15
Moses mate epo Isalael so mate God hi di dla ta꞉demama sala dolumale
1 Epapedeme Moses mate epo Isalael so mate God hi di dla ta꞉demama sala iye dolumaiyo.
“Na꞉tapo God hi di dla ta꞉demama sala iye dolumolowepo.
Adipalati, ya꞉tapo Isip so mate nalatimama ya꞉ta itiyamaletapo yia꞉ye ma-tla꞉mtalepo.
Epame ya꞉tapo aliya koa mate epo yo di dla popa꞉lalo so mate yú dla mo-yumatilipo.
Epedeme na꞉ ya꞉ dla sala solowama.
Epame na꞉ta ya꞉ye na꞉ God ikadepe demama
ya꞉ hi di dla ta꞉dlowepo.
Epame na꞉ mamadulo yia꞉ God ikadepe demama
ya꞉ dla siyele hamilowepo.
Epedeme Godye ya꞉ hi ikadepepo.
4 Epapele dulu dla Pelo ya꞉ opa mate epo yia꞉ aliya koa mate Godtapo Omteka꞉pele Kaula dulu dla mo-yumatilipo.
5 Epame yútapo yia꞉ dokolomama ewala some u-upiyemama
ollotulume ta꞉la umpo popa꞉po.
6 Epame God wa꞉tapo Isip soye wa꞉ta itiyamale pato mate mo-potipo hamastalepo.
7 Epame wa꞉ta itiyamaletapo wa꞉ dla opahale dlalo soye batalipo hamastalepo.
Epame wa꞉ta siyaladleye pta sikemte dlapa sepena.
Epapedeme wa꞉ dla opahale dlalo soye dlapata osamokolo hamdemdiye epapelepo.
8 Epame wa꞉ta hedletapo mosisi some bibikilimama kaula patoye duka gladuwapo.
Epalati yútapo kokalepame kosukulli some haluwapo.
9 Epapedeme ka꞉yapa Isip sotapo hatetalemama epo atlamyeuwapo,
‘Ditapo Isalael soye dodolomtame
yia꞉ye hohopo aipa꞉ya mate poyupame yia꞉ alisisi hapuloma halomolowepo,’ demyeuwapo.
10 Amasiyama wa꞉ta hedletapo mosisi some bibikilimama
yia꞉ye yúta gola꞉depo poyumama yú dulu dla ewala some ollo-ollo dlalimuwapo.
11 Epapedeme god hale wa꞉ epapele halema꞉?
Hao, hawa ikadepe.
Adipalati, wa꞉ye sikemte aiyalma depo halemama hela꞉dle mate itiyamale mate halapo.
Epame wa꞉tapo ulugiyemale koko patoto halomdepo.
12 Epame wa꞉ta itiyamale tle Isip soye ta꞉lamota gola꞉dene dlepo.
13 Epapedeme wa꞉ kokó halepo hallalo bokotiyapo malamaletapo wa꞉ta ma ilame hohomale opa dia꞉ye eleme telepe.
Epame wa꞉tapo yia꞉ye wa꞉ta hallalo mo dla eleme pulupe.
14 Epedeme opa opitapo koko i dalepame sikemte wowota꞉myelepe.
Epapele dulu dla Pilisteya soye sikemte wowota꞉mama yia꞉ta itiyamaleye pa꞉lepe.
15 Epame Edom dokopala so mate epo Moab dokopala so mate sikemte eseselalalimale mate dupa yulumama wowota꞉myelepe.
Epame Keinan so tlo sikemte yiyellepe.
16 Epapele dulu dla opa ewolotapo wa꞉ta itiyamale natipame wowota꞉mama dali sokotalo some ha꞉ha꞉myelepe.
Yia꞉tapo mepo ha꞉ha꞉lati wa꞉ opa, wa꞉ta ma ilame hohomale sotapo tamhalemama tetla꞉mha꞉ha꞉lepe.
17 Epame wa꞉tapo yia꞉ye elemtame wa꞉ta hallalo tamali dla ipila꞉lepe.
Adipalati, tamali eye wa꞉ dota mita꞉pele aiyalma ayapo.
18 God, wa꞉ta dokopala depo hallowe kokotapo kokó halepo hallepe.”
19 Epapedeme sala iye Isalael sotapo God hi di dla ta꞉demama dolumaiyo. Adipalati, Godtapo kaula patoye duka gladlati Isalael sota ta꞉la sekelle tle seme dla uliyo. Amasiyama Isip sota ullati Godta yúye ma hame puame bopudemama yia꞉ye poyuiyo. 20 Epalati God yu molo atlalo a꞉ya, A꞉lon ya꞉ nana Miliyamtapo wola꞉ opi mate sila꞉sila꞉ halopo siyalemama Miliyamta itapu sala hamastepo yomaiyo. 21 Epammama ya꞉ sala ipo dolumaiyo,
“God hi di dla ta꞉demama sala iye dolumaiya.
Adipalati, ya꞉tapo Isip so mate nalatimama ya꞉ta itiyamaletapo yia꞉ye ma-tla꞉mtalepo.
Epame ya꞉tapo aliya koa mate epo yo di dla popa꞉lalo so mate yú dla mo-yumatilipo.”
Yú haka꞉letapo ma opalli koko
22 Epame Mosestapo Isalael soye elepame Omteka꞉pele Kaula saliyome ma Sul dalupa dulu dla tamalemama alila dapahatlope dulu dla yú dimi tamalaiyo. 23 Epame yia꞉ puame Mala mo dla yú natiyo. Amasiyama yú eye haka꞉lati podlomaiyo. Epedeme mo e ya꞉ hiye semama Mala*Mala hi ya꞉ dulu kokoye haka꞉le demama apopo. demdepo. 24 Epapeleye yia꞉ edla puame natitepo yú dloweta pa꞉lati Moses yu balemama, “Di yú hadima tame tilipo dlopa꞉?” demyaiyo.
25 Epalati Mosestapo gadle yilo God dla otele himiyo. Epapalati Godtapo dali tatalaye nati-iyo. Epame Mosestapo dali tatala eye hame yú dla hamastlati yútapo ma opaliyo.
Epapedeme Mala mo edla Godtapo Isalael sota ikadepe ya꞉ dolumolowe depame aiyalma amkoye ipo imaiyo, 26 “Wua꞉ hatlo na꞉ yu dla dalepo salladepo siyamama na꞉ta solotamale koko tlo dolumha꞉ha꞉iya. Wua꞉ta epapelepiye, eta na꞉ta Isip so dla wotiyalle hapiwa epapele wotiyalleye ma wua꞉ watle pohapilowa. Adipalati, na꞉tapo God depo halemama wua꞉ta alomaleye ka꞉ka꞉dlalo halapo,” diyo.
27 Epame yia꞉tapo Mala moye saliyome ma Elim mo dla puaiyo. Epapeleye Elim mo edla yú matale 12 me-popa꞉iyo. Epame olo dali 70 ma medla ha꞉ha꞉iyo. Epalati yia꞉tapo yú matale mateka꞉pi medla kimtimaiyo.