3 Tutuyanina 'aisaya matatabuna i na le'wai, kileu bababana i na 'ewayavuleni bega 'aisayanidi i na yemu, mulieta kileu i na vevilai ufanina 'awana i na vetubodai. 4 Bega Iakobo sifi 'adi to'isave'avinavo i velutoliedi i vo, Ekwavo, 'omi ava'aiega 'wa maia?”

I vo, 'Ima me Elana.”

5 I velutoliedi i vo, We'e tamu tomogo 'wa 'asetai 'ana wagava Lebani, Naoli tubuna?” Yana velutoli i tutuli i vo, E'e 'a 'asetai.”

6 Iakobo i velutoli i vo, 'Wa da 'asetai 'atumaina?” Nika i vo, E'e 'atumaina, 'u 'isanago natuna Litieli i mimai yana sifi taiadi.”

7 Wata Iakobo i vo, Bola inala bwaikina kebu i da lubwaineni 'aisaya 'wa na siaugidi. Sifi wata goti 'wa na veyemudi bega i na viladi gidegideye.”

8 I voneni i vo, Kebu 'ama fata 'aisaya 'a na veyemudi 'ana tugusa matatabuna i na le'wai, mulieta to'isave'avinavo ufa 'awana a na tutuboda i na sibaleni, nika ufa a na koia sifi 'a na veyemudi.”

9 Iakobo bola i veveifufu tomotoganidi taiadi, nika Litieli i le'wa tamana yana sifi taiadi, fai kumanina 'aisaya 'adi to'isave'avina. 10 Tutuyanina Iakobo Litieli 'iseni avuna Lebani natuna, yana 'aisaya sifi i le'wedi ufa 'awana 'ana tutuboda i ketoi, ufa i koia bega 'aisayavo i yemu. 11 Iakobo Litieli i 'avalamaigi i yaogi nika i taibwaubwau. 12 Iakobo i veifufu nibaina Litieli 'waineye i vo, Yau Iakobo, Libeka natudi tamamu yana 'aila'a. Bega Litieli i lilide i nago i veifufu tamana Lebani 'waineye.

13 Tutuyanina Lebani vala i nogai Iakobo i mai, i lilide i nago i yogo'ede'edeni, i 'avalamaigi i yaogi wata i voneni taiadi i nago yana vanuge. Mulieta Iakobo nani matatabuna i veifufuyedi Lebani 'waineye. 14 Bega Lebani i voneni i vo, 'Omu mogitana dayagiku wata yaku 'aila'a.”

16 We'e Lebani natunavo vevinedi 'adi 'ailuga, tulaina 'ana wagava Lea, we'e bwasiona 'ana wagava Litieli. 17 Lea matana 'adi 'isa 'atumaidi, we'e Litieli 'ana 'isa 'atumaiotogina ma 'ana magisisi. 18 Iakobo Litieli i toke nuakalikalieni bwaikina begaidi tamana i voneni i vo, Yau a tauyeku a na folofolova malamala 7 nagedie, 'ai'edi natumu bwasiona Litieli 'u na veleku taiadi 'a na nagi.”

19 Lebani i vo, 'Atumaina, yau a na velemu, kebu nuanuaku tomogo tulina a na veleni. 'U na miamia de'e bei taiadi ta na folofolova.” 20 Bega Iakobo i folofolova malamala 7 nagedie Litieli tuveobu faifaina. Fai Litieli i toke nuakalikalieni bwaikina, avinodi malamala fuedi Iakobo 'waineye 'wa da vo 'aiata kebu fuediga.

21 Tutuyanina yana 'abivaivai 'ana malamala i veluagai nika Iakobo Lebani voneni i vo, Nuanuaku yaku vavine 'u na veleku taiadi 'a na veluaga.”

22 Bega Lebani tomotoga matatabudi 'atamananina 'ana tomia i vonedi i maia, nagi 'ana sakali i 'idewai. 23 Siwe lovananina 'waineye dudubale Lebani Lea i naweni Iakobo 'waineye taiadi i 'eno. 24 We'e Lebani yana tofolova vevinena 'ana wagava Silifa i 'aniveleneni Lea 'waineye yadi tofolova.

25 Tutuyanina Iakobo 'awa'awaiogose i tovoi nika Lea i 'iseni. Lebani i velutolieni i vo, Ava'ai faifaina naninina 'u 'idewai 'waikuye?” Bega Iakobo i nuasako Lebani 'waineye i vo, Malamala 7 nagedie a folofolova Litieli faifaina, awale 'u vekalieku?”

26 Lebani i vo, Yada sauluva nagi faifaina kebu bwasiona i da nagi matayo'o mulieta tubu'edakumeta. 27 Nuanuama nagi 'ana sakali wiki 'aitamogana i na 'a'ava, mulieta Litieli 'a na velemu. Wata Litieli faifaina 'u na folofolova malamala 7 nagedie.”

28 Bega Iakobo i awave'atumaieni. Iakobo Lea i nagia taiadi i miamia wiki 'aitamogana i 'a'ava, mulieta Lebani Litieli Iakobo i veleni. 29 Lebani tamu tofolova vevinena 'ana wagava Bilani Litieli i veleni i na vetofolova 'waineye. 30 Mulieta Iakobo Litieli taiadi i 'eno, fai kumanina i nuakalikalieni bwaikina we'e Lea sai'afo. I 'a'avana i miamia wata i folofolova Lebani 'waineye malamala 7 nagedie.

33 Wata Lea i miana natudi iavetana i tubuga i goleni Simioni, fai i vo, 'Auvea bonama i nogai fai kebu 'ama nuakalikaliga, begaidi tamu kwamana i velema.”

34 Wata 'ana vetonu i miana i venatuna natudi iavetana i tubuga. I goleni Livai fai i vo, Tutuya de'e ma'itufa yama lamoga i na sosoanema yana nuakalikali 'wainega fai natunavo 'adi 'aitonu a venatunedi.”

35 Wata i miana nika i venatuna natudi iavetana i tubuga, i vo, Tutuya de'e 'Auvea a na subiai.” Bega natudi 'ana wagava i goleni Iuda. Nika i 'ailove, kebu wata i da vevenatuna.