1 Yesu Kerisoma ewa owawa bukaro sina we ma boroyarebi. Godi Danu ununa i sina Danu gaukara ueta uwaraba we ma borobafie iba i sina Yesuba wei. Godi Danu ununa ane ane sau fafisu ememetu iba iwata ufitae iba Danu sina Yesuba wei. Dana eno weiro Yesu Kerisoma Danu aneru siaia uiro i aneruma Yesu Kerisonu gaukara ueta amara Jonibai anite i sina nesia wei. 2 Na Joni, nana i ueta nesia ere me sirete Godinu sina nesia we ma wabararo uete Yesu Kerisonu we ma boroyari ba sina eno we. 3 Anama ewa buka yawifisuna yaru ufisu. Ana anama Godinu fafisu ememetu sina naufitate ewa owawa bukanu sina enanari ufitaitana yaru ufitaita. Nauawe! I dubu kowa fafie baworo ufisuna i dubu ememetu ido sau fafisu.

4-6 Na Joni, nanu sina ya Eisia orofaro dubu su seweni (7) ibinita uwaraba owawa ue odatane. Nanu ununa Godi Dana boderewere ibebe awonaini daido ibinu, nono duburo fafisu, Dawaini Dana i urero dera yaubetabai ibinu Amara, Dawana Godinu botai uietaroma uyari Amara, Dawana i orofa atata yawoeta dera uwaranu yawoeta dera kofiri. Nanu ununa Godini Imumu sewenini Yesuini emana yaba kobererau durua ufitate emanu wesarau ueta yaba mafitae watane. Yesu Keriso Dana ya uwara nesiaba neno arama uteda yaba uiro Danu onono itariba Dana ya nesia yanu siosawere uetabairoma mune aika odi. Dana ya uwara nesia dera yawoeta uwaraini Danu Damama Godinu fuyo ode sina weta uwara we mune odiba Dawabai buna derawereini araeta derawereini me ibene ibene ibifie watane, nanu sina ido.

7 Eforo! Dana i urenu gosoroma ido fafisu. Dana eno fafiro uwara nesia Dawa ure yanae utebita uwara emaini Dawa efitaita. I orofa atata uwara nesia Dawaba ane ane utebitaba imufitate emanu torowa neno ure adireda i webitaita. Dana eno fafisugo, nanu sina ido.

8 I Dera Godima eno wei, Na torowama Nana botairoma dubu, eno wei. I Godi torowama boderewere awonaini daido ibinuba duburona Dawana buna derawere fafisu.

9 Na Joni, nana ya uwara nesianu yaiye. Yaini naini Yesubai taka ue ibinisi, iba awona Yesu Kerisoma ya yawotasuro ewa orofaro ibedana yaini uruama Danu gaukara utaisi. Eno utaisiba emema yaba awe uyaraitaro oferi wouraisite ya nesia inare kimu utaisi. Nana Godinu sina wete Yesu Keriso naba we ma boroyari sina weba na fanisi mateda na mune Fatamosi mutumuturo oitaro ibitara. 10 Nana yanu Dera Waria Amaranu kowaro me ibitararo Godinu Imumu Kotofuma nanu neno ubarero itarite na yawoegou uina mui amarama sina derawere tawuyonu rurua ari nanu dubena afuro weiro naue. 11 I sina eno wei, i erasu nesia enanari bukaro owawa ue odiate siaia uaro i dubu su nesia seweni ibinita uwarabai anibi wei. I Efesaini Simanaini Fegamamuini Taiatairaini Sadusini Firadefiaini Reodisiaini i orofa aika maika dubu su ibinita uwarabai anibi weiya wei.

12 I wate nauete nanu unu owemate emane uete owerete erena goruma ubu ueta ekiwa seweni bububu utebita. 13 I ekiwa yarebita arioro erena eme sini amara ari iro inaibiro ere. Danu yafa wadia yuriro buri nesia dadau ui. Dana goru kafa ari nenoro asugari uite inaibiro ere. 14 Danu kofiri ijina inakeorau, gosonu ina ari, Danu ditina ina bubura ari utebiro ere. 15 Danu burina ario derawere. Ina burasi waita aiyoni ari. Ina derawerero yare fefetebasuro igabuga nesia ibebasuro ba burasi torowa roatarau torowa amutebasuro eme emanu agema ma bisibasa utebaitaro ario derawere utebasu. Danu burina i ari. Danu watena ogo sisifuma itareda webasu i ari. 16 Dana muina seweni Danu banibira agema maibi. Nono mui simeri awe sadei Danu bebeturo ibiro eno bobo wawaro amui. Danu ibo nawatana i kowa otoro ario ari. 17-18 Nana Dawa erete Danu buribai ureiete uieta ari ue. Nana eno uero Dana Danu banibira agema na mameda wei, iya da uya. Nana i botairoma dubu, eno weite wei, Nana i me ibinu Amara. Nana uiete wiroeterogo nono awonaini me ibineba duburona me ibene ibene ibimau ea. Nana i uieta orofaini i uieta uwara nesia yawotatane wei. 19 Dana nono naba wei, enoba i erasu ememetu enanari owawa ue odia. Awona ibinuro erasuini duburo fafisu ememetu nesia owawa ue odia wei. 20 Nono i muina nesia seweni Nanu banibira age afu ibaitaro erinu, i goruma ubu ueta ekiwa erinu, ina kasei sina. I sinanu ubina eno, i muina sewenina eno, i dubu su nesia seweninu aneru. I ekiwa seweninu ubina eno, i ekiwa sewenina i dubu su nesia seweni, Dana naba eno wei.