13
Yesuta ya꞉ alotle tlalo so heteye yú mate howahalomale
Yu sota Namilatale daya dlowe alilata mo-mateka꞉pi hallati Yesu ya꞉ ma malamaiyo, ya꞉ta ta꞉lamo i saliyome ma ya꞉ A hala dla hetlowe alilata mo-mateka꞉pi dla puaye. Epapedeme ya꞉tapo ta꞉lamo hema halemama ya꞉ alotle tlalo soye sikemte bokotiyapo malamale mate halemama ya꞉ta polowe sukulu dla tame gudiyo.
Epapedeme Yesutapo ya꞉ alotle tlalo so mate tamila꞉la daya dempopa꞉iyo. Epapele dulu edla Saimon Iskaliyot yami Yudas watle Saitenta malamale batalimale ma-hamiyo, ya꞉tapo Yesuye opahale do tama dla homellepo depame. Epame Yesu ya꞉ye mo-malamaiyo, ya꞉ Atapo koko hapuloma omhallowe itiyamale ya꞉ dla hamiwaye. Epame ya꞉ ma mo-malamaiyo, ya꞉tapo God tle pupame ma God hala dla ilame hetlowe kokoye. Epammama ya꞉tapo daya dempopa꞉le tle sila꞉tipo ya꞉ta asilalo tluka hale pustepo kapala hiyollalo tluka hapame ya꞉ akolo dla poliyo. Epame ita dulu dla yú sipo ya꞉ alotle tlalo so heteye howahalomtapame ma kapala hiyollalo tluka ya꞉ akolo dla asiyame halale hame yia꞉ heteye hihiyoliyo.
Epamtame Saimon Pita hete howahalowedeme apalati Saimon Pitatapo epo atlaiyo, “Lod, wa꞉ na꞉ hete ma howahalowedeme apopa?” diyo.
Epalati Yesuta epo atlaiyo, “Wa꞉ na꞉ta wata koko ha i ya꞉ dulu kokoye woloma pomalamolowa. Amasiyama alotle wa꞉tapo wata na꞉ta koko ha ya꞉ dulu kokoye malamelepe,” diyo.
Epapalati Pitatapo epo atlaiyo, “Wa꞉ na꞉ heteye pohowahalowa,” diyo. Epalati Yesutapo asiyama epo atlaiyo, “Wa꞉ na꞉ta wa꞉ hete pohowahalalo wekelepiye, wa꞉ye pona꞉ oplami,” diyo.
Epalati Saimon Pitatapo ma epo atlaiyo, “Lod, wa꞉ hatlo na꞉ hete siyapo tlo pohowahalowa. Amasiyama na꞉ do mate epo na꞉ dokopala mate hapuloma howahalomane,” diyo.
10 Amasiyama Yesutapo epo atlaiyo, “Yú mo-hutale oplami moto dla ulluye ma hawa halapo. Epedeme ya꞉ ka꞉dena, ma isikimi ya꞉ hete siyapo tlo howahaloweye. Epapedeme wua꞉ye ullu ma-hawa ha꞉ha꞉po. Amasiyama epapele tlope wua꞉ dulu dla oplami hale ala ullu mate me-halapo.” 11 Epedeme Yesu ya꞉ mo-malamaiyo, ya꞉ hamame opahale do tama dla homellowe oplamiye. Epammama ya꞉tapo epo atlaiyo, “Oplami hale wua꞉ dulu dla ala ullu mate me-halema,” diyo.
12 Yesutapo ya꞉ alotle tlalo so hete howahalomtepo gudepame ma tluka asiyampolla tumama epo atlaiyo, “Wua꞉ na꞉ta ala edla koko hale ya꞉ dulu kokoye me-malama꞉? 13 Epedeme wua꞉ta na꞉ watle atlemama, ‘imalalo oplami,’ epo ‘Lod,’ demdepo. Wua꞉ta na꞉ dla epo atlamde kokoye ikadepepo. Eye na꞉po. 14 Epapedeme wua꞉ imalalo oplami epo wua꞉ Lod na꞉tapo wua꞉ heteye mo-howahalomalepo. Epedeme wua꞉ mape wua꞉ amkadulo heteye asiyama howahaloma asiyama howahaloma demha꞉ha꞉iya. 15 Na꞉ta wua꞉ dla koko hale i natipo dolumaiya. 16 Epedeme na꞉ ikadepe koko wua꞉ watle atlema. Isikimi oko halalo oplamita ya꞉ dokopala oplamiye tla꞉mtame pohalasema. Epame do sesa꞉le hamtlalo oplamita ya꞉ tane dle oplamiye tla꞉mtame pohalasema. 17 Epapele dulu dla wua꞉ koko iye malapame epo hamha꞉ha꞉lepiye, Godtapo koko iye natimama siyelepe.
18 Epedeme na꞉ta atlama kokoye pase wua꞉ta hapuloma dla po-atlasema. Adipalati, na꞉malamana, na꞉ta mo-hohomuwa soye. Amasiyama God yu bukata epo atlapo, ‘Oplami na꞉ mate daya dempolatapo na꞉ mate opahale dlepe.’ Epapedeme God yu bukata epo atla kokota ikadepe woyamolowe tlo ka꞉pi. 19 Epapedeme koko ita ala powoyamalalo hallati na꞉tapo wua꞉ watle koko iye atlema. Amasiyama koko itapo ikadepe woyamelepiye, eta wua꞉ta na꞉ye ikadepe Keliso mleni dlepe. 20 Epedeme na꞉ ikadepe koko wua꞉ watle atlema. Oplami antapo na꞉ta tane dle oplamiye ya꞉ aya dla seme hetlepiye, ya꞉ na꞉ye seme hetamama apelepe. Epame oplami antapo na꞉ye ya꞉ aya dla seme hetlepiye, ya꞉ na꞉ A na꞉ tane duwaye e seme hetamama apelepe.”
Yesuta ya꞉ye opahale do tama dla homelle oplami botomastale
(Ma꞉t 26:20-25; Maka 14:17-21; Luk 22:21-23)
21 Yesutapo yu i atlemhalepo gudepame dupa kolle mate halemama ya꞉ alotle tlalo so watle epo atlaiyo, “Na꞉ ikadepe koko wua꞉ watle atlema. Wua꞉ dulu dla oplami haletapo na꞉ye opahale so do tama dla homellepe,” diyo.
22 Epapalati ya꞉ alotle tlalo sota yiskamu yia꞉ dulu dla asiyama nati asiyama nati demyemama, “koko iye ana watle atlema꞉,” demyaiyo. 23 Epapele oloma edla Yesu ya꞉ alotle tlalo so dulu dla Yesuta sikemte malamalalo oplamiye ya꞉ mateka꞉pi dla me-polaiyo. 24 Epapeleye Saimon Pitata oplami e watle inomata gidiyo, ya꞉tapo Yesuta atlamale kokoye oplami anta apopa꞉ depo dalla natilowedeme.
25 Epalati ya꞉tapo Yesu dla hitapolomama ya꞉ watle epo atlaiyo, “Lod, oplami anta wa꞉ye opahale so do tama dla homelepa꞉?” diyo.
26 Epapalati Yesuta asiyama epo atlaiyo, “Na꞉tapo dayata dala dulu dla saodepame hamilipiye, oplami etapo na꞉ye opahale so do tama dla homellepe.” Epame Yesutapo daya hapo dala dla saodepame Saimon Iskaliyot yami Yudas watle hamiyo. 27 Yudasta daya e halë oloma edla Saitentapo ya꞉ opasi dulu dla me-hetaiyo. Epalati Yesutapo ya꞉ watle epo atlaiyo, “Wa꞉ta koko halowedeme malapola kokoye ma hapele hane,” diyo. 28 Epapele dulu dla Yesuta Yudas watle epo atluwa ya꞉ dulu kokoye ya꞉ alotle tlalo sotapo woloma pomalamaiyo. 29 Adipalati, yia꞉ta malamaletapo semte Yudasta Namilatale daya ma hala telepo demapo diyo. Epalati opa opita malamaleta maniye semte atali so dla hapila tane demapo diyo. Adipalati, Yesu ya꞉ alotle tlalo so dulu dla Yudasta mani omhalemdiyo. 30 Epedeme mo-utula꞉la hallati Yudastapo Yesuta daya hamili hapame alikili a꞉ma ulataiyo.
Molo atlale yu amko
31 Yudasta ma-alikili a꞉ma ulatale hallati Yesutapo epo atlaiyo, “Epedeme Opa Yamita hela꞉dleye wata mo-botomastapo. Epame Godta hela꞉dleye Yami tle mo-botomastapo. 32 Epapedeme Godta hela꞉dleye Yami tle botomastlepiye, asiyama Godtapo Yamita hela꞉dleye me-ya꞉ dulu dla botomastlepe. Epedeme koko eye ya꞉ta ma hapele halepe.
33 Epedeme namkadulo, na꞉ ala alila kiyele dulu dla wua꞉ mate me-hallepe. Epame na꞉ta ma-tlati wua꞉ ma na꞉ totamelepe, amasiyama wua꞉ na꞉ ponatilowa. Epapedeme na꞉ta Yu so dla ma-atlamuwa kokoye mamisika꞉ wata wua꞉ watle atlama. Wua꞉ na꞉ta ta mo dla wua꞉ ma tloweye po-ala꞉na.
34 Epapedeme na꞉ ma molo atlale yu amkoye wua꞉ watle hamima. Wua꞉tapo wua꞉ amkaduloye asiyama bokotiyapo malama asiyama bokotiyapo malama demha꞉ha꞉lepo depame. Na꞉ta wua꞉ sikemte bokotiyapo malamhala epammama, wua꞉ amkale asiyama bokotiyapo malama asiyama bokotiyapo malama demha꞉ha꞉iya.
35 Epapele dulu dla wua꞉ta ya꞉mkale asiyama bokotiyapo malama ya꞉mkale asiyama bokotiyapo malama dle dulu dla ha꞉ha꞉lepiye, etapo opa hapulomata wua꞉ye ikadepe na꞉ dolumtlalo so mleni dlepe.”
Pitata Yesu welilowe kokoye Yesuta momolo atlale
(Ma꞉t 26:31-35; Maka 14:27-31; Luk 22:31-34)
36 Amasiyama Saimon Pitatapo epo atlaiyo, “Lod, wa꞉ hadima tlowedeme amma꞉?” diyo. Epalati Yesuta asiyama epo atlaiyo, “Wa꞉ wata oloma hema na꞉ta ta dla puluweye po-ala꞉na. Amasiyama alotle wa꞉ ma me-pulupe,” diyo.
37 Epapalati Pitata ma epo atlaiyo, “Lod, na꞉ adipalati wata wa꞉ mate tloweye po-ala꞉lalo wekema꞉? Na꞉ wa꞉ yilo poloweye ma-dinapopo halapo,” diyo.
38 Amasiyama Yesuta asiyama epo atlaiyo, “Wa꞉ ikadepe na꞉ yilo poloweye ma-dinapopo halema꞉? Epedeme na꞉ ikadepe koko wa꞉ watle atlema. Wa꞉ gagapota ala poyulumalalo hallati wa꞉ tatle na꞉ kokoye dapahatlope oloma dla wellipe,” diyo.