1 Sakiya Ikoniyo numutoka wikiki asaiki Juda wewenasida monoka numuku maya yowiki monoka laibo maya wehe liye. Sa-iyoko muki Juda wewenahena ito Guliki wewenahenamaki elewole iki eliki demesalo molae. 2 Sa-iboya Juda wewena malokasiya aya monoka maya eli hulikiki hetoka wewena malokasida maya ulana molibitadanaki Jisesida wewenalale yuhasida maya mesaha jibitatae liki data le. 3 Saboya, Poloko Banabasiko maya aya numuto maya onawa hana minaidanaki, We napaloka maya demesa ji-minaidanaki, olinipo bamiyoko Omaimidana gala maya wetome iki li bibi iki minaiye. Sa-niaiyoko We napalimo dilipe wati okaka gala maya lo soto moloko abuha-wowola maya bekaiyoko oliwaki nesa elewoleya aito-aitomidana liki minaiye. 4 Sa-ikaiyoko nenako, aya numuto wewenasiya luwaku limikiki maloka wewenasiya Juda wewenasitoka kolae, ito maloka wewenasiya aposolositoka kolae. 5 Sa-ikayoko alikaya Juda wewena ito hetoka wewena ito Juda wewenasida ujapa wenipolemaki li nupa ikadanaki aposolosida maya liwi letiwi iki liki ehadaloti kohaidatune liki li hukae. 6 Liki labo ga maya elikaidanaki oli li Likaoniya ebakuka Listela numutoka ito Delebe numutokaki eba makomalokaki wiki 7 monoka ga lalo maya wetome iki li biki minaiye.

8 Sa-iboya Listela numutokaya we mako ila maloka maloka apu ibo we mako ne. Aya weya dolakaho ayamidana etokaiyoko anu monamoko iki iki jeko ne. 9 Sakoya nebo welimoya Polo maya monoka noliboto maya eleko neyoko Polomamo wenu egenu hetokoko neyoko Omailimo le haka lonetatiye loko elewole oko elekaiyoko Polomamo mudakoko ga napauti sa-loko lo miye: 10 Sino wehe loko mino. Loko liyoko moi oko sinokadanaki anu sino sino moniye. 11 Sa-iyoko muki wewenamasiya Polo lolo ibo nesa maya mudaikiki ga napauti edimosida Likaoniya gaukati sa-liki lae: Omai maya wewena lolo ikiki lemotoka maya limiki minaiye liki lae. 12 Liki likiki Banabasidamuya omai nesa mako uliwa Jusiyae loko nebotoya molae, ito Poloda maya gahena lokaka ibo we maya nenako, omai nesa mako uliwa Heleme loko nebotoya molae. 13 Saboya, taoni napamidana esewatoka maya omai nesa Jusikumuye liki numuda makoya viminabo ne. Sa-ikayoko Jusitoka jokila he mekaka ibo welimoya onowelaki nesa mako le lolo okoko bulumaka maya luwawanipou molobetaidanaki, numuda ateto maya dilipe-loko wiyoko Poloko Banabasikosida maya jokila hi bikili niayoko, 14 aposolo lowe Poloko Banabasiko maya elikiki ololo lahelamibo ikiki lihima likatae liki lawolawonipo maya bolotiki hulikiki lolosa jiki wewenasida luwawanipou maya wikaidanaki sa-liki laiye: 15 We yuhakuse, edimoya nenaha niae. Lemoya edimokidana wewena maya minoihao. Edimoya suwa omaimidana maya demesa mikiki wehe loko Omaimidana apilaloka mini moliki minatae loko gala lalo maya lo noliboihao. Wehe loko Omailimoya okulumaki ito maya mikaki ela noki ayau muki minabo nesakiya le soto molonebo ne. 16 Sa-okaiyoko mini-liki yowebotokaya ele bekaiyoko hetoka wewenasiya ulawanipoutiya eliki aito aito anuwa li soto molikiki mini-liki wabokuti oloti maya minune. 17 Saboya muda hulobetamibo nenako, lubu jiboku maya minamae. Sa-okaiyoko, monawane maya mudatae loko hoya hulolibetaidanaki, howai onawa maya hulaidanaki, mida numuda onawa maya hulolibetaiyoko niwa niwa iki elowa jiki minae. 18 Liki li bikaiyoko jokila hi bikili niabo nesa maya moletiki hulae.

19 Sa-iki ya numuto maya minaiyoko Enitiyoko numutoti ito Ikoniyo numutoti maya Juda wewena nisikadanaki muki wewenasida maya ula molayoko li nupa ikiki Poloda maya ehadaloti kohaboya alo helekaiye likiki ika i-liki numuda esewatoka maya wae. 20 Sakiya liki wiki hulitikayoko, udoneyoko Jisesida wewenalale yuhamasiya nisiki hi wego iminayoko, akuya sinokoko taoniloka maya yowiye. Sa-okaiyoko udokoko o maya lokaiyoko Banabasite maya li Delebe numutoka maya waiye. 21 Wiki ya numutoka maya ga lalo maya wetome iki li beiyoko muki wewenamasiya elikadanaki, Jisesida wewenala yuha lolo ae. Sa-ikayoko niseibo anuloka maya aku li wili jiki waidanaki, Listela numutoka Ikoniyo numutoka ito Enitiyoko numutoka limiki hetika ito yowiki hetika aiye. 22 Sa-ikiya Jisesida wewenalale yuhasida maya monokau maya elewole iki minatae liki data limi limi moneidanaki, aya wewenasida luwawanipou maya wewena li elewole ibitikiki asowalaki nesamidana mupilalalo woko minokogoma adelau woko hiletune loko loletonebo maya ne. 23 Liki li bikaidanaki monoka numuda neboto nebotoya monoka ujapalo we dilipi eto imi waidanaki monokamuye liki nodenesahena mosiki minaidanaki, Omailoka liki miniki We napadamuya elewole iki elikanako, emokahoya ujapa lalo nesa obetatiye liki We napamidana adelau maya hulibitaiye.

24 Sa-ikaidanaki Pisidiya numutoka hulikiki Pamapiliya numutoka maya wiki hetaiye. 25 Sakiya wiki yalo maya hetikiki Pega numuto maya monoka li bikaidanaki Ataliya numutoka maya limiki waiye. 26 Yaloti maya limiki noku lapeu maya yowiki wiki wiki Enitiyoko numutoka maya hetaiye. Sakikiya ayaloya miniki omutiki leibo yowanu epawalo maya likili niaiyoko, Jisesida wewenalalesiya Omailimo maku bitiye liki Omailoka lae. 27 Sakiya nisiki hetikiki monoka wewenanipole yuhasida maya dilipi nupa ikiki Omailimo dilimiyoko yowanu leibo gala ito hetoka wewenasida Omailimo anu wilebetokaiyoko, elewole iki elebo awa maya wetome iki li biki suwaiye. 28 Sa-ikadanaki onawa hanaya Jisesida wewenalale yuhakiya magoinaya minaiye.