122
Jerusalem ko Kaem amilmil tuokko wur
(Ilu se temple te nama tarigira ko wur David batogam)
Tom nuna aninga manorman,
“Ario! ana Yawe ko temple te namanakko,” maman,
mu ani ninguru amilmilerem.
O Jerusalem, ana aitak nika songkuring ago sanamiwasan!
 
Jerusalem wonong mu iwita kaloman,
numi kitira biya se aora biya nunguningkiri.
Umu te Yawe ko kariimet Israel, digo
koma koma te tarigisan, ale te balam uwutata te nup patawusan.* 122:4 Deuteronomy 12:13-14.
Ale kuwim umu betela ikup guyak te tuati nunga ko kuwim,
se king bibiya David te kaparam mu nunga daiga kuwim.
 
Buta se Jerusalem ko marolila ko guranek beteralko:
“O Jerusalem, awiriya nika kueso mu daiga bagara yawara arigimonko.
Nika por ka lautam mu ningi mu marolila anirukko,
se ka kawam suen la mu bitua karogo la!”
Aninga gue suan alo se aga sikisaki
alo nunga ningo ko se, ani iwita balsam,
“Jerusalem, marolila nika ningi anirukkowo!”
Yawe anananga Kaem ko temple laili mu nika ningi aniso mu ko se,
ani nika ningo pempem la anirukko mu ko nu aru wosenga se lagarikko.

*122:4: 122:4 Deuteronomy 12:13-14.