Yook 22
Yook ambo bi ye karub yeman. “Amkimo Ye Diiya Yingki” ye yook ye kiwaan yaambed wingki yeman. Dewid ye yook.
1 Ne God, ne God, eb kuu komande domowewen?
Komande ambab kerewen kumbed dabab ne yaa monoon kuyaa kuu ne nen burudande angka kowaabban?
Komande ambab kerewen kumbed wareki kaimain kuu wengambirimokban kerewen?
2 O ne God, aronkimbed eb yaa baandembaraan kumbed ebbed inanduwindo,
amnoom kangkon eb yaa baandembaraan, ma iwari kerindo.
3 Kuned eb kuu king ye dibirimbon arimbed dibere karadmoman kerewen,
kwane ewaningko kuu Israeldanbed kankoonimaib.
4 Nub awoya kuu eb yaamo angkumone dobiriwen,
kwane angkumone dobiriwen kumbed arud ye barang yaa ben burudande angka nongkobewen.
5 Eb yaa baandiwen kumbed arud ye barang yaa ben burudande angka nongkobewen,
kwane eb yaamo angkumone dobiriwen kowe ebbed kwananeeb ande meedmiwen kuu anam id keroon.
6 Kumban ne kuu karubban wodam,
nimakarub korembed kan angka karenib arewa anduwimaib.
7 Kane kane ne yaa wedmewimaib yi korem kuu ambonbaawimaib,
kwane yi kuu damangkawe yi korok waaburukme yedmimaib,
8 “Ye kuu Yariman yaambed angkumone doreen kowe,
korondubko Yarimanbed arud ye barang yaa nen burudande angka kowok.
Ye kuu Yariman yaa kwane kubenoon kowe,
korondubko Yarimanbed arud ye barang yaa nen burudande angka kowok.” andimaib.
9 Kuned ebbed ne kuu ena yu kabeyob aombed nen angkaderewen,
kwane ena yu muk aniin yaa kuu
ebbed ne kuu eb yaambed angkumone dobiri yeman ongmewewen.
10 Woonaan yirimbed ne kuu eb yaambed yone dobaraan,
kwane ena yu kabeyob kumaombed eb kuu ne God kerewen.
11 Ne yaa ambab keraab,
amborom kuu dabab manandamoon kumban
karub maambed ma awawaanban kowe.
12 Ne bondan kuu ne yaa awanewandiwen,
yi kuu Basan ye buromakau ambi arudiib areb ne yaa kanawanewandiwen.
13 Yi kuu laiyonbed dingkan anande kabang angke yaremoon areb,
ne yaa yi mongkodkono danduwimaib.
14 Naromkono dowan, ok kan ondukne wenebe dowan keremoon areb keraan,
kwane ne kono ingkanaboon kuu wadmenaboon.
Ne mimyob kuu koronde in areb yawaak keroon,
kwane koronde okmo keremoon areb keroon.
15 Naromkono kuu dowan, yongkonbon areb keroon,
kwane ne ong kuu mongkodkono yaa karangkoon.
Ebbed ne kuu bobnok ande okad yiri kowewen.
16 Ne bondanbed anon arewa areb ne yaa awanewandiwen,
kwane yi kuu arewa kamidan yemoon, ne yaa kanawanewandiwen,
kwane yimbed ne dingkia yona kuu kaare dem nabangkenabiwen.
17 Ne kono korem kuu nembed kimingki kuu yimin,* Ye bondanbed ye nen angkara angkara bingiwen kumbed kamune keroon.
nimakarub kuu ne yaa nengmowenib ningkirud kamewimaib.
18 Yimbed nebkad kande yikareb kuyaom nekwiwen,
kwane bot yaa aningkoyiib kuu kirare ebkad mimo karub mimombed kandimo kandimo kamiwen.
19 Kumban, o Yariman, eb kuu ne yaa ambab keraab,
o ne Aromkonoman, kirod mene awawe.
20 Kerewang ye arud yaa ne wadkeri kuu nen angka kowe.
Ne wadkeri kuu dowakeniib keraan kowe, ne bondan anon arewa areb yi aromkono yaa kuu ne nen angka kowe.
21 Laiyon yi mongkodkono aom kuu ne nen angka kowe.
Kwane, oksen kiib yi durub yaa kuu ne nen angka kowe.
22 Nembed ewaningko kuu ne ambibkindan yaa daandaniin,
kwane ne kuu nedbimaibdan kumaombed ewaningko kankoonaniin.
23 Yariman yaa unimaibdan, yiib kuu ye aningko kankoonime!
Yekob yawoya korem, yiib kuu ye yaa nambiri konime!
Israeldan korem, yiib kuu ye yaa bumangkime!
24 Amborom kuu kane kane durud yewed kandiwen kuu
yembed yi yaa ma arewa ande wunekarindo.
Ye kuu yi yaa ye murubia kan yeknindo,
ma nub yaa awande ande baandiwen ye weng kuu yembed wengamboroon.
25 Ebbed ne niindem aom kubi kerunaneewe kadaareb nedbiwen aom ewaningko kankoonaniin.
Eb yaa bumangkiwendan yi arinambo arimbed kwananiin ande amob ongmaan ye weng kuu anammo kwane keraniin.
26 Kamboknondan kuu ane mikmonaniib.
Kane kane Yariman ande onmimaib kuu ye aningko kankoonaniib.
Kubi dowaken kuu yiib niindem aom aron korem angkimborok!
27 Bid yimin yimin koremdan kuu Yariman yaa ika meene ye yaa amonombaniib.
Ambibkin mimim koremdan kuu ye yaa bumangkaniib.
28 Ooni yaromkono kuu Yariman yeman,
kwane yembed ambibkindan oonendimaan.
29 Okad kiri yiribman yemoondan kuu orok anenib ye yaa kurikuri kamaniib,
duknaniibdan korem kuu ye yaa bumangkaniib,
yika yi wadkeri ma amuknindebandan kui.
30 Nimakarub amaan ari dobaraniibdan kuu ye yaambed awine dobaraniib,
kwane amaan ari dobaraniibdan yaa kuu Yariman ye dowad dakmaniib.
31 Yi kuu ye yorokmo kerekmen ye dowad
mokaid woonindodan yaa dakmaniib,
yembed kwanoon ye weng dakmaniib.