27
Iso tubu'edakumeta 'ana 'anivelena Iakobo i vinagoi
1 Tutuyanina 'waineye Aisake 'akonadi i ve'auvea-'afo'afo matana i sako. Bega natuna tubu'edakumeta Iso i goleni i mai i voneni i vo, Natuku.” Iso i vo, Tamaku, yau side.”
2 Aisake i vo, Yau 'akonadi a ve'auvea-'afo'afo, kebu a da 'asetaiga ma'avia a na wafa. 3 Yamu 'eba yaubani tufu 'u na 'ewadi, 'u na nago wala'aie tamu 'aisaya faifaiku 'u na loveni. 4 Nuanua bwaikina 'aku 'aisaya 'iwanina 'u da 'idewai, 'u da mieni 'waikuye a da 'ania, i da 'a'avana yaku vona-nuakalikali a na velemu wata tubu'edakumeta 'amu 'anivelena 'waikuyega 'u na 'ewai mulieta a na wafa.”'Auvea 'waineye i da vevesauluva 'atumaina 'waimuye wata tubu'edakumeta 'amu 'anivelena 'waikuyega 'u da 'ewai, mulieta a da wafa.”
5 Aisake i veifufu natuna Iso 'waineye Libeka i vivinenegeni. Tutuyanina Iso i tauya wala'aie 'aisaya yaubani faifaina, 6 Libeka i vona natudi Iakobo 'waineye i vo, 'A na vonemu. Bagase tamamu i veifufu Iso 'waineye i vo, 7 Tamu 'aisaya wala'aiega 'u na mieni, 'aku 'aisaya 'iwanina 'u na 'idewai a na 'ani, i na 'a'avana'Auvea mataneye a na vona nuakalikalimu wata tubu'edakumeta 'amu 'anivelena a na velemu, mulieta a na wafa.” ’ 8 Natuku, yama veifufu 'u na nogayadewai bega ava'ai 'a na vonemuga 'u na 'idewai. 9 Nuanuaku 'u na nago 'aisaya yadi vadabaweye goti siaidi 'ailuga 'atumaidi 'u na miedi 'waimeye, bega 'ani'ani 'iwanina a na 'idewadewadi tamamu yana nuanua bani'odi. 10 Mulieta 'ani'ani 'u na naweni tamamu 'waineye i na 'ania, bega i na vona-nuakalikaliemu wata tubu'edakumeta 'amu 'anivelena i na velemu, mulieta i na wafa.”
11 Iakobo inana Libeka i vonedi i vo, 'Wa na 'asetai tataku Iso tomogo 'olo'olona, we'e yau tomogoku kebu 'olo'olonaga. 12 'Ai'edi tamaku i na 'abitonoviku, bega i na 'asetai yau a vevekali 'ako kebu 'ana fata i na vona-nuakalikalieku, we'e mogitana i na awavesakoyeku nika vita bwaikina a na veluagai.”
13 Siwe inana bonana i tutuli i vo, Natuku, awavesakonina i da mai 'waimeye, yau vematavuloga 'a na tovoieni. Ava'ai 'a na vonemuga, 'u na vematayakeyakeni 'u na nago goti 'u na miedi.”
14 Bega Iakobo i nago goti natudiavo i miedi inana i veledi, mulieta Libeka 'ani'ani 'atumaina wata 'iwanina i 'idewai Aisake yana nuanua wata yana 'eba sosoana bani'odi. 15 Mulieta Libeka Iso 'ana talauma 'atumaidi i mieni vanugayega, nika natudi bwasiona Iakobo i ve'weseni. 16 Nimana wata 'odona i baniumadi goti vutuvutudi 'waidiega. 17 I 'a'avana, Libeka 'ani'ani 'atumaina wata 'iwanidi beledi i kabunidiga taiadi Iakobo i veleni.
18 Bega Iakobo 'ani'aninina i mieni tamana i veleni i vo,
Tamaku” Aisake i vo, Natuku, we'e 'omu aitoi, Iso 'alo Iakobo?”
19 Iakobo i vo, Yau yamu tubu'edakumeta Iso, yamu nuanua a vematayakeyakeni. 'Aisaya side a mieni 'waimuye. Nuanuaku 'u na 'isa, 'u na miabui 'u na 'ani bega 'u na vona-nuakalikalieku wata tubu'edakumeta 'aku 'anivelena 'u na veleku.”
20 Aisake natuna i velutolieni i vo, Natuku, bani'odi 'u munega bega 'aisaya 'u veluagai, 'u le'wa-matayo'o?”
Iakobo i vo, 'Auvea yamu Yaubada i 'ivaiseku nika yaubani 'atumaina a 'idewai.”
21 Mulieta Aisake Iakobo i voneni i vo, Nuanuaku 'u na mai lilivakuye a na 'abitonovimu bega a na 'asetai 'omu mogitana Iso 'alo aitoi?” 22 Bega Iakobo i vaganago tamana i 'abitonovi i vo, Bonamu Iakobo 'ana nogaya bani'odi, we'e nimamu 'wa da vo Iso nimana.” 23 Aisake natuna Iakobo kebu i da 'isa'inanai, siwe nimana i 'abitonovi 'olo'olona goti vutuvutudi 'waidiega.'Wa da vo Iso nimana 'olo'olona bani'odi. Begaidi Aisake i 'idewadewa i na vona-nuakalikalieni wata tubu'edakumeta a na 'anivelena i na veleni. 24 Nika i velutolieni i vo, 'Omu mogitana natuku Iso?” I vo, 'Asa'aiana yau.”
25 Bega Aisake i vo, Natuku, 'aisayanina 'u mieni a na 'ania nika a na vona-nuakalikaliemu wata tubu'edakumeta 'amu 'anivelena a na velemu.” Bega Iakobo tamana 'ana'ana i veleni i 'ani, wata oine i mieniga tamana i yemu. 26 Mulieta Aisake Iakobo i voneni i vo, Natuku, 'u mai lilivakuye 'u 'avalamaigiku.”
27 Bega Iakobo i nago tamana lilivaneye i 'avalamaigi, Aisake 'ana talauma i yaogi nika i awavemogitaneni, bega i vona-nuakalikalieni i vo,
E'a, natuku magaimu yaoga 'atumaiotogina
'wa da vo tamu tanoga magaina bani'odi,
bei 'Auvea
'ayavau i 'imoso'iedi
28 Nuanuaku Yaubada numula abamayega
wata fwayafwaya 'ai'aiwabuna 'wainega,
'ani'ani wata oine 'atumaidi i da velevelemu.
29 Nuanuaku tomotoga 'adi 'aila'a tulina tulina i da vetofolova
wata i da 'odu'odu 'waimuye.
Nuanuaku taimwavo, matatabudi 'u da veveimeyedi
we'e inamu natudiavo ma yadi ve'ililibu i da 'odu'odu 'waimuye.
'Ai'edi aitoi i na awavesakoyemu, bega ilagi [vita] 'u na veluagai,
kumanidiavo 'adi vematavuloga i da veluagai.
We'e aitoi i na velu'ui bega 'waimuye,
Yaubada i da vesauluva 'atumaina 'waimuye,
Yaubada wata i da vesauluva 'atumaina 'waidie.''
30 Aisake yana vona-nuakalikali Iakobo 'waineye i ve'a'ava i tauya nika Iso i le'wa wala'aiega 31 Iso 'ani'ani 'atumaina i 'idewai i mieni tamana 'waineye, i voneni i vo, Tamaku, nuanuaku 'u da tovoi 'u da miabui 'aisaya a mieniga 'u da 'ania, mulieta 'u da vona-nuakalikalieku wata tubu'edakumeta 'aku 'anivelena 'u da veleku.” 32 Nika Aisake i velutolieni i vo, 'Omu aitoi tomogoga?” Iso i vo, Yau natumu yamu tubu'edakumeta, Iso.”
33 Aisake yawaina i lovoga i toke i feto i vo, Vetuma aitoi 'asiauotoga 'aisaya i veleku a 'ani, kumanina a vona-nuakalikalieni wata tubu'edakumeta 'ana 'anivelena a veleni? A vona mogitana, vona-nuakalikalinina wata tubu'edakumeta 'ana 'anivelena i na 'eno-vagata 'waineye.”
34 Tutuyanina Iso tamana yana vona i nogai i toke i taibwaubwau i vo, Tamaku, we'e yau bani'odi? Nuanuaku wata 'u na vesauluva 'atumaina 'waikuye.”
35 Siwe Aisake i vo, Taimu vekaliega 'amu vona-nuakalikali i 'ewai.” 36 Iso i vo, 'Ana wagava Iakobo 'ana 'aseta Tovekali, fai 'akonadi tutuya 'ailuga i vekalieku. Nagami tubu'edakumeta 'aku veuveuta i 'ewai, we'e 'asiau 'aku vona-nuakalikali i 'ewai. I lubwaineni 'u da vesauluva 'atumaina 'waikuye, tamu 'amu veuveuta 'wainega 'u da veleku.”
37 Aisake i vona Iso 'waineye i vo, Yau Iakobo a venua'ivineni i na vetoveimea 'waimuye wata enavo matatabudi a vonedi i na vetofolova-maimaiga 'waineye. Wata a vona'awaufaufa 'waineye 'ani'ani wata oine bwaikina faifaidi a veleni. Natuku, mogitana kebu tamu luvegalala i da 'eno'eno bega a na velemu.”
38 Siwe Iso i vo, Tamaku, 'ana vona-nuakalikali i da 'eno'eno 'wainega 'u da vesauluva 'atumaina 'waikuye? O tamaku, nuanuaku yau wata 'u da vona-nuakalikalieku wata 'aku veuveuta 'u da veleku.” I vona'a'ava nika Iso i taibwaubwau.
39 Tamana Aisake i voneni i vo,
Yamu mia matatabuna 'waineye
fwayafwaya yana 'ai'aiwabu 'wainega 'u na mia 'ani'ie,
wata numula abamayega kebu 'u na veveluagai.
40 Yamu mia matatabuna kefata 'u na vevefoloveni
we'e taimu 'waineye 'u na vetofolova-maimaiga.
Siwe tutuyanina 'u na vo,
A na 'etoyavuku,’ yana veimea 'u na geuya bega 'u na nago.”
Iakobo i dega i nago 'awalawa Fadani-Lami
41 Fai tamadi Iakobo i vona-nuakalikalieni wata tubu'edakumeta 'ana 'anivelena i veleni begaidi Iso taina i vedumwe'ai'aieni. Bega Iso i velamu yana nuanuayega 'eda'eda i 'idewadi i vo, Nagami tamaku yawaina i na 'a'ava a na mogaia, mulieta Iakobo a na luvewafai.”
42 We'e Libeka vala i nogai Iso yana nuanua faifaina bega vala i vetunei Iakobo i mai i voneni i vo, 'U na vainenega, Iso 'amu luvewafa 'ana 'eda i 'idewai bega 'ana mewa i na 'ewai. 43 Natuku, 'a na vonemu 'u na 'idewadewa, bega 'u na dega 'u na nago Elana novuku Lebani 'waineye. 44 Taiadi 'wa na miamia 'ana tugusa tatamu yana nuasako i na 'a'ava. 45 Tutuyanina nuana i na ve'atumai wata ava'ai sauluvaga 'u 'idewai 'waineye nuana i na fani, mulieta vala a na vetunei 'u na mai. Kebu i da lubwaineni 'ami 'ailuga 'wa na wafa 'aiata 'aitamogana 'waineye.”
46 Mulieta Libeka Aisake i voneni i vo, Yau a 'abiawa me Aiti vevine yadi sauluva 'waidiega. 'Ai'edi Iakobo i na nagi tamu vavine Aiti 'wainega, a nuani voke sauluvanina 'wainega a na wafa.”