137
Israel alo sor iwareng te baga se nunga wonong Jerusalem ko mokasan
1 Ana Babylon wonong te yu norogen te dagiwa se
Zion wonong ko nangamin tuguman ale ko namononge kapakaso.*Wur imi ko duap iwita: Yia tom 586 B.C. mu te Babylon alo Jerusalem parusuwuman maguwuman ale kariimet talipara ningi nongorak Babylon namaman. Se Edom kariimet alo tom mu te ninguru amilmilaman.
2 Se nanga wur kagin ko bawe mu tam kower te itutuwuman,
3 mu awuk, kari nanga ilu talipaman ale
nangarak nunga sor te taiman mu wur ilunakko nanga diruwukasan,
ale nanga manarukasan, “Nina Zion ko
wur amilmil bo iluwal se ana ikinakko!” makasan.
4 Bare ana sor iwareng imi te Yawe ko wur
ningo ngual kasik ilunakko mu me terong.
5 O Jerusalem, ani ni ko ko angamili sapa namaruk mu,
agiting sengam mu magaruk se ani bawe te me morikko.
6 O Jerusalem, ni aninga mel gira, ani ni ko ko amilmil kelaga lagasam;
se ani ni ko ko angamili saparuk mu, agiring am sisirokko.
7 O Yawe, munan memek Edom kariimet,
tom Jerusalem te dagulam se beteman, mu me ko kamili saparukko;
nuna aikasan balukasan, “Wonong
sumu am menawuralko!” makasan.
“Kawam digo bo me bagarukko.”
8 Babylon, ni iwita ikiko, ni ikup arikkowo!
Kari awiriya munan memek ni ana
nangimik te beterem mu ko koma beteso mu,
kari umu amilmil kelagukko.
9 Kari umu nika kuriang nunga giok ale
am manga awote nunga waruk se kua paranga namamonko.
*137:1: Wur imi ko duap iwita: Yia tom 586 B.C. mu te Babylon alo Jerusalem parusuwuman maguwuman ale kariimet talipara ningi nongorak Babylon namaman. Se Edom kariimet alo tom mu te ninguru amilmilaman.