Yook 18
Yook ambo bi ye karub yeman. Yariman ye dememan Dewidbed wongkoon. Yarimanbed Dewid ye bondan koremiib Sooliib yaambed ye nen burudande angka kowoon kumbed keye yook wingkoon, Yariman yaa.
1 O Yariman, eb kuu ne aromkono, eb yaa mimyob dowaken keebdaan.
2 Yariman kuu ne aromkonombon, ye kuu ne aromne angkumonimbon, ye kuu arud barang yaambed ne nen burudande angka kowi ye karub.
Ne God kuu ne aromkonombon, yembed kukbimaanbon aombed dobirimain.
Ye kuu ne kombe, ye kuu bobni yaa ne nen burudande bindi yaromkono, ye kuu ne dorondarimbon.
3 Yariman kuu amunmo kowe yaningko kankooni kuu yimin.
Ne kuu ye yaa baandimain kowe,
ne bondan yaa ne nen burudande angka kowimaan.
4 Bobni ye kibin abakbed ne kuu yerengkoon,
kwane monmari ye barang kuu urok yuknemoon areb ne burudandoon.
5 Bobkonombon ye kibin abakbed ne yaa kanawanewawoon,
kwane bobni ye warabbed ne kebenewoon.
6 Ne mimyob wande miin yiminban keraan kumbed Yariman yaa baandaan,
kwane ne God yaa awawok ande komkaan.
Kwane, ye kurikuri ambib aombed ne weng kuu wengamboroon,
ne baandi kuu wene ye kerendem aom aomnoon.
7 Okad kuu binangkiyiib dowodkiyiib keruune,
aangko angkumonimbon kuu ben kiringmeen.
Yi binangkiwen kuu Godbed norin wandoon kowe.
8 Amareng kuu ye kiringkono dembed dembenaboon,
kwane dene dowan keri ye amoyiib amoyidkowiib kuu
ye mongkodembed dembenaboon.
9 Ye kuu ambid birinde kan yone yiri kamonoon,
kwane ye yon dad dabderem yiri kuu wiib kumun miriknimbonmo.
10 Ye kuu engyu burawiib arimbed dibere wanwonoon,
kwane ye kuu nuub arimbed wanwonoon.
11 Ye kuu kumun kande ye dabuni yeman kerundoon,
ye dabuni yeman kuu ambid ye amokambid.
12 Ye kerebiri ye nambirimbon kumaombed wiib yeeduruune
am boyareb yurukmo kuyiib amoyidkowiib angkadereboon.
13 Yariman kuu Ewen arimbed nambad areb baandoon,
kwane Korem Burudandoon Arimbed ye God ye weng yuud kuu derendaroon.
14 Ye ana barandoona bondan kuu kirokmone buyokbayok keriwen,
kwane imak aande yenbandoona kirokmone dawariwen.
15 O Yariman, eweng kamkono ongkandewen,
kwane eb kiringkono dem aombed inum nareewa yeedereboon kumbed
karamok niindem yiri kankubunimbon kuu dokmenmo kereene,
kwane okad yu angkumonimbon kwangkon dokmenmo kereen.
16 Ye kuu ari kaimbed yiri yirene arudbon aombed ne nendoon,
ne kuu ok niindem yirimbed nen wandune kowoon kui.
17 Yembed ne bonman aromkono darewoowiib yaa nen burudande angka kowoon,
ne bondan aromkonoyiib ne arebban kuyaa kui.
18 Ne kuu dabab aom aomnaan kumbed yimbed nenbandande miniwen,
kumban Yarimanbed yone awawoon.
19 Arudbon aom kuu yembed ne awawe nen angka kowoon,
ye kuu ne yaa dowaken keewoon kowe nen burudande kowoon.
20 Yarimanbed ne yorokmo kaimain yaambed amun keruwoon,
kwane ne kuu darobe wedmoonka koromiibban dobman kowe ne yaa kakman amun keewoon.
21 Amborom kuu ne kuu Yariman ye kiwaan arimo winimain,
ne kuu ne God yaa ma amonombe koronde winindo kowe arewa kamindo.
22 Yembed dakmenaboon ye amob korem kuu ne wedmoni awine kandaan,
kwane yembed wongkanaboon ye amob kuu ne ma wengamberedandindo.
23 Ye yekaad ne kuu karub maambed ambarakmoon ande kadwonimokban,
kwane ne kuu ambarakmi yaa kangkadmimain.
24 Yarimanbed ne yorokmo kaimain yaambed kakman amun kawoon,
ye indob arimbed ne ma ambarakmindo kuyaambed kui.
25 O God, kane kane yi kuu eb yaa ma korondiyiibban doriib kuu ebbed yi yaa ma korondiyiibban ye dobiri kiwaan kuu korokbendimaab,
kwane kane kane kuu karub maambed ambarakmoon ande kadwonokban kuu eb karub maambed ambarakmoon ande kadwonaanban ye kiwaan kuu yi yaa korokbendimaab,
26 kwane kane kane kuu karadmo doriib kuu eb karadmo dobiri ye kiwaan yi yaa korokbendimaab,
kumban unitabdan yaa kuu eb kuu inamen kan bikniwen yaa darobi ye karub korokbendimaab.
27 Kane kane yika kan kubunimaib kuu ebbed ben burudande obon kerundimaab,
kumban kane kane kerengkan kamimaib kuu ebbed ben yiri kubunimaab.
28 Eb kuu ne kiwaan yurimaab,
o Yariman ne God, eb kuu kumun aom doriin kuu kan amonombe nambiri kerimaab.
29 Eb aromkonombed kawaneewa bondan yemoon kuu yeene burudandaniin kuu yimin,
kwane ne Godbed neyiib yaa doreen kuu aromnewaneena yi aromne angkumonimbon korongberenande aomnaniin kuu yimin.
30 Ma, God kee ye kiwaan kuu demkoronmo,
Yariman ye weng kuu karadmo.
Kane kane kuu ye kukbimaanbon aombed dobirimaib kuu,
ye kuu yi kombe keroon.
31 Kedi, kane kuu God? Yariman yembedmo!
Kane kuu yone aromnimbon? Nub God yembedmo!
32 Ne yaa aromkono kawi ye karub kuu God,
kwane yembed ne dobiri ye kiwaan kuu demkoronmo ongmimaan.
33 Ye kuu ne yon kuu diiya ye yon areb ongmimaan,
kwane ye kuu ne ongmaane aangko arimbed yarebimain, kombirimokban.
34 Yembed ana nangmi dowad kedmengkawimaan,
kowe ne dingki kuu anangkab aromkono kuu nikbimain.
35 Ebbed ne nen burudande angka kowi kuu kombe areb, ebbed ne nen dorondandimaab,
kwane eb dingki wiwimbed ne awawaawe yiminmo dobirimain.
Eb kuro yiri ambokibine awawewen kumbed aningko darewoowiib keraan.
36 Kiwaan ari wanaan kuu ebbed yirimbonmo ongmimaab,
kowe ne kuu kombirimokban.
37 Ne bondan kuu nembed yondem kerenden wene burudande awingkandaan.
Ne kuu yinmone korondindo, yi monmaraan kumbed ika manaan.
38 Nembed yi yeene beengkaan kowe,
yi kuu yaro dembindeban keriwen,
kwane yi kuu ne yon dad dabderem aom kirobiwen.
39 Ana nangmi dowad ebbed aromkono ne yaa kawewen,
kwane ebbed ne bondan ben ne yon yiri nongkobeewe ne yaa bumangkiwen.
40 Ebbed ne bondan ben amonombeewe kirokmoniiwe
yeene monmaraan.
41 Yi kuu awandi dowad baandiwen kumban karub maa kanembed yi kuu ma ben burudande awandindo,
kwane Yariman yaa baandiwen kumban ye kuu yi yaa ma awandindo dowan.
42 Nembed yi kuu dore yon dowood dararaana ingkud nuubbed wuruwemoon areb keriwen,
kwane nembed yi kuu ben kubudaraane birin kiwaan ari dore boknemoon areb keriwen.
43 Karubbed ne nande kamiwen kuu ebbed ne nen burudande angka kowewen.
Ebbed ne kuu ambibkin maa maa yi korok nen kinewen,
kwane nimakarub yi ne ma nekaadkerundindo kuu ne dabderem yiri doriib.
44 Yi kuu ne yaa wengambirimaib kuu no awine kandimaib,
kwane owoddan kuu ne yaa unewe ika anuk irinambenimaib.
45 Yi arudkono kuu dowan kerimaib,
kwane yi kuu yi aromne angkumonimbon yaambed neyiib yaa kiringmiyiib minimaib.
46 Yariman kuu doreen kii! Ne yaa yone aromni ye God yaningko kankoonem!
Ne nen bobni yaa burudande bindi ye God yaningko kankoonem!
47 Ye kuu ne bondan yaa kakman kondimaan ye God,
kwane ye kuu ambibkin maa maa ben ne dabderem yiri nongkobimaan ye God,
48 kwane ye kuu ne bondan yaambed ne nen burudande angka kowimaan ye God.
Eb kuu ne bondan yaambed ne nen burudande aningko darewoob arimbed kawewen,
kwane eb kuu yeremboromdan yaambed ne nen burudande angka kowewen.
49 Kwamunewen kowe, o Yariman, ambibkin korem aom kuu eb yaa kubebdaniin,
kwane ewaningko kankoone wingkaniin.
50 Godbed king kerunoon ye karub yaa burudande dori arimbed bangkanoon,
kwane ye kuu yembed kinoonman yaa womoniyiibban ye mimyob dowaken keenimaan,
Dewid yoom ye awoya ari yoom yaa aron korem keendimaan kui.