139
Kaem ana suen la nanga ari iki saposo
(David ko wur)
O Yawe, ni aninga angamang ari saperem ale ninguru aga ikisam.
Ani dagisam agi barasasam mu ni am ko iki sapasam;
ani awar ta bagasam agi wore ni aninga ikia am ari sapasam.
Ni aninga namara taira bagara aolak mu am ari ko iki sapasam.
O Yawe, den ani agiring te aratukko, mu ni girisam ikiwasam se ani balsam.
Ni ani amake ko, abiring ko, se abeta koma singsang bagasam,
ale ka kiting te aga iramursam.
Ni ani ninguru aga iki sapasam mu aningate mel aromemek,
se ani ko iki saparikko me terong.
 
Awiri nika Bur ko motam ko yumura ikiso?
Ani aparete nagu namarik ale ni motam ko yumurekko?
Ani taiti gomang te ta nama yumurek, bare ni mu te bagasam;
aking gagi naung du biya ningi nama yumurek ta, wore ni mu te bagasam tala.
Se ani binga nama worem bausa te,
se nama gagi biya dun sang te ta wore,
10 nika kiting te am aga ilu se aga kiti guruguwasam.
11 Ani ta balik, “Nikinang menaruk se
tiromorom aga lautok ale aga ira kaluwurokko,” ma balik ta wore,
12 tiromorom mu nika motam te am nikim
la, mu awuk, tirom se kowarkalal mu nika motam te am koma suanta.
 
13 Ni aninga angimik nuamur suen la nungem,
ni ani ayam tuagu ningi la aga nungem burangerem.
14 Se ni aninga nungem mu am duap bo, se ani ka nip patawusam;
ani ninguru ikisam, nika ura suen la bita
saperem mu ko balu kutuwurekko me terong.
15 Tom ani aga ayam tuagu ningi yumura la lagawakasam,
mu ni aninga angimik lilim mu ari ko ikiwakasam.
16 Tom ani me bilangerem, am gue te bagerem la, ni aga ikiem,
ale aga marak bagara tom mu bataguru beterem.
17 O Kaem, nika ikia ani ago ko mu ulal biya se ani awuk ko iki saparikko?* NIV ko bala bo mu Waskia den te aniso iwita aniso: “How amazing are your thoughts concerning me, God.”
Nika ikia suen biya nunguningkiri,
18 se saun iwita, ani kau saparikko me terong;
ani taga anirek ale barasik, wore ni ani agarak am butata baga lagasam.
 
19 O Kaem, aninga angamang ni kariimet memek nunga moar se kuemonko!
Nina kari nigiting gue ago, tagi talko!
20 Nuna nika nip balu maguwusan,
ale den memek memek ni ko ko balsan.
21 O Yawe, arikaya ni me ka kuesan, mu ani betela me nunga kuesam;
se arikaya ni kerak barimasan, mu ani
nunga angamang ninguru magoso.
22 Ani me nunga kuesam nunguningkiri,
ale kari memek ko nungarkasam.
23 O Kaem, ni aninga angamang motam
ari gurugu ale aga ikia suen la ari ikiko.
24 Ale memek mu menawur ale pempem
la ningo bagara ko lage te aga bitarko.

*139:17: NIV ko bala bo mu Waskia den te aniso iwita aniso: “How amazing are your thoughts concerning me, God.”