko munan gek am beterem,
se me ta kia kaparuk ale ali lilim udagi me ta ira kaluwurokko.
10 Ni yu ali ningi nungem, se tengesan ale
koropong ningi kapasan, ale duruk kulupik ningi nagusan nama kapasan.
11 Se donkey diwang se giarum ko mel
suen biya yu mu nasan, ale udagi yu ko me kuesan.
12 Se inangnang binga geragasan mu yu
mu duap te tam kuali singir mosan ale baga se, tam kower te
dagi dagi wur ilu gilingisan.
13 Se ni ka wonong kuali biya mu te
baga se, tuwik te duruk mel yu nungarsam,
se ali awote tam mayang mel suen la amilmil te nunguning kapasan.
14 Ni balsam se sirsir mel bulmakau namonko mu aragoso,
ale mel duap duap ko yango, kariimet sapa namonko, mu aragoso:
15 waen, kariimet amilmil nungarso mu se,
olive oil, kariimet nungumik sapasan mu se,
barley, bread ko kaisan nasan ale sokel karogo bagasan.
16 Se Yawe ko tam sida Lebanon sor te
aguwam mu yu karogo terong ma saposo.
17 Se inangnang seng kuali singir mosan ale kuwim tasan.
18 Se duruk kalel bibiya mu goat diwang nunga kuwim;
se manga gogong mu mel gotektek sang nunga yumura kuwim.
19 Ni sige se ko bagara aolak mu ana mel
duap duap ko tom nanga kausokko beterem;
se worem mu tom nu te nama kaparukko mu ko ikiso.
20 Ni tiromorom tagisam se ana tirom nangarso,
se giarum ko mel suen la aratasan ale nasan gisan.
21 Se lion mu mel moa namonko sail te
niasan ale inang Kaem nungaram wore ko loagasan;
22 se turomola worem numi diruwuso mu
aking pila nunga kuwim yumura te taga anisan.
23 Asele kariimet mu nunga ningam ura mel ko barasasan ale
ura iluwasan la baingaso.
24 O Yawe, nika ura mu am ningi awote nunguningkiri!
Ni ka ikia sinar te la mel nunguru saperem;
ali imi nika mel duap duap ago terong ma saparam.
25 Ayo, gagi mu aromemek se ulal biya; mel karanga nama taisan se,
mel bibiya se gotektek talip ago, kaura moke mena, mu ningi bagasan.
26 Yagor dal awote namasan taisan,
se gagi ko mel bibiya Leviathan masan, ni nunga nungem,
mu ningi tinga kola gilingisan.
27 Mel bibiya se gotektek suen la ni nunga nungem imi mu,
na ko kuesan mu ni kiting te la na nasan ale nikate la loaga lagasan.
28 Se tom ni na nungarsam mu nuna gi nasan;
tom ni kiting urukusam, mu nana mel ningo ningo karogo terong masan.
29 Bare ni biring gurugu nungarsam,
mu nuna biririkasan ale nguangasan;
tom ni nunga marak gotek te bagasan mu
tagi kutuwusam, mu nuna kuesan ale kupkup ko geragasan.
30 Bare tom nika marak betesam se tai
kaposo, mu mel suen la aking ali karogo terong ma saposo.
31 Mel ningo nunguningkiri mu, Yawe ko
nikim garagar tom suen biya anirukko;
aninga angamang nu mel suen biya
nungam mu ko ninguru amilmilarukko.
32 Nu nup biya sokel garagar, se motam te la ali arigiso mu ali uririkiso;
ale duruk kau taso mu tama bur barasoso.† Exodus 19:18 se Hebrews 12:28-29 ago arikko.
33 Tom ani marak bagasam imi mu ani Yawe ko wur ilu se lagarikko;
ani tom suen biya aga Kaem ko wur ilu se ko nup patawurikko!
34 Ani Yawe ko ninguru amilmila se, kutek maem ale nu ko ko ikia bita lagerem,
wore aninga angamang nu ko amilmilarukko.
35 Bare kariimet ikia memek betesan mu ali imi te am mena namamonko.
Ani angamang motam lilim la te Yawe ko nup patawurikko! Aleluya!