35
Iakobo i tauya i nago Elana 'waineye, bei Lebani natunavo vevinedi Lea wata Litieli i nagidi. Malamala 14 nagedie Iakobo i 'abivaivai vevinenidi 'adi tutula faifaidi. Lea tamu yadi tofolova-maimaiga vevinena 'ana wagava Silifa Iakobo i veleni tamu yana vavine, we'e Litieli tamu yadi tofolova-maimaiga vevinena 'ana wagava Bilani Iakobo i veleni yana vavine. Mulieta Yaubada Iakobo i voneni i vo, Lawamu yana 'atamana 'u na 'iaweni 'u na vilamu 'u na nago tamamu yana 'atamane.”
We'e yana mainina 'waineye Iakobo i kololo i vo, I na nunago Iso yana 'aila'avo 'edeye i na daba bega yaku vevinevo wata natukwavo taiadi i na nikema.”
Tutuyanina 'adi 'ailuga i veluaga, Iso kebu i da nuasakoga Iakobo 'waineye wata kebu taiadi i da vetalaga.
Yaubada Iakobo i vona-nuakalikalieni
9-10 Nag 32:28Iakobo 'akonadi i vilai Mesafotemiayega we'e i miamia Bedeli, bei Yaubada i souya-vaituganeni Iakobo 'waineye nika i vona-nuakalikalieni i vo, 'Omu 'amu wagava Iakobo, we'e 'asiau bega i na nagoga kebu i na golemu Iakobo, 'amu wagava Isileli.” Nika Yaubada wagavanina Isileli i goleni*Vona Ibeliu 'waineye, wagava Iakobo 'ana 'aseta Tovekali, we'e wagava Isileli 'ana 'aseta Yaubada taiadi i vevetalaga. 11 Nag 17:4-8Wata Yaubada i vo, Yau Yaubada Toketokeotogiku. 'U na venatuvea'wa nika 'amu 'aila'a i na vefueotoga wata 'waimuyega 'aila'a fuedi wata bwaikidi i na souyedi, we'e tubumwavo 'ifwaidi i na ve-kini. 12 Fwayafwayanina basenadi Ebelamo wata Aisake a veledi, 'awaie a na velemu, 'omu wata tubumwavo 'waimie 'wa na ve'itulamuyeni.” 13 Yaubada i veifufu i 'a'avana, 'awalawanina 'wainega i 'iaweni i laka.
14 Nag 28:18,19Bei Iakobo Yaubada taiadi i veifufuga kileu i sivetovoia nika oine i iwagi yana 'anivelena Yaubada 'waineye wata ma yana ve'ililibu bunama i iwagi kileunina 'waineye yana 'eba nuave'avina faifaina. 15 Mulieta 'awalawanina i goleni Bedeli†Bedeli 'ana 'aseta Yaubada yana Vanuga. fai bei Yaubada Iakobo taiadi i veifufu.
Litieli yawaidi i 'a'ava
16 Iakobo ma yana 'aila'avo 'awalawa Bedeli i 'iaweni, i nunagoi sai'afo 'ani'ie Efaleti 'wainega Litieli i vebutudi siwe tutuya manamanawena i vetafewedi. 17 Bola i vevetafewa tamu to'ivevauvau i vonedi i vo, Kebu 'wa na kolologa sai'afoga tamu natumi iavetana i na tubuga.” 18 'Akonadi kwamana i tubuga Litieli i goleni 'ana wagava Benoni‡Benoni 'ana 'aseta Natuku yaku veviga 'wainega. nika yawaidi i 'awatagoni, we'e tamana kwamananina i goleni Beniamina.§Beniamina 'ana 'aseta Natuku 'aku 'atagi. 19 Litieli 'akonadi yawaidi i 'a'ava mulieta i ve'ufadi 'edanina i nunago Efaleti lilivaneye, we'e 'atamananina tamu 'ana wagava Bedeliema. 20 Iakobo kileu i didigi Litieli 'adi taumata 'waineye yadi 'eba nuave'avina, we'e 'asiau bola i 'eno'eno.
Iakobo natunavo
Iakobo natunavo 'adi 'aila'a 12 side 'adi wagava bani'odiga.
23 Lea natudiavo,
Lubeni, Iakobo yana tubu'edakumeta,
Simioni, Livai, Iuda, Isaka wata Sebuloni.
24 Litieli natudiavo,
Iosefa wata Beniamina.
25 Litieli yadi tofolova-maimaiga 'adi wagava Bilani, natudiavo,
Dani wata Nafitalai.
26 Lea yadi tofolova-maimaiga 'adi wagava Silifa, natudiavo,
Gada wata Asa.
De'e Iakobo natunavo, tutuyanina i miamia Mesafotemia i tubuga.
Aisake yawaina i 'a'ava
27 Nag 13:18Iakobo i vilai i mai tamana Aisake 'waineye, i miamiani Mamile, Kiliati-alaba lilivaneye. Kiliati-alaba tamu 'ana wagava Ebiloni, bei basenadi Ebelamo ma natuna Aisake i mia. 28 I miamia Aisake 'ana malamala 180 i veluagai. 29 'Akonadi i ve'auvea-'afo'afo nika yawaina i 'a'ava bega i nago tubunavo taiadi i veluaga. I 'a'avana, natunavo Iso wata Iakobo i ve'ufai.
35:9-10: Nag 32:28
*35:9-10: Vona Ibeliu 'waineye, wagava Iakobo 'ana 'aseta Tovekali, we'e wagava Isileli 'ana 'aseta Yaubada taiadi i vevetalaga.
35:11: Nag 17:4-8
35:14: Nag 28:18,19
†35:15: Bedeli 'ana 'aseta Yaubada yana Vanuga.
‡35:18: Benoni 'ana 'aseta Natuku yaku veviga 'wainega.
§35:18: Beniamina 'ana 'aseta Natuku 'aku 'atagi.
35:27: Nag 13:18