3
Saldis Sos dla yu ilimale hamili
“Saldis sos banakaka oplami dla yu iye ilipo hamine. God ya꞉ soko 7 mate epo tamili 7 mate halomalalo oplamita epo atlema. Wa꞉ta koko halomhalaye na꞉malamana. Opata wa꞉ye pasakalo halema demdepo. Epele tlope wa꞉ mo-powana. Epedeme wa꞉ elale tle sila꞉tipame wa꞉ dla hutiye koko mo-palila yakomaye matle itiyamale hapine. Adipalati, na꞉ta natili dulu dla wa꞉ta halomhala koko hapulomaye na꞉ God mila꞉pi tle po-ala꞉po elasema. Epedeme wa꞉ta ka꞉yapa God yu dalepame hauwaye e malamama woloma dolumane. Epammama wa꞉ dupa dulu malamale meyelope depame elale tle sila꞉tine. Wa꞉ta posila꞉tilalo wekelepiye, na꞉ uhalalo oplami some pulupe. Epedeme na꞉ta puluwe alilaye wa꞉ woloma pomalanatilowa.
Amasiyama opa opi God mila꞉pi tle ka꞉ka꞉depo ha꞉ha꞉ye Saldis mo dulu medla me-ha꞉ha꞉po. Epedeme yia꞉tapo tluka kamkamale didiyepo na꞉ mate siyamelepe. Adipalati, yia꞉ye ka꞉ka꞉dle sopo. Epedeme oplami antapo mikadepe dle dulu dla itiyamale mate kokalepo hallepiye, ya꞉ mape tluka kamkamale mepapele didiyelepe. Epedeme ya꞉ hi Pasakalo Buka dla elaye na꞉tapo pohiyostlowa. Epame na꞉tapo na꞉ A mate epo ya꞉ banakaka so mate yia꞉ mila꞉pi tle ya꞉ye solowepo. Epapedeme molo walle oplamitapo Hela꞉dle Sokota sos dla atlemhalaye dallepe.”
Piladelepiya Sos dla yu ilimale hamili
“Piladelepiya sos banakaka oplami dla yu iye ilipo hamine. Na꞉ye aiyalma epo ikadepepo. Na꞉ye Deibidi kokoloma elo hamhallalopo. Epedeme na꞉ta kokoloma gowaladlepiye, ma oplami haleta pohimomollowa. Epame na꞉ta kokoloma himomellepiye, ma oplami haleta pogowaladlowa. Epedeme na꞉ ipo atlema, Wa꞉ta koko halomhalaye na꞉malamana. Epedeme wa꞉ natine, na꞉ wa꞉ dla kokoloma mo-gowaladlepo. Epalati oplami haleta ma pohimomollowa. Epapele dulu dla wa꞉ itiyamale pasto tlope, wa꞉ta na꞉ta imale dolumsela꞉mama opa hapuloma mila꞉pi tle na꞉ kokoye powelimdena. Wa꞉ dalene! Na꞉ta Saiten ya꞉ opaye elempuame wa꞉ hete sitali isili dla pomellepe. Epalati yia꞉ta edla popa꞉mama na꞉ta wa꞉ bokotiyapo malamale kokoye malanatilipe. Epedeme opa iwolota mala-atlamyemama yiskamu yia꞉ye Yu sopo demdepo. Epele tlope yia꞉ po-Yu so ikadepe. 10 Epedeme wotiyalle patota ta꞉lamo hema pulupe, opa hapulomata kokalepo ha꞉ha꞉ma꞉ depo natilowedeme. Amasiyama alila edla na꞉ta wa꞉ye woloma omhallowepo. Adipalati, wa꞉ na꞉ta imale dolumama kokalepo halemama wa꞉ta mikadepe dleye pomelena.
11 Na꞉ta puluweye mo-mateka꞉pi. Epedeme wa꞉ dla mikadepe dle koko elaye woloma omhalane, oplami haleta wa꞉ hi mate ela pasakalo Pepele dimo dla elaye halala depame. 12 Epedeme oplami antapo ya꞉ta mikadepe dle dulu dla itiyamale mate kokalepo hallepiye, na꞉tapo na꞉ A God aiyalma aya dla ya꞉ye alumiti some hitomollowepo. Epelepiye, ya꞉tapo matle aiyalma aya tle alikili dla powoyamolowa. Epame na꞉tapo na꞉ A God hi mate epo na꞉ hi amko mate epo God ya꞉ mo hi mate ya꞉ dla hatitimolowepo. Mo iye Yelusalem mo amkopo. Epedeme mo itapo Pepele di na꞉ A Godta hala tle mallepe. 13 Epedeme molo walle oplamitapo Hela꞉dle Sokota sos dla atlemhalaye dallepe.”
Laodikeya Sos dla yu ilimale hamili
14 “Laodikeya sos banakaka oplami dla yu iye ilipo hamine. Na꞉ye ikadepepo. Epame na꞉ tle God yu ikadepeye botomastamdepo. Epo na꞉tapo Godta mimita꞉ple alisisi hapuloma dulu dla sitali depo halemama yu iye atlema. 15 Wa꞉ta koko halomhala hapulomaye na꞉malamana. Epedeme na꞉ta wa꞉ natili dulu dla wa꞉ta na꞉ malamaleye pase pato, epame wa꞉ta na꞉ alli koko mape pase pato. Amasiyama wa꞉ isikimi duka dla hallalo oplamipo. Epapele tlope na꞉ posolotamasema, wa꞉tapo isikimi epo duka dla halloweye. 16 Epedeme na꞉tapo wa꞉ye na꞉ mati dulu tle alikili dla mumulluwepo. 17 Epapedeme wa꞉ta wa꞉skamu wa꞉ye atlemama, ‘na꞉ye alisisi pasatana,’ depame ‘na꞉ dla alisisi ma-ala꞉na,’ demdepo. Amasiyama wa꞉ powa꞉malamata꞉, wa꞉tapo alisisi pa꞉po halemama atali yemala some inoma pa꞉po tidali siyapo sela꞉ye? 18 Epedeme na꞉ wa꞉ dla atlema, wa꞉ na꞉ dla puame gold mani hane, wa꞉ta alisisi pasatale depo hallepo depame. Epame wa꞉ na꞉ dla puame tluka kamkamale halomane, wa꞉ta tidali siyapo sela꞉ e bopudloweye. Epame wa꞉ na꞉ dla puame inoma melesene ma halopo inoma dla huhutupiliyene, wa꞉ta ma ka꞉depo natilipo depame.
19 Epedeme na꞉ta sikemte bokotiyapo malamalalo soye na꞉ta atlamhalemama posalemhalapo. Epapedeme wa꞉ hutulli mate halemama wa꞉ dupa dulu pasakaloye meyelope dene. 20 Epedeme wa꞉ dalene! Na꞉ kokoloma tala dla halemama kokoloma dla heyulumhalapo. Oplami antapo na꞉ yu dalepame kokoloma gowaladlepiye, na꞉ ya꞉ hala dla tuwame ya꞉ mate daya delepe, epame asiyama ya꞉ mape na꞉ mate daya delepe. 21 Na꞉ta mikadepe dle mate itiyamale mate hallati na꞉ Ata ya꞉ta pollalo dla ya꞉ mate pollopo depame na꞉ye mo-pameluwapo. Epapedeme oplami antapo ya꞉ta mikadepe dle dulu dla itiyamale mate hallepiye, na꞉ta ya꞉ye na꞉ta pollalo mo dla na꞉ mate pollopo depame pamollowepo. 22 Epedeme molo walle oplamitapo Hela꞉dle Sokota sos dla atlemhalaye dallepe.”