142
Kari ikup ago se Kaem nu sangukko aru wosengam
(David Adullam manga gogong ningi yumuwa se den imi batogam)
1 Ani Yawe kote niasam, nu gomang aisuk ale aga sangukko arusam.
2 Ani angamang ikup mu suen la nu manorsam se ikiso.
3 O Yawe, tom ani angamang motam sokel
menaso, mu ni keta aninga saonga ko lage mu ko ikisam.
Tuang ani te aolak ilusam mu dagarok bo kaluwura la te kira beteman.
4 Ni aninga abeta koma sing sang te loager ale arikko,
kariimet bo aga sangukko mena;
ani kuwim bo ta te yumurekko mu mena,
kariimet bo ta ani ago ko me negeso.
5 O Yawe, ani ni kete niasam, ale balsam, “Ni mu aninga yumura kuwim,
se tom ani ali imi te marak baga se mu,
ni aninga mel ningo se gira nunguningkiri,” ma balsam.
6 Se degewa gurugu ale aninga niara ikiko;
ani aeman sisi kaparam.
Kari ikup aisisan mu nuguting te aga
sangaru toko, mu awuk, ani nunga kiarikko me terong.
7 Se ikup ewere ko talipara ningi aga
sangaru to se ani nika nip patawurikko.
Nika ningo mu aninga te bitar se
kariimet ningo diram bitawara mu arigimon ale tai agarak
ilu biguwumon ale nip patawumonko.