4
Bwasa Ludi i nagidi
1 'Aiatanina 'waineye, Bwasa i nago 'atamana bwaikina 'ana 'awa 'eba luku 'waineye i miabui i miamia. Nika tomogo kumanina Ludi yadi 'aila'a taiadi 'adi tove'isabodaboda i 'iseni i le'wa i nunago i goleni i vo, Iaku 'u mai, nuanuaku taiadi ta na veifufu.” Bega i nago 'waineye miabui. 2 Mulieta Bwasa to'edakumeta ma 'adi ve'ililibu 'adi 10 i goledi i nagoi 'waineye i vonedi i vo, I ma 'ana veveifufu we'e 'omi 'wa na vavainenega yami awavemogitana faifaina.” 3 Bwasa 'adi to'aivaita i voneni i vo, Naomi 'u 'asetadi kumanidi i viladi i mai Moabe 'wainega, nuanuadi yadi 'aila'a Elimeleki yana fwayafwaya i na vekimwaneyeni. 4 Naninina faifaina a vevenua'ivina, nuanuaku a na veifufuyeni 'waimuye 'u na vinenegeni. 'Ai'edi nuanuamu fwayafwaya, side tomotoganidi matadie 'u na kimwanei. We'e 'ai'edi kebu nuanuamu, 'u na lu'ivona tonovina 'waikuye. Fai yau a lulukamata nuanuaku wata a na tutuveobuya. Bega iana i sosoana i vo, 'Atumaina nuanuaku a na kimwanei.”
5 Nika Bwasa i voneni i vo, 'Aiatanina 'waineye fwayafwaya 'u na kimwanei Naomi 'waidiega, wata Ludi vavine Moabe 'wabu'wabulidi 'u na nagidi yamu vavine, bega i na venatuna tomogo kumekumetana 'ana wagava 'inana faifaina wata yana fwayafwaya i na veveimeyeni.”
6 Tutuyanina iana yana veifufu i noganogai, i voneni i vo, Iaku yau kebu i da lubwaineku a na tuveobudi. Fai 'awaie fwayafwayanina kebu yaku 'eba veimea, taunimu 'u na tuveobudi, yau 'asa'aiadi.
7 Tutuya basenadi me Isileli yadi sauluva side bani'odi. 'Ai'edi aitoi nuanuana 'ana veuveuta i na 'aniveleneni tamu iana 'waineye, 'ana 'ageyafayafa i na ta'ia i na 'aniveleneni tomogonina 'waineye. De'e 'anivelenanina 'wainega yadi veimea i na kiavetoketokei 'aila'a matadie.” 8 Tamu 'adi to'isave'avina Bwasa i voneni i vo, Taunimu 'u na kimwanei, mulieta 'ana 'ageyafayafa 'agenega i ta'ia.”
9 Bega Bwasa i veifufu to'edakumeta 'au'auveadi wata 'aila'a i tovifififineniga 'waidie i vo, 'Omi 'aku toawavemogitana, fai matamie Naomi 'waidiega, Elimeleki, Maloni wata Kilioni yadi kukua matatabuna a kimwanedi. 10 Wata fwayafwaya 'ana tutula 'waineye, Ludi vavine Moabe Maloni 'wabulina taiadi a 'ewadi yaku vavine. Fai 'waidiega kwamana iavetana i na tubuga, bega vovodie 'ana wagava wata yana kukua matatabuna 'atamana de'e 'waineye i na veveimeyedi.”'Omi matatabumi 'wa 'ise'isekuga, 'aku toawavemogitana.
11 Tomotoga wata to'edakumetavo 'awa 'ana 'eba luku 'waineye i tovotovoiga matatabudi i vo, 'Ima yadi nagi 'ana toawavemogitana. Begaidi vavinenidi 'u na nagidiga, 'Auvea i da vevesauluva 'atumaina vavinenidi i mimaiga yamu vanuge, bani'odi Litieli wata Lea 'waidie. Bega vavinenidi 'waidiega wauma Isileli 'ana 'aila'a i vebwaika. We'e 'omu, 'u da ve'ai'aiwabu 'atamana Efaletia 'waineye wata 'amu wagava i da vebwaika 'atamana Bedeliema 'waineye. 12 'Auvea i da vesauluva 'atumaina 'waimuye, bega vavine tubuvauvaudi 'waidiega, tubumwavo 'adi 'aila'a i da vefue, bani'odi Felisi 'ana 'aila'a, kumanina Temali wata Iuda natudi.”
13 Bega Bwasa Ludi i vagavaidi i nawedi yana vanuge yana vavine. Tutuyanina taiadi i veluaga, bega'Auvea i tauyedi i na veinainage, nika mogitana i miana natudi iavetana i tubuga. 14 Tutuyanina 'waineye, 'atamana bwaikina 'ana vevinevo Naomi i vonedi i vo, 'Auvea ta na subiai fai kwamananina i velemiga, yami 'aila'a 'ana to'isave'avina. Wata 'ana wagava i na vebwaika 'awalawa Isileli matatabuna nageneye. 15 Kwamananina 'wainega yami mia i na luve'ivauya wata tutuyanina 'wa na vemo'aiga, kumanina 'ami to'aivaita mogitana. Fai taunina lawami natudi, 'ami tonuakalikali i na ve sauluva 'atumaina 'waimie, mulieta natumiavo 'adi 7 sai'afo.”
16 Naomi kwamana i 'ewai i 'avalamaigi, i nuakalikalieni mogitana 'wa da vo taunidi natudi. 17 Vevine 'adi mialatu i vona i vo, Be'ama Naomi natudi iavetana i veluagai!” Bega kwamananina i goleni Obedi, tamana 'ana wagava Iese we'e Iese natuna Deivida.
18 Felesi tubunavo yadi tubuga side bani'odi.
Felesi natuna Esiloni,
19 Esiloni natuna
Lami,
we'e Lami natuna Aminadaba,
20 Aminadaba natuna Nasoni,
we'e Nasoni natuna Salimoni,
21 Salimoni natuna Bwasa,
we'e Bwasa natuna Obedi,
22 Obedi natuna Iese,
Iese natuna Devida.