Yook 7
Dewid ye sigaiyon ye yook, Yariman yaa wingkoon, Benjaminman Kus ye dowad.
1 O Yariman ne God, ebbed kukbimaabbon aombed dobirimain kowe,
ne nen kane kanembed nenmo yariibdan yi dingki ari kowaab, yi yaa kuu ne nen burudande obon keruwe.
2 Ne nen burudande obon keruwaabban kuu, yi kuu ne yaa laiyonbed aye worobe kurubkurub keremoon areb kamaniib,
kwane ne nen wananiib kuu karub maambed ne nen yi yaa burudande obon keruwaanban.
3 O Yariman ne God, ne kuu komo kamaan?
Ne dingki aom kuu ambarakmiyiib dee?
4 Ne angkodmi nende ye bondan yaa kondaan dee?
Ne yaa manmo keroonman kuu idiibban kumbed anbande ye yiribman yid baan dee? Dowan!
5 Kwane ambarakmako wedmebka, korondebko ne bondanbed nenmo menenib awinewe nendime,
kwane korondebko ne wadkeri monmarenib
ne id kan okad kuri keende winime. Selah
6 O Yariman, eb norin yaambed yaro dembe.
Ne bondanbed norin wandiwen yaa kuu ebbed yaro dore kebene.
Ne God, ebbed kwane ne dowad yaro dembe. Eb kuu wengyundi yaron kowewen.
7 Kwane, ambibkindan korem nedbiwen kuu ewiib yaa menebe awanewandime.
Ewen arimbed yi yaa oonende.
8 Yarimanbed ambibkindan korem yaa wengyundok.
O Yariman, ne yorokmo dobiriyiib aadidmiyiibbaniib kuyaambed ne yaa wengyundeneb ma ambarakmindo ande.
9 O God yorokmo, eb kuu nimakarub yi inamen aomiib niindem aomiib kuu andangke darobimaab kowe,
arewadan yi kamenabi kuu ben mene dowan kere.
Kwane, yorokmodan kuu ben komombed ma yaanban aom nongkobe.
10 Ne dorondandi ye kombe kuu God,
kaneya yi niindem aom kuu kangdommo kuu yembed ben burudande obonmo kerundimaan.
11 God kuu yorokmo wengyundi ye karub,
ye kuu aron mimim korem arud wandimaan ye God.
12 Arewadan kuu amonombaibban keraniib kuu,
Godbed ye kerewang kande deedmene,
ye anangkab kande nikbe yekbad uunaneen.
13 Kwane, kabonman ye kumana anaya kuu nekwoon,
kwane ye ana yumbuyiib kuu ben ware boknoon.
14 Arewaman kuu inamen arewa meendobene,
yena yaa dabab kondi ye inamen kowene birandimaan.
15 Yembed dem ongme kwane nidke ben angka kiranmimaan kumban,
yeka dem ongmoon kuyaom kombirimaan.
16 Dabab kondi ye inamen kowimaan kuu ika ye ari menebimaan,
kwane ye monmari ye inamen kowimaan kuu yeka yemeren monmarimaan.
17 Yariman kuu yorokmo ambangkimaan kowe ye yaa eso andeni,
Korem Burudandoon Arimbed Ye Yariman yaa aningko kankooni ye yook wingkaan.