15
Kinzi aŋelo lima kanaŋonzi rua sisaŋa kelekele sakamao lima kanaŋo rua
Ŋineŋga naŋa amora mâsi kilala kie toŋge ipâŋga lâ samba tini, aku wisiŋgu motutu. Naŋa amoranzi aŋelo lima kanaŋonzi rua simo, sisaŋa kelekele sakamao lima kanaŋo rua ŋana sizavarunzi tamâta kâ. Aku lâ zo ŋana vetâŋa sakamao ŋinde ma marumbu lâ, ŋineŋga Maro Kindeni ne wisi-nâna ma marumbu ndo lâ. Ŋineŋga naŋa amora kelekele toŋge itogo tâi ŋalae mine, muŋga siveta lâ nduŋgu tava yââ. Aku tamâta pinde nde simandi tâi ŋinde pwali, kinzi ŋinde muŋga sipole kazâŋa kala sipolenzi ŋgoa ŋgoi ŋinde tava i ne pareŋa-mâsi wa i ŋa ne kambwaŋe wa. Kinzi tamâta ŋinde taitu-taitu sisaŋa kelekele toŋge ŋana wâŋgiŋa kâ, ŋinde muŋga Maro Kindeni ilanzi. Kinzi simo siwâŋgi wâŋgiŋa toŋge. Wâŋgiŋa ŋinde nde Maro Kindeni ne wurâta tamâta Mose kuku Lama rua nenzi wâŋgiŋa. Wâŋgiŋa ŋinde nde mine;
“Maro Ŋalae Kindeni, noko Walo Tamwata. Vetâŋa ŋalaŋala rârâni noko kuveta ŋinde ande ara ndo. Noko kumo pwai koipu ŋalae panzi tamâta rârâni, aku noko ne vetâŋa rârâni nde sondo ku mao kanaŋo. Maro Ŋalae, noko simbo nâ kumo sapâŋa. Mine kala tamâta ŋgu ndoni ma simege ŋanano ku sisuka noko ŋa kâki. Tamâta ŋgu ndoni ma simâ sipare tukunzi
‘pano, ŋana tu noko ne vetâŋa sondo nde ipâŋga nia yo lâ.”
Kinzi siwâŋgi wâŋgiŋa ŋinde marumbu lâ, ŋineŋga naŋa amora kilo, aku amora Maro Kindeni ne luma sapâŋa i kawa maa ikeno. Luma sapâŋa ŋinde nde ŋana itula Maro Kindeni kawa ŋgua mao pwataki kâ. Aŋga aŋelo lima kanaŋonzi rua ŋinde nde sipile luma sapâŋa ku siyâti simâ pa nia yo. Kinzi aŋelo ŋinde sisaŋa kelekele sakamao lima kanaŋo rua ŋana sizavarunzi tamâta kâ. Kinzi sipita lalava pâne ara ndo, aku lalava ŋinde salaga ndo. Aku silelea lalava mota muŋga sisuta lâ kaimbo “gol” ipono kondondonanzi tona. Ŋineŋga kelekele ŋapa vianzi kâ ŋinde toŋge nde ikai kondo “gol” lima kanaŋo rua, aku kondo toŋge ilanzi aŋelo lima kanaŋonzi rua ŋinde taitu-taitu. Aku Maro Kindeni, inani ŋana imo via ku imo nâ, ande i ne wisi-nâna nde ipipi ndo ikeno lâ kondo lima kanaŋo rua ŋinde ilonzi. Ŋineŋga Maro Kindeni ne sinâla tava ne walo ŋalae nde iveta mundo ipâŋga ku ipipi ndo lâ i ne luma sapâŋa ilo. Mine kala tamâta toŋge ikura ŋana ilâ luma sapâŋa ilo tia ndo lee, ikura lâ zo ŋana kinzi aŋelo lima kanaŋonzi rua ŋinde ma siveta nenzi wurâta ŋana sizavarunzi tamâta kâ marumbu lâ.