135
Kaem te nup patawura ko wur
1 Yawe ko nup patawuralko!
Nina nup biya tualko!
Nina noko ura kari alo,
2 noko temple ningi ura betesan mu se,
sikina noko galung laili nunguningkiri mu ningi ura betesan mu karogotala,
noko nup biya patawuralko!
3 Yawe nup patawuralko, mu awuk, nu Kaem ningo;
wur te nup biya patawuralko, mu awuk, nu ningo pempem la.
4 Yawe Israel atumukiram ale noko ma balam,
Jacob mu noko mel ningo yawara.
5 Ani ikisam anananga Kaem mu ko sokel aora garagar nup biya,
nu kaem suen la nunga kiaram.
6 Yawe kota ko gomang te la anapeya mel bitirukko mu beteso se arataso,
taiti gomang te, ali imi te, gagi ningi, se gagi nukum du biya mu te.
7 Nu taiti nuwi beteso se basuso;
nu pure nikim tuwik ago beteso,
ale marir beteso se arataso.
8 Nu Egypt nunga kuriang gira bilangara mu nunga moram se kua sapaman,
kariimet ko gue te, se buruk kausik ko gue te koma suanta.
9 O Egypt, nu noko kausa se kiwem bibiya nika ningi beteram,
nika Pharaoh se ko ura kari nungumik te beteram.* Exodus chapters 7 nama 14.
10 Nu sor suen biya nunga maguwuram,
ale nunga king sokel karogo mu nunga moram se kueman:
11 King Sihon, sor Amor mu nunga king mu se,
sor Bashan mu nunga king Og se,
sor Canaan ko king suen la, kua sapaman.† Numbers 21:21-35 se Joshua.
12 Ale nu nunga ali bataguru tam ale
noko kariimet nunga ali ko nungaram,
noko kariimet Israel nunga ali ko ma balam.
13 O Yawe, nika nip mu butata pempem anirukko;
kariimet gue luan udagi mu ningi, nika nip biya butata ani lagarukko.
14 Mu awuk, ni ka kariimet nunga giem ale bitua ningo te nunga bitarsam,
ale gemang motam nungarsam.
15 Sor saki nunga kaem mu, manga tam
te agi, silver se gold te nunga nungurman,
kariimet nongota nunga nuguting te nunga nungurman.
16 Se nuna nuguring ago wore, me te munakasan,
ale nomotam ago wore, me te loagasan;
17 nuna nodogawa ago wore, me te den ikisan,
ale nungamuru ago wore, sor siring te me ikisan.
18 Se arikaya kaem kawel mu nunga
nungurman ale ko nongomang ningi nunguning aram mu,
kaem kawel mu bagasan uwutatala bagamonko.
19 O Israel kariimet, nina Yawe nup patawuralko;
O Aaron ko gue te ko priest alo, Yawe nup patawuralko.
20 O Levi ko gue te ko kariimet, Yawe nup patawuralko;
nina awiriya noko nguangasan, mu noko nup patawuralko.
21 Yawe ko nup Zion ningi patawuralko;
nu Jerusalem bagoso.
Yawe ko nup patawuralko. Nunguning.