1 Tutuya kumekumetana 'waineye, tomotoga matatabudi fwayefwayeye i miamiani bonadi 'aitamogana 'waidiega i veveifufu. 2 Tutuyanina 'waineye tomotoganidi i yaba-vuvua i nunago inala yana 'eba lakayega, nika tamu laube'u bwaikina i veluagai bei i vebae'wa 'awalawa Babiloni 'waineye. 3 Tutuya 'ifwaidi i 'a'avana, ma ediavo i veifufu i vo, 'Wa maia, yada beliki*Beliki tamu vanuga 'ana 'eba 'aiyogona fwayafwaya dekudekuna 'wainega i na tutuya, 'ana 'isa 'wa da vo labia 'etobai 'aitamogana bani'odi. Mulieta i na yatoi i na lalana i na kabuni bega i na fa'alaotogi. Belikinidi 'adi 'eba dekufwatagi koluta bega yadi vanuga i yogoyogonidi. ta na 'idewadi fwayafwayayega, we'e ta na toke ta na kabunidi nika i na fa'aladewadi.” Bega yadi 'eba 'aiyogona beliki, we'e koluta 'wainega i dekudekudi. 4 Mulieta i veifufu i vo, 'Wa maia, 'asiau yada 'atamana bwaikina ta na 'idewai, tamu vanuga manamanawena ta na yogoni bega i na laka abame, nika 'ada wagava i na vebwaika bega bei ta na miamiana kebu ta na yavula fwayafwaya matatabuna 'waineye.”

5 Tamu 'aiata, 'Auvea i obuma 'atamananina bwaikina wata vanuganina i laka abame i yogoniga i na 'isedi. 6 Nika 'Auvea i vo, E'a, de'e 'aila'a 'aitamogana wata bonadi 'aitamogana 'wainega i veveifufu, begaidi side bani'odi i vevesauluvedi. Yadi folovanina de'e 'eba velamu, i na nagoga bega 'ai'edi ava'ai i na nuaniga i na 'idewaimo, 'waidie kebu vitanaga. 7 'Asa'aiana! Ta na obu tomotoga yadi bona 'aitamogana ta na sivilavilai i na vetuli bega bona fuedi i na souyedi, 'wainega ma ediavo i na ve'ibavubavu.” 8-9 Side bani'odiga 'Auvea tomotoga i luveyavulidi i nagoi fwayafwaya matatabuna 'waidie we'e yadi 'atamananina i yogoyogoniga i baileni. Begaidi 'atamananina i goleni Babeli, fai 'Auvea tomia fwayafwaya bonadi i sivilai bona tulina tulina bei i souyedi.