3 Mulieta Ebelamo yana vavine vovodi i 'iaweni, i vaganago i veifufu me Aite yadi to'edakumetavo 'waidie i vo, 4 Yaku vavine yawaidi i 'a'ava, bega a velu'ui 'waimie, tamu yami fwayafwaya 'wa da tauyeni a da kimwanei, bega bei a da ve'ufadi.”

5 Siwe me Aite Ebelamo yana vona i tutuli i vo, 6 Yaku 'auvea, 'omu tamu toveimea ma 'amu ve'ililibu taiadi ta miamia. Nuanuama taumata 'atumaina 'u na venua'ivineni bega yamu vavine 'u na ve'ufadi. Tomotoga matatabudi de'e bei i miamia, kebu tamu aitoi 'ana fata i na talabodemu 'adi ve'ufa faifaina.”

7 Ebelamo i vona'a'ava nika ma yana ve'ililibu i 'odu me Aite matadie. 8 I vona i vo, 'Ai'edi nuanuami 'wa na 'ivaiseku yaku vovo 'ana ve'ufa faifaina, nuanuaku 'wa da veifufu 'aku wagavayega Efiloni 'waineye taunina Soa natuna, 9 bega Ovu Makifela i da tauyeni a da kimwanei, ovunina yana tanoga a na 'edabala lilivaneye. 'Wa da voneni i da vekimwaneyeni 'waikuye 'ana tutula matatabuna bega a da 'aniveleneni 'waineye 'omi fuemi matamie, bega taumata a da 'ewai yaku 'aila'avo taiadi faifaima.’ ”

10 Efiloni tomogo Aite i miabui 'ifwaidi yana 'aila'avo taiadi, kumanidiavo i maiaga 'atamananina a na 'awa 'eba luku 'waineye, Efiloni yana veifufu Ebelamo 'waineye i vivinenegeni. Efiloni i vo, 11 Kebu 'aku toveimea, yaku nuanua 'u na vinenegeku. Yaku 'aila'avo matadie tanoganina wata ovu taiadi a na velemu. Bega 'u na nago yamu vovo 'u na ve'ufadi.”

12 Ebelamo i tovoi 'awalawanina 'ana tomotoga matadie ma yana ve'ililibu i 'odu 'waidie. 13 Tomotoga matatabudi i vivinenega nika Ebelamo Efiloni yana vona i tutuli i vo, Kebu, yaku nuanua 'u da nogai. Nuanuaku fwayafwaya a na kimwanei 'waimuyega. Tanoganina 'ana tutula mogitana 'u da voneku a da tutuli, mulieta yaku vovo a da ve'ufai.”

14 We'e Efiloni Ebelamo i voneni i vo, 15 'Aku toveimea na vonemu. Fwayafwaya 'ana tutula kileu siliba 400 bani'odi. We'e 'omu 'ima taiadi ta veiana. 'Asa'aiana 'u na nago yamu vovo 'u na ve'ufai.”

16 Ebelamo Efiloni yana tutula i awave'atumaieni bega kileu siliba 400, 'ana 'etowava bani'odi 'eba sivedavedamana 'wainega i tutuli. Tutuyanina 'waineye me Aiti to'edakumetavo 'au'auveadi matadie.

17 Side bani'odi Ebelamo fwayafwayanina i kimwanei Efiloni 'wainega, 'awalawa Makifela we'e Mamile lilivaneye. Fwayafwayanina Ebelamo i kimwaneiga tanoga, ovu, wata welavi fuedi 'edabala 'waineamo i veve'alatovoi. 18 Tutuyanina 'waineye ma'itufa Ebelamo 'eba veimeanina i 'ewai i vetoniwakeni. 'Atamana bwaikina 'ana 'eba luku 'waineye me Aiti 'au'auveavo matadie fwayafwayanina i 'aniveleneni Ebelamo 'waineye. 19 Mulieta Ebelamo yana vavine Sela i ve'ufadi 'awalawa Kenani 'waineye, ovu Makifela nageneye Mamile lilivaneye tamu 'ana 'eba 'ainana Ebiloni. 20 Nika tanoga fwayafwayanina 'waineye wata ovu i 'anivelenedi me Aiti 'waidiega i nago Ebelamo 'waineye, kumanina yana taumata wata yana 'eba veimea.