1-2 Selaye sokomoko 127 halepo gudepame Kiliyat Alba mo dla powaiyo. Mo hatlo i ya꞉ hi haleye Heblonpo. Amasiyama mo iye Keinan mo pato dulu dla elapo. Epalati A꞉iblahamtapo ya꞉lluta powale koko dla sikemte dupa kolomama amsela꞉iyo.

3 Epame A꞉iblahamtapo ya꞉llu powale motota elale aya dulu tle alikili dla woyapame Hitai so opa dla tame epo atlaiyo, 4 “Na꞉ye mo hale oplamita ma wua꞉ mo hema isikimi asepe puame halapo. Epedeme wua꞉ na꞉ watle ta꞉la nati-iya, na꞉ epalati asiyama mate ta꞉la e hapame na꞉ a꞉ya motoye hamatilowama,” diyo. ✡Hib 11:9, 13; Taiya 7:16

5 Epalati opa ewolota asiyama ya꞉ watle epo atlaiyo, 6 “A, wa꞉ di yu dalene. Wa꞉ye ikadepe diamkale ikadepepo. Di wa꞉ta wa꞉ allu moto hamatilowe ta꞉la koko dla po-alliwa. Amasiyama mowolo di mo hema ta꞉la ka꞉dle natipame wa꞉ a꞉ya moto edla hamatine,” diyo.

7 Epalati A꞉iblahamtapo yia꞉ mila꞉pi tle heodepame yia꞉ watle epo atlaiyo, 8-9 “Na꞉ta na꞉ a꞉ya hema hamatilowe dla wua꞉ta solotamelepiye, ka꞉dena, wua꞉ Sohal yami Epolon dla dallanatiya, ya꞉tapo ya꞉ ta꞉la mosukulu gudle dla Makapela mo dla teiko hotuwale elaye na꞉ watle hamilowe depame. Epele dulu dla ya꞉ta ta꞉la asiyama dla adisowa selepiye, na꞉ mesowa himilowepo. Adipalati, na꞉ solotama, na꞉ asiyadulota palilati yia꞉ moto mape medla hatimha꞉ha꞉lowedeme,” diyo.

10 Epalati Epolonta mo kosukulli kokoloma tala dla yimkadulo Hitai so mate polomama A꞉iblaham yu dalepame asiyama epo atlaiyo, 11 “Na꞉ a, wa꞉ na꞉ yu dalene. Na꞉ watapo Makapela ta꞉la i mate epame teiko hotuwale mate na꞉ opa mila꞉pi tle wa꞉ watle hamima, wa꞉tapo wa꞉ a꞉ya motoye edla hamatilipo depame,” diyo.

12-13 Epolonta epo atla dalepame A꞉iblahamta opa mila꞉pi tle heodepame opa hapulomata dallepo depame Epolon watle epo atlaiyo, “Namkale, wa꞉ na꞉ yu dalene. Na꞉ solotama, wa꞉ ta꞉la iye asiyama mate hapame na꞉ a꞉ya motoye hamatilowama. Epedeme wa꞉ na꞉ta wa꞉ watle ta꞉la asiyama dla mani hamilati wa꞉ siyele mate hane,” diyo.

14 Amasiyama Epolonta A꞉iblaham watle epo atlaiyo, 15 “Na꞉ a namkale, ta꞉la i ya꞉ asiyamaye 400 elo manipo. Epapele tlope asiyama eye pokoko. Epedeme wa꞉ isikimi tame wa꞉ a꞉ya motoye hamatine,” diyo.

16 Epalati ta꞉la asiyama dla A꞉iblahamta mo kosukulli kokoloma tala dla popa꞉le so yia꞉ inoma dali tle 400 elo maniye hame Epolon watle hamiyo. 17-19 Epapele api tle A꞉iblahamtapo Epolon ta꞉la yemala eye haiyo. Ta꞉la edla Makapela teiko hotuwale mate epo dali edla ha꞉ha꞉ mate A꞉iblahamta halomaiyo. Ta꞉la iye Mamele mo tle salita matlalo tiyama dla elapo. Epedeme A꞉iblahamtapo ya꞉llu Sela motoye Makapela mo dla teiko hotuwale dulu dla hamatiyo. 20 Mo eye ya꞉tapo Hitai so dla asiyama mate hauwapo, ya꞉ asiyadulota palilati hatimha꞉ha꞉lepo depame.