8
Iesu taunina yada Tovelomu Bwaikina
1 Sam 110:1Ava'ai 'akonadi a veifufuyediga lamudi side. Mogitana 'ida ma yada Tovelomu Bwaikina bani'odi 'akonadi a vona. Taunina Iesu, i miamia abame, ma yana veimea Yaubada 'Ai'aiwabuotogina 'ana 'atagiega i miabui i miamia. 2 Basenadiotoga me Isileli Vadavada Tabutabuna i 'idewai 'aisaya bunudiega, we'e abame tamu vanuga 'eba 'odu i 'eno-vagata, taunina 'Auvea 'ana 'a'aiyogona. Vadavada Tabutabuna abame, Yaubada yana vanuga mogitana, nageneye yada Tovelomu Bwaikina Iesu i folofolova faifaida.
3 Tovelomu bwaikidi 'aitamogana 'aitamogana i venua'ivinedi bega tomotoga yadi nuakalikali i 'a'anivelenedi Yaubada 'waineye wata 'aisaya i nikenikedi i vevelomuyedi 'waineye, tomotoga yadi sakona 'adi nuatavuna faifaina. Begaidi i lubwaineni yada Tovelomu Bwaikina Iesu tamu nani i na 'aniveleneni Yaubada 'waineye. 4 We'e 'ai'edi Iesu i da miamia fwayefwayeye, 'ako kebu i da ve-tovelomuga, fai veimea i mai Mosese 'wainega Livai 'ana wauma 'aisedi i tauyedi i na ve-tovelomu 'adi veimea bani'odi. 5 Sou 25:40Tovelomu i lukuluku i 'odu'odu Vadavada Tabutabuna 'waineye siwe naninina Yaubada yana 'eba mia abame 'anununa. 'Ana 'isa'isa, fai tutuyanina Moses i 'idewadewa bega i na velamu Vadavada Tabutabuna i na yogoni, Yaubada i awave'ede'edeni i vo,
I lubwainemu 'u na 'a'aiyogonaga nuanuaku vanuganina basenadi 'oyeye a vemuga,
'ana 'isa'isa matatabuna 'u na vetutuyameni.”
6 We'e tutuya de'e tovelomu yadi folova Yaubada i 'aniveleneni yada Tovelomu Bwaikina Iesu 'waineye, yana folova bwaikaotogina tovelomu basenadi yadi folova kebu taiadi i da vesalaga. Yaubada yana Veakutagona 'Ivauna Iesu i 'idewai tomotoga 'waideye 'atumaiotogina, fai Veakutagonanina i souyeni Yaubada yana vona'awaufaufa 'atumaiotogidi 'waidiega, kebu bani'odi yana Veakutagona Kumekumetana 'ana vona'awaufaufa.
Yaubada i vona'awaufaufa Veakutagona 'Ivauna i na 'idewai
7 Veakutagonanina Kumekumetana Mosese i 'idewaiga, 'ai'edi 'atumai'avanaga 'ako kebu tamu Iesu i da 'idewai. 8 Iel 31:31-34Siwe Yaubada yana tomotoga i awavesakoyedi i vo,
Yau 'Auvea a vona.
Tutuya i mimai 'waineye,
yaku Veakutagona 'Ivauna a na 'idewai me Isileli wata me Iuda 'waidie.
9 Yaku Veakutagonanina 'Ivauna
kebu bani'odi Veakutagona Kumekumetana a 'idewaiga tubudiavo 'waidie.
Tutuyanina tubudiavo nimadie a 'abi a 'edakumesedi a miedi Itifita 'wainega,
bei yaku Veakutagona a 'idewai 'waidie.
Siwe yaku veakutagonanina i vedumwe'ai'aieni
begaidi a bailedi.”
10 Wata 'Auvea i vona i vo,
Tutuya i mimai 'waineye yaku Veakutagona 'Ivauna a na 'idewai me Isileli 'waidie.
Veakutagonanina side bani'odi.
Yaku veimea a na yatodi yadi nuanua 'waidie bega ava'ai nuanuaku i na 'idewadiga, i na 'asetadi.
Wata nuadie a na kilumidi bega i na nuakalikaliedi.
We'e yau yadi Yaubada,
taunidi yaku tomotoga.
11 Kebu tamu aitoi iana 'alo enavo 'ifwaidi i na vonedi i na vo, 'Auvea Yaubada 'wa da 'asetai,’
fai tomotoga matatabudi 'akonadi i na 'asetaku,
tomotoga siaidi wata bwaikidi.
12 Yadi vekali faifaidi a na 'isanuakalikaliedi,
we'e yadi sakona kebu wata a na nuanuanidiga.”
13 Fai Yaubada yana veakutagonanina i goleni Veakutagona 'Ivauna, ma'itufa Veakutagona Kumekumetana i venani-'avo'avovo. Fai 'akonadi i vetuatuai wata i venani-'avo'avovo sai'afootoga i na 'a'ava.