6 Mulieta Iuda tamu vavine ne'e'elina 'ana wagava Temali i vagavaia, natuna tubu'edakumeta Eli yana vavine. 7 We'e Eli yana sauluva sakoiotogina 'Auvea mataneye, begaidi 'Auvea i luvewafai. 8 Bega Iuda Onani i voneni i vo, Nuanuaku 'wabula Temali 'u na nagidi. Tamu yada veimea i 'eno'eno aitoi tatana i na wafa, tatana 'wabulina i na nagidi, bega i na venatuna tatana 'ana wagava wata 'ana wauma faifaidi.’ ”

9 We'e Onani kebu nuanuana tatana 'wabulina i na venatuna, fai kwamananina kebu natuna mogitana. Begaidi tutuyanina taiadi i veveluaga, ufa i veve'amubwadodoyeni fwayefwayeye. Fai kebu nuanuana tatana Onani natuna 'ana veuveuta tamana 'wainega i na 'imoso'ieni. 10 Onani naninina i 'idewaiga sauluva sakoiotogina 'Auvea mataneye, begaidi 'Auvea wata i luvewafai.

11 Bega Iuda natuna 'wabulina Temali i vonedi i vo, 'Wa na vilami tamami yana 'atamane kebu tamu aitoi 'wa na nagia, 'ana tugusa natuku Sila i na taulai nika taiadi 'wa na nagi.” Siwe Iuda kebu nuanuana Sila i na wafa tatanavo bani'odi,” begaidi Temali i viladi tamadi yana vanuge.

12 Malamala 'ifwaidi i 'a'ava, Iuda yana vavine, Sua natuna, yawaidi i a'ava. Tutuyanina vemogai i 'a'ava, Iuda ma iana Ila tomogo Adulami i nago 'atamana Timina, sifi vutuvutudi 'adi to'aibobo i na fogedi. 13 Tamu tomogo Temali i vonedi i vo, Iaku, lawami i nunago 'atamana Timina, yana sifi vutuvutudi i na bobodi.”

14 Temali i 'asetai Sila 'akonadi i taulai, siwe kebu tamu aitoi yadi nagi 'ana 'eda i da 'idewai. Begaidi 'wabula 'ana vaigavu i taidi, ma'itufa 'unu'unudi 'ana baniumai i 'ewai tomogodi i talaumai 'adi 'isa i sivedamana. I nago 'eda lilivaneye i miabui 'atamana Enaimu 'ana 'awa 'eba luku 'waineye, 'edanina i nunago Timina 'waineye. 15 Tutuyanina Iuda vavine i 'isedi i vo 'ako tamu vavine toalagogona, fai maigidi i baniumai. 16 Kebu i da 'asetai natuna 'wabulina bega i vonedi i vo, Nuanuaku taiadi ta na veluaga.” Temali i vo, 'Ako taiadi ta na veluaga we'e 'ama tutula 'ana vebwaika 'aivia?”

17 Iuda i vo, Tamu goti tubuvauvauna a na vetunei yaku 'aisayavo 'waidiega. Nika Temali i vo, Ava'ai 'u na veleku yamu veifufu 'ana tugusa?”

18 Iuda i vo, Ava'ai tugusaga nuanuamu a na 'idewai 'waimuye?” Temali i vo, 'Amu wagava ma 'ana didikumakuma ma bulavina, wata yamu wautogana nimamuye 'u na velema.” Bega Iuda naninidi i veledi, mulieta taiadi i veluaga nika i miana. 19 I 'a'avana i viladi yadi vanuge, 'adi talauma i taidi ma'itufa 'wabula 'ana talauma 'wainega i talaumadi.

20 Mulieta Iuda iana Ila, tomogo Adulami i voneni i vo, 'U na nago goti tubuvauvauna vavine 'u na veledi, ma'itufa kukuanidi a velediga 'u na 'ewadi.” Siwe Ila vavinenidi kebu i da veluagadi. 21 Begaidi tomotoga 'ifwaidi i miamianiga i velutoliedi i vo, “Ava'aibe bei tamu vavine toalagogona i miabui i miamia 'eda lilivaneye, Enaimu 'ana 'eba luku a na veluagadi?”

Yana velutoli i tutuli i vo, Kebu tamu vavine toalagogona de'e bei i da miamia.”

22 Bega Ila i vilai i nago Iuda ' i voneni i vo, Vavinenidi kebu a da veluagadiga wata 'atamananina 'ana tomotoga i voneku i vo, De'e bei kebu tamu vavine toalagogona i da miamia.’ ”

23 Bega Iuda i vo, 'Asa'aiana kukuanidi a veledi 'waidie i na 'eno'eno. Sifi tubuvauvauna a vetunei yama veakutagona faifaina, siwe vavinenidi kebu 'u da veluagadi. 'Ai'edi ta na vilada vavinenidi ta na lulualediga, bola tomotoga fuedi i na sidibidibieda.”

24 Weta'i 'aitonu i 'a'ava, mulieta tamu tomogo i mai Iuda 'waineye i veifufu i vo, Temali lawamu kumanidi vevine toalagogona yadi sauluvayega i nago nika 'akonadi i miana.”

Begaidi Iuda i vo, 'Wa na vagavaidi ta na nawedi ta na kabunidi.”

25 I vagavaidi i nunawedi i na luvewafadi faifaina, Temali tamu tomogo i vetunei lawadi 'waineye, Iuda yana vona'awaufaufa 'ana tugusa 'adi 'aitonu i veni wata Temali yana veifufu i lu'ivoneyeni i vo, Tomogonina toni kukua kumanina ive'ina'inagema naninidi i na 'isa 'atumaidi. Aitoi 'ana wagava ma 'ana didikumakuma bulava 'waineye, wata yana wautogana de'edi?”

26 Tutuyanina Iuda i 'isa'inanadi i vo, Kumanidi yadi sauluva tonovina mulieta yau, Fai yau natuku Sila kebu a da tauyeni taiadi i da nagi.” Wata kebu tamu tutuya Iuda Temali taiadi i da 'eno.

27 Tutuyanina Temali yadi venatuna 'ana 'aiata i veluagai, nika i 'asetai kwakwama 'adi 'ailuga kamodie. 28 Tutuyanina i vebutudi tamu kwamana nimana i souyeni, vavine to'isave'avina i 'abi, nimaneye bulava yamoyamoina i yogoni i vona i vo, De'e kumanina nagami i tubuga.” 29 Siwe nimana i vilai i luku nika taina iavetana i vemageta. Bega vavine to'ivevauvau i velutoli i vo, Bani'odi 'u munega 'u kumeta?” Begaidi kwamana 'ana wagava i goleni Felesi.*Vona Ibeliu 'waineye, wagava Felesi 'ana 'aseta tosouyagi kumekumetana Daba. 30 Mulieta kwamana tamu i tubuga, nima'odona 'waineye bulava yamoyamoina i 'eno'eno, 'ana wagava i goleni Sela.†Vona Ibeliu 'waineye, wagava Sela 'ana 'aseta yamoyamoina 'alo magemagetana.