8
Yesu kpêê yiyé pyu ndêndê
1 Kópu yilî n꞉ii dî d꞉êê té, yi nt꞉u kópu ala. Nmî l꞉êê dîy꞉o Yesu kpêê yiyé pyu ndêndê ngê pyodo, Chóó Lémi ka mbóó p꞉uu mê kee wo, u wéni pee mî yaa wo, u che p꞉ââ pee ngê mîmî pyodo. *Hipîlu 1:3; 10:12 2 Kpêê yiyé pyu yoo dyámê mbêmê Chóó Lémi u ngomo k꞉oo ntee a dpodo nyédi, Chóó Lémi kwéli a tóó, Yesu yinté y꞉i mye dpodo yédi.
3 Yoo yi l꞉êê dîy꞉o, dêêpî kópu mbêmê kpêê yiyé pyu yoo yi kada pini knî y꞉oo tpile tp꞉oo Chóó Lémi ka a yémî tumo, kpêê ngê u kwo a yé tumo. Kpêê yiyé pyu ndêndê mye yinté, chóóchóó kpêê ngê pyódu ngê. 4 Dyámê mbêmê wodoo ya, ye kpêê yiyé pyu ngê daapêdoo ya, mu kópu u dîy꞉o kpêê yiyé pyu yoo n꞉ii a pyede, Mósisi u dêêpî kópu dyuu mbêmê a kpêê yiyé nyédi. 5 Dpodoni Yesu ngê a dódó, mbóó p꞉uu, yi dpodo u kââ kpêê yiyé pyu knî y꞉oo ye dódó ngmê, dyámê mbêmê. Mósisi ngê Chóó Lémi u wónu ngomo daa kêmakêma doo a wuwó, mye yinté. Chóó Lémi ngê kwo, Kópu yilî yi kakêmê ntee ṉga dî chámê, mbu mbêmê, yinté dpî l꞉âmo ngi. *Ex 25:40; Kîlosa 2:17
Chóó Lémi ka kââdî te kamî
6 Yesu ngê dpodoni a dódó, yintoo dpodo kpêê yiyé pyu knî y꞉oo daa dódó ngmê. Myenté, Yesu ngê Chóó Lémi ka ntee a kââdî nmoo, kpêê yiyé pyu knî y꞉oo yinté u kwo dêpê kââdî nmoo. Yesu u l꞉êê dîy꞉o gha kópu n꞉ii nmo t꞉âât꞉ââ té, kpêê yiyé pyu yoo yi dpodo u l꞉êê dîy꞉o daa yinté kópu yinmee a t꞉âât꞉ââ dé. *Hipîlu 7:22; 9:15 7 Kââdî te mbwee mbêmê mb꞉aamb꞉aa ngê w꞉oo pyaa dniye, ye Chóó Lémi ngê kn꞉aani kópu nmo daamupêdê kpo. 8 Kââdî te mbwee Chóó Lémi ka doo u ntââ ngê pyodo. Yi kópu u l꞉êê dîy꞉o ala kópu puku yedê a tóó,
Nmî Lémi ngê apê,
Mu dini ghi ngê kââdî te kamî mbêmê Yisîléli tpémi a ka anê kââdî té,
Njuda u yoo a ka amyenê kââdî té. *Jer 31:31-34
9 Dini ghi n꞉ii ngê yi kn꞉ââ yoo yi kada nê ghê wo,
Yichip u mênê nê pw꞉ii too,
yi ngwo a ka nê kââdî too,
dêêpî kópu dyuu ye ngmênî y꞉ângo.
Ngmênê yi dêêpî kópu dyuu dêdnyimo a chââchââ dé,
u nkwo ye dênîmo a ng꞉aa.
10 Ngmênê mu dini ghi ngê kamî ngê anî pyódu té,
myombó a ka amênê kââdî té.
Nmî Lémi ngê apê,
Yi yâpwo ngê anî ya, a yoo ngê adnyi kwo.
Dini ghi n꞉ii ngê yi kn꞉ââ yoo a ka nê kââdî too,
a dêêpî kópu dyuu chêêpî kpââ dê yi p꞉uu nê d꞉êê too,
ngmênê dini ghi n꞉ii ngê ala yéli a ka anê kââdî té,
a dêêpî kópu dyuu yi mbodo mênê anê yé té,
yi gha vy꞉o amyidnyi ya.
11 Pi ngê u mbwó ka mêdaadî tpapê, kwowo,
Nmî Lémi nuw꞉o ńedê choo ya,
mu kópu u dîy꞉o yi yéli yintómu yi lama wanî ya.
K꞉omo tpile yoo yi pi dmi ndîî dé ó yi pi dmi têdê dé,
ngmênê yi lama wanî ya.
*1 Njon 2:27 12 Yi lama wanî ya, mu kópu u dîy꞉o yi dono yilî a kuwó wanî kéé té,
mêdaanî ngî té.
13 Chóó Lémi ngê kamî ngê u kwo a kââdî nmoo, yi kópu ngê daa kêmakêma kââdî te mbwee u d꞉aa wunê kââdîkââdî.