Hibrudan
Hibrudan Yi Kerek
Wongkoonman
Wongkoonman kuu yaningko kerek kemaom wongkindo. Kuristen korok maa Teetulian weeb AD 200 areb ande wongkoon kuu Baanabasbed kerek kee wongkoon. Kumban kibikee karub yenambed Apolosbed wongkoon andaiwe, yenambed Sailasbed wongkoon andimaib. Kumban yi korem kuu wongkoonman kuu God ye inamen yaambed wongkoon andimaib.
Kerek Kee Komo Dowad Wongkoon
Wongkoonman kuu Yuuman Yesu yaa anam andoon, ye kuu Yuudan anam andiwen kuyaa wongkoon. Yesu kuu Yuudan yi inameniib amowamowiib amob wengiib kurikuri kiwaaniib korem burudande aningko darewoob arimbed keroon ande korokboon, kerek kemaom kuu. Kwane, Buk Andowoonbed wene Buk Malakai kuye profesi weng kuu Yesu ye dowad korokbe dakmeen kuyaa wongkoonmanbed ande korokboon. Kowe, Moses o engyus o karub maa yaamban, Yesu yaamo meenmembirime anded. Kwane, wongkoonmanbed ande korokboon kuu Yesu kuu God dore nub dore wedyiri dobiri ye karub aningko darewoowiib, Eeron arebban, God dore Yuudan dore wedyiri dobiridan arebban. Wongkoon ye weeb kuu AD 68 areb.
Korok Weng
1. Andowi Weng: God Ye Amob Yeeb Ongmoonman Yesu Kuu Aningko Darewoob Arimbed (1:1-4)
2. Yesu Keresu Kuu Aningko Darewoob Arimbed, Kurin Ye Yuudan Yi Korok Korok Arebban (1:5—7:28)
3. Yesu Keresu Kuu God Dore Nub Dore Wedyiri Dobiri Ye Karub Darewoob Arimbed, God Dore Yuudan Dore Wedyiri Dobiridan Arebban (sapta 8—10)
4. Anam Andi Yaambed Kangdommo Doberembirime Andi Ye Weng (sapta 11—12)
5. Anam Andi Yaambed Dobiri Kerekmen Yaa Ambobandi Ye Weng (13:1-19)
6. Yeenbon Amun Kerundi Weng (13:20-25)
1
Engyumban Mingkimbed Aningko Darewoob
1 Kurin yiri kuu Godbed nub awoya yaa profesidan yaambed aron yemoon kuu kiwaan yemoonbed daandemboroon. 2 Kumban kibik aron yeenbon kee, ye Dana Mingki yaambed nub yaa daandoon. Kwane, ye kuu Godbed kumkam korem yaa kangkoman keruni ye dowad kine kowoon. Kwanekore, ye yaambed Godbed kumkam korem kuu ongmenaboon. 3 Mingki kuu God ye nambiri kuu dianmo keroon. Ye kuu ye Ambe ye inamen meeni korem areb ibmo doboroon. Ye weng aromkonoyiib kumbed kumkam korem angkeen. Kwane, ambarakmi aari ye kiwaan kuu ambangke dowan kerekore, Ewen ari daane Aningko Arimbed Ye God ye dingki wiwi angkambed dibeen. 4 Kowe, Godbed kine kowoon yaningko Mingkimbed awinoon kuu engyu yi aningko burudandoon arimbed areb, Mingki kuu arimbed, engyu arebban. 5 Kedi, engyu kane yaa Godbed ma kwane yedmoon,
“Eb kuu ne Dana,
kibikee ne kuu eb Ambe keraan.” andoon? Dowan!
O, engyu kane yaa Godbed ma kwane yedmoon,
“Ne kuu ye Ambe keraniine,
ye kuu ne Dana keraneen.” andoon? Dowan!
6 Kwane angkon Godbed ye wonobdana okad yiri nenkowe yedmoon,
“Engyu korem kuu ye yaa bumangke yaningko kankoonime.” andoon.
7 Engyu yi dowad daande yedmoon kuu,
“Ye engyu ongmendaane nuub areb kerimaib,
ye demedan kee ongmendaane amot yumbu areb kerimaib.” andoon.
8 Kumban ye Dana Mingki ye dowad yedmoon kuu,
“O God, eb oonimbon kuu aron korem korem kwane angkimberembaranuun,
eb ambibkin aom kuu yorokmo ye aromkonombed oonaneeb.
9 Yorokmo dobiri yaa dowakenmo kerewen, kumban inamen arewa yaa arud wandemberewen.
Kwanikob, God, eb Godbed eb korok ari kubi yeman olif ambod ye oiyo bune kinoon kumbed,
eb nendene eb angkodmia burudande ari nenkowoon.” andoon.
10 Kwane yedmoon kuu,
“O Yariman, yimin andowoon yiri okad ye ambokab ongmeneb,
ambid kuu eb dingkimbed ambangkewen.
11 Yi kuu dowan keraniib kumban eb kuu kwane doberembaraneeb.
Kwane, yi kuu ebkad areb korob kere biringke dowan keraniib.
12 Yi kuu yuruk ebkad doboob areb bedmaneeb.
Yi kuu ebkad biande ebkad yeeb ben deebendemoon areb keraniib.
Kumban eb kuu doreebmo kwane dobaraneeb,
kwane eb weeb kuu yimin wandaunban.” andoon.
13 Engyu kane yaa Godbed ma kwane yedmoon,
“Ne dingki wiwi angka diberebko,
kwane wene nembed eb bondan kuu beni
eb yondad dabderem yiri kiriba.” andoon? Dowan, Mingki yaamo.
14 Engyu korem kuu awandi ye awad Godbed ben nongkobekore, bobni yaa burudande bindaneene yumbon kandaniibdan yaa awandime ande yedmoon dee? Anamaa.