145
Kaem ko nup biya se ko kiwem ningo ko amilmil wur
(David ko wur)
Ani nip biya ko balu pagikko, ni aninga Kaem se aga King;
ani pempem la butata nip patawu se lagarikko.
Kowarkalal pempem la ani nip patawurik
ale ka nip pempem la butata gi patawu se lagarikko.
 
Yawe mu ko nup biya, se nup patawusan mu am diram;
noko nup biya mu ko iki kutuwura ko mu me terong.
O Kaem, kuriang gue aitak mu, aking
kuriang gue bo udagi mu, nika ura
bibiya beterem mu nunga manarmonko;
nika kiwem bibiya duap duap mu ko nunga manaru gurugumonko.
Nuna nika nikim sokel garagar se nip biya mu ko balmon,
se ani mu nika kiwem mu ko ikia to se lagarikko.
Kariimet nika ura sokel garagar ago beterem mu ko balmon,
se ani mu ni mel bibiya beterem mu ko balu pagikko.
Nuna nika ningo suen biya mu ko
amilmilamon ale wur amilmil ilumon,
ale nika munan ningo diram la mu ko amilmil kelagamonko.
 
Yawe mu gomang lila se gomang bataga ko Kaem;
nu gomang tairate me magoso,
se nu bo ko kua tuata ko munan karogo terong mam.
Yawe kariimet suen la nongorak ningo;
nu mel suen la nungam mu ko gomang bataga karogo.
10 O Yawe, ni buruk kausik mel gotektek
suen la nunga nungem se nama
taiwasan, mu nika nip patawumonko;
nika kariimet mu suen la amilmil kisimonko.
11 Nuna nika kingdom nikim garagar mu
ko balmon, ale nika sokel garagar mu ko munakamon,
12 se kariimet suen la nika kiwem sokel ago bibiya beterem mu ko ikimon,
ale ka kingdom nikim ago yawarakala mu ko ikimonko.
13 Nika king ko bagara mu kumik menara
mena, se ni king ko tom pempem baga lagerko.
 
Yawe mu noko den kaolam mu diram la karo saposo,
ale ko kiwem suen la mu gomang lila te beteso.
14 Nu awiriya ikup ningi bagoso mu sangarso;
nu awiriya dagulam mu patawuso se sanamoso.
15 Melmasak suen la marak bagasan mu amilmil te nikate loagasan;
ale inang ko kuesan mu ni inang nungarsam.
16 Ni kiting ulaluwusam, ale kariimet mel i
ko tukunangasan mu nungarsam.
 
17 Yawe mel suen la beteso mu ningo se diram la beteso;
nu kiwem suen la mu gomang lila te la beteso.
18 Awiriya saonga ko nu arusan,
nuna nongomang ningi nunguning te nu arusan,
mu nu nongorak pingi bagoso.
19 Nu awiriya noko bowa ningi bagasan,
mu mel bo ko tukunangasan mu nungarso;
nu nunga niara ikiso ale nunga sangarso.
20 Nu kariimet nu ko kuesan mu nunga bitarso;
bare kariimet memek bitawara mu nunga maguwurokko.
 
21 Ani pempem la Yawe nup patawurikko.
Se melmasak suen la marak bagasan mu noko nup laili butata
pempem patawu se lagamonko.