115
Yawe marak bagoso, kaem kawel nungumik marak mena
1 Ana mu nanip mena, O Yawe, ana mena;
bare nika nip mu nikim garagar, se ni la nup biya toko, mu awuk,
ni ana nago ko kuesam ale ka den diram la karo tui lagasam.
2 Sor saki ko kariimet awuk se balsan,
“Nononga Kaem apoko ya?” ma nanga balsan?
3 Anananga Kaem mu duruk uningi bagoso; ale kota ko gomang te la mel suen la bita saposo.
4 Bare nononga kaem alo mu, silver se
gold te nunga nungurman, kariimet nuguting te nunga nungurman.
5 Kaem kawel alo mu nuguring ago, bare me munakasan,
ale nomotam ago, bare sor me arigisan.
6 Nuna nodogawa ago, bare den me ikisan,
ale nungamuru ago, bare sor siring me ikisan.
7 Nuguting ago, bare mel te me kau tasan,
ale nodoleng ago, bare me aolak ilusan;
nuguring nodogotak ago, bare marir te me tagisan.
8 Se arikaya kaem kawel umu nunga
nungurman, mu kaem kawel bagasan uwutatala bagamonko;
se arikaya nogo ko nongomang ningi
nunguning aram mu, koma suanta tala ko bagamonko.
9 O Israel kariimet, nina Yawe kote la loaga se lagaralko!
Nu kota ninga saonga kari, se nu kota tala mu ninga karem.
10 O Aaron ko gue te ko priest alo, nina nu kote la loaga se lagaralko!
Nu kota ninga saonga kari, se nu kota tala ninga karem.
11 Nina awiriya Yawe ko kua kapa lagasan mu, nu kote la loaga se lagaralko!
Nu kota ninga saonga kari, se nu kota tala ninga karem.
12 Yawe ana nago ko kuamili me saparam;
nu marak sokel nangarukko.
Nu Israel kariimet marak sokel nungarukko,
nu Aaron ko gue te priest alo mu marak sokel nungarukko.
13 Nu awiriya nu ko ko kua kapa lagasan, mu marak sokel nungarukko,
nuna nunup bibiya se nunup mena mu am koma suanta.
14 Aninga angamang mu Yawe marak
ningaruk se gue pagal ale suen aralko;
nina se ninga gue udagi mu koma suanta tala.
15 Yawe nu taiti gomang se ali mel suen biya kiwolaram mu marak sokel ningarukko!
16 Taiti gomang kalel biya mu Yawe kota ko,
bare ali mu, nu ana kariimet nangaram.
17 Kuera kariimet alo mu noko nup me
patawusan; kuera mutim ningi namaman mu koma suanta tala.
18 Bare anangata kariimet marak bagasan ewere amilmil te nup biya tusan,
aitak se tom pempem la.
Ana Yawe nup patawunakko!