1 Monokauya unala yala emo uka miyoko emo uka miyoko ikaka niabo nesaya li aha nesa lolo amilo. 2 Wenoka wewenasida dilipi numudatipouka molatabo nesamuya osele delamideyo. Ito maloka wewenasiya wenoka wewena dilipe molupe likili okananipoki wewenasida maya dilipi moli-minaboma nenako loko noloe. 3 Maloka wewenatipolesidaya monokamuye liki dilipi nala numuku molabosidamukiya elideko edimosidaki dilipi molabo elitiye. Saniki weunipoki miniki dilipi lahelibo lahelamibo ibitabo wewena mukiya eliki minalo.

4 Anulo monikaka ito wesi mena ika iki olisa ikaka iki nimonebo wewenasidaya Omailimo lihima bitibo nenako, welo menalo minokaka nesatipoya wati nesa lolo noideko weki menaki koliki minatabo nesaya li opa amilo. 5 We napalimoya nemo ma hulolibetamekoloe, ito hulo aito olibetamekoloe loko libo nenako, dukatipoya moni uvaminalo dabuha molamilo. 6 Saina li-minabokumu lukaha amiki hulu ikigo li-minalo. Yamuya monoka bukuguya ga mako sa-liki luhuwa ji-minaboya ne:

7 Ujapa wetipo Omaimidana ga wetome iki li bikaka abo wemu data kiki iki minatae. Sa-nikiya monoka anugu niwiki helebolawasida diyakau mudali hali niki edimotoka demesalo moliki eli elewole iki minatae. 8 Jisesi Kalaestiya omutoko hapa yeikala nebo ito olotiya nebo, ito ayamidanago oko mino-loko woko minakolaiye. 9 Sa-ekolaiyo, aya ga maya eli-miniki maya aito-aitomidana ohatama ga li nibideko maya elamilo. Omaimidana nasahililalimo luhawatipoya le ikitokadeko wati ekolaiye. Saina nokakamidana ito namo okakamidanamu ga li hukiminabolimoya lilime wati amekolaiye. Ya anulo wabo wewenasidaya yatoka nesalimoya ma dilimamibo ne.

10 Lemodamuya Jisesima eimola upalaloti jokila he mekaka namabetautiya Juda wewenasi monokago li-minadanaki Omaimidana elekele itikaka niabo wewenasi natae loko ele bamiye. 11 Yamuya edimo alo eli-minae. Omaitoka jokila he mekaka we napalimoya bulumaka ja ito meme ja kohaikadanaki, oladanipoloti lahelamibo lihimanipolo Omaitoka jokila hi mikaka monoka numuda napau leko yowekaiyoko, jawa maya ohuloka hetokaya liki limiki jo ji hulikaka niae. 12 Ito Jisesiya asako eimola oladalalotiya wewena lukate le uluwitoletatuwe loko Jelusalemu numuda oho hetokaya kohaikayoko heliye. 13 Yamuya lemo asako Juda wewenasi jokila hi mikaka abo nesa hulikiki lepa mutiwa letune loko Jisesitoka wetune. Ito sa-udawokidana lemo elowa jeko makomasi lemoto nisideko yamidana Jisesiya upalo elibomidana oko lupalo molikadeko aha eletune. 14 Sa-loko noeleko sa-etune: Elewole eba mako lemotoka minamiye. Aha minoko soto pitibomuya ujapa okaka noune. 15 Sa-onenako, Jisesida uliwa le sawa jekokoteya lepadunuya Omaimidana kolo meko epoka loko minatudawolimoya lemo Omaitoka jokila he mekaka nesate lolo okadeko, le Jisesida maya mekuniyoko le Omaimidana ilipitiye. 16 Nasahiliki ito saina laloki moloko wewenasida betune liki data eli-minalo. Omailimoya yatoka nesamuya eliyoko emotoka jokila hi mebo nesa laloya lolo noiye.

17 Duliki wetiposida ganipo maya elikiki emesalo moliki digukaya limiki minalo. Edimo weutipoloya li wehe liki ujapa iki minikaka niae. Aya yowanunipomidana monawaya alikaya li soto molakili yowanuya nile. Yamuya yowanunipoya duka lalototi litae liki sakiya elekele ibitalo. Miluma eliki sa-itaboya, dukatipouka wati etibo nesaya edimotoka soto pamekolaiye.

18 Edimosiya lemodamuya Omailoka liki minalo. Lemoya eto okogo oko moloko etune loko labuha molokaka noune. Sakokoya lukauya lihima netibokumuya ohu jekaka noune. 19 Omailoka likaka nesadunu nilimi wati ikadeko, We napalimo aku nilime wati okadeko, edimotoka enemane oko wetuwe loko noloe.

20 Hulu ahola Omaiya We napate Jisesiya eimola oladaladunu elewole oko minokakamidana kolokaka ga le soto molaibomuye loko sipisipi jalo ujapa we napa lolo ibo we helibokuti aku ilime sinaibo weya ne. 21 Emokahoya saina aito-aitomidana libeko dilipe lalo okadeko emokaho letibotoka molatibotoka iki eli litae loko noloe. Sa-nikiya emokaho ele wati etibo nesaya Jisesi Kalaestida abuha-wowolaloti le dukauya moladeyo. Emoya luhuwamidana aweyaha minadeko, epoka lowa lowa oko yowewa yowewa oko elewole oko netiye. Yotokoe.

22 Wewenane yuhase, nemoya ga hana lo libamoe. Data leko luhawatipo le ikitetibo ga maya lo noliboyo, data ameme iki eli-minalo. 23 Ito lo libekoloyo, eli-minalo. Wewenate Timotida maya nalauti alo olutimikae. Sa-ikanako, emoya enemane oko nisekadeko, ilime-loko woko mudaidasiye. 24 Ujapa wetipo ito muki Jisesida wewenalasida dupamu nelokaiyoko noloyo, li bilo. Italiya mikaukati wewenatipolesiya dupamu delokaiyoko lo noliboe. 25 Omaimidana nasahilila edimotoka mino-loko woko minadeyo.