3
Kaem ko munan diram
1 Buta se, Juda kari ko bagara se nungumik guang batoga ko munan mu ko ningo mu anape? 2 Mu ko ningo suen biya! Mel gira nunguningkiri mu, Kaem ko den mu giram nuna nungaram.* Psalm 147:19-20 ago arikko.
3 Se saki Kaem ko den nongorak kaolam mu me diram la karo tuikasan, se ana balnak Kaem mu ko den nongorak kaolam mu betela me karo tuokko e? 4 Mena, mu nu uwuta me bitirukko! Kariimet kawel munan ta betemonko, bare Kaem mu ko den diram la karo tuokko. Batoga bo te balam se aniso uwuta:
“Se ni den te aga betesam mu ni diram la betesam, ale aga memek wetang sapasam mu am diram.”† Psalm 51:4. Kaem ko den balam mu karo tuso: Romans 9:6; 11:29; 2 Timothy 2:13.
5 Se anananga betera kaora memek umu, Kaem ko munan ningo diram mu wetang te beteso. Se umu ana awuk ko balnakko? Agi ana balnak, Kaem anananga memek umu koma gomang memek te nanga maguwuso mu me terong manak e? Mena! (Ani ana kariimet nanga bala ko iki se balsam, bare mu ana kawelawasan.) 6 Mu uwuta mena! Se ana uwuta balnak mu, Kaem awuk ta kariimet suen la nanga tuterukko?
7 Agi awiriya bo ta baluk, “Aninga munan kawel mu te, Kaem ko munan nunguning mu wetang te nunguningkiri betesam se nu te nup biya taso, bare awuk se Kaem ani kari memek karogo ko am aga baluwoso?” 8 Bare ni buta balsam agi mu, bala ngualara imi am karogo la baluko, “Ario, ana kilek memek memek betenak se ko nunguning mu, Kaem nup biya taukko,” ma baluko. (Kariimet saki ana nagiring guari uwutata kutisan, bare nononga den mu am kawel la.) Nuna nunga bala ngualara mu ko koma memek mu ko eseman, uwutata tamonko.
Kariimet bo ta Kaem koma te diram me bagoso, mena
9 Buta se ana awuk balnakko? Ana balnak ana Juda alo mu terong nuam se sor saki ko mu mena manak e? Mena! Mena nunguningkiri! Ana maingkala ta ikiman, ana Juda ta se sor saki ko kariimet ta, ana suen la memek bowa ningi bagasan. 10 Kaem ko batoga te aniso uwuta:
“Bo ta diram nunguning mena, am mena,
11 ale bo ta ikia sinar ago baga se Kaem la kote me loaga lagoso, mena.
12 Nuna suen la Kaem nubiring tui
muruwuman ale suen la maga muruwuman.
Bo ta munan ningo bo me beteso, am mena biya.”‡ Psalm 14:1-3; 53:1-3.
13 “Nunga nodogotak nuguring mu kuera ko mutim iwita,
se nunga nungamili mu den kawel te balsan.Ӥ Psalm 5:9.
“Nunga nungamili kopa mu urer ko kuating
memek kari te nunga moso se kuesan mu iwita.”* Psalm 140:3.
14 “Nunga nuguring nusumulak mu kari
maguwura ko den ago terong mam.Ӡ Psalm 10:7.
15 “Nunga nusuwik nuguting mu kari te momonko tairate pitigiso;
16 nuna aolak ilusan mu mel suen biya maguwu se la namasan;
17 ale nongomang suanta se bagara lila ko ikia mu nongote mena.”‡ Isaiah 59:7-8.
18 “Nuna Kaem ko me nguangasan, am mena.”§ Psalm 36:1.
19 Ana ikisan, den suen biya Kaem ko batoga te aniso mu kariimet den umu ari ikiman wore nunga atumuwoso. Buta se ana suen la awuk balnakko, mena. Ana ali lilim ko kariimet mu ana suen la Kaem koma te den ago. 20 Bore te se, kariimet bo ta law karo tua ko munan te, Kaem ko baluk nu ningo diram ko me ta balukko, mena. Bare mu, law anananga memek wetang te beteso se ana ari ikisan, mu ana bita paguwuman, masan.* Law anananga memek wetang te beteso: Romans 7:7; Galatians 2:16.
Nangamang ningi nunguning te kariimet ningo diram ko nanga balso
21 Bare aitak mu, Kaem law umu ilu kiawa se, lage bo nu te ana kariimet ningo diram ko nanga balukko mu wetang te nanga kausam. Se lage umu Law se Prophet alo ko baluwasan tala. 22 Mu kariimet Jesus Kristus ko nongomang ningi nunguning aso, mu Kaem suen la nunga balso nuna kariimet ningo diram ko nunga balso. Lage bo bo kigilik mena. 23 Mu awuk, ana suen la memek beteman, ale Kaem ko sor nikim ningi ilak baganakko mu me terong. 24 Bare Kaem kota aking gomang nangaram, ale ura Jesus Kristus te nanga dia taukko beteram mu te, ana kariimet ningo diram ko nanga balam.† Lage Kaem kagaru nangaram: Galatians 2:15-16; Ephesus 2:8-9.
25 Kaem anananga memek siwurokko Jesus te tama beteram, se ana ko gue kaparam mu ko nangamang ningi nunguning aruk mu, Kaem nanga memek siwurokko. Nu uwuta beteram, mu noko munan diram se laili mu wetang te nanga kausam. Kam nu tama umu me betera la mu, kariimet memek bitakasan bare koma memek me nungarukaso, am ilu lagaram, 26 mu tom imi te Jesus te koma beteram. Ale munan umu te nu kota numi nanga kausam, nu mu ningo diram la, se kariimet Jesus ko nongomang ningi nunguning aso mu nu ningo diram la ko nunga balso.
27 Bore te se, ana anape te ira sanamanak ale nanimi patawunakko? Mu mena. Nanimi patawura ko munan mu sisi saparam. Se anape mel mu munan mu siruwuram? Agi law karo tua ko munan lage mu siruwuram? Mena. Nangamang ningi nunguning ko munan mu nanimi patawura ko munan menawuram. 28 Mu awuk, ana iwita balsan, kari ko gomang ningi nunguning te se, Kaem nu kari ningo diram ko ma balso. Bare law karo tua ko munan te mena.
29 Se Kaem mu Juda alo nunga Kaem la e? Nu sor saki alo nunga Kaem mena e? Mena. Mu nu sor saki alo nunga Kaem tala. 30 Mu nu Kaem suanta borta, nungumik guang batoga alo mu nunga nongomang ningi nunguning te, kariimet ningo diram ko nunga balso. Ale nungumik guang me batoga alo mu, betela nongomang ningi nunguning koma suanta nung te tala, nu kariimet ningo diram ko nunga balso.
31 Buta se awuk, ana nangamang ningi nunguning ko munan umu te ira sanamanak ale law mu mel yam ko balnakko e? Mena, mu uwuta mena tala. Bare mu ana munan umu te law sokel tusan.‡ Jesus law ko munan bita kutuwuram, se ana noko sokel te munan Kaem ko kueso mu karo tusan: Romans 8:4; Philippians 4:13; Matthew 5:17-19.
*3:2: Psalm 147:19-20 ago arikko.
†3:4: Psalm 51:4. Kaem ko den balam mu karo tuso: Romans 9:6; 11:29; 2 Timothy 2:13.
‡3:12: Psalm 14:1-3; 53:1-3.
§3:13: Psalm 5:9.
*3:13: Psalm 140:3.
†3:14: Psalm 10:7.
‡3:17: Isaiah 59:7-8.
§3:18: Psalm 36:1.
*3:20: Law anananga memek wetang te beteso: Romans 7:7; Galatians 2:16.
†3:24: Lage Kaem kagaru nangaram: Galatians 2:15-16; Ephesus 2:8-9.
‡3:31: Jesus law ko munan bita kutuwuram, se ana noko sokel te munan Kaem ko kueso mu karo tusan: Romans 8:4; Philippians 4:13; Matthew 5:17-19.