1 Jon
Jon re kiyi basrasem siglow.
Kiyi late tuma.
God re tame wuri rene yaku newom. Tame, reri sig Jon, re siglow mur basrasem. Gwor siglow Jon re kiyi basrasen God rene omuteke habobem tatame remne lakerebem tame remne newopitim.
Er yabel rane tame rem God Reri Tuma heyar be wesowbem. Rem op webem. Tame remri wuribaike rem yenbo wos habobo, wesomke rem yaper wos nenbo. Rem etop nenbo, et yenbo. Sene rem op webem. Jisas re more tame be tem. Rem wow, eker re tatame remri wuribaiwou labo, rem wesomke nenbokap re be habobo. Rem sene op webem. Tatame remri wesom et God reri kwom be yite. Wuribaikene wowkene etopwou God reri kwomke yite. Opkap, nem yenbo wos wuribaike habobo, yaper wos wesomke nenbo, et tuma bo. Rem etop webem, eker rem God rene omuteke habobem tatame remne yikokobem.
Jon re remri webem tuma nasweite wem, eker re gwor siglow God rene omuteke habobem tatame remne op basrasem. Jisas, God Reri Yen, re more tame sekene temenem, Satan re rene seilaweyem. Nem Jisas rene omuteke habote, nem wule yenbowou nente. Nem agerbo tatame remne pap meten heyar nenbet. Jon re etop basrasem.
Nem tuwke sewurte. Neirke sewurbo tatame rem nemne kap yikokote.
1
(Sapta 1:1—3:10)
Som temente tuma re geinik tem.
1 Nem wowkene Tuma rene kemne basrasbo. Kiyisapewai nelkene nowselkene be temenem, er Tuma re temenem. Nem reri tuma metbem, nemri lek nem rene labem, nem rene let kerebem. 2 Er somsom temente Tuma re more tame tem, nem rene lam, nem tatame remne etop wesoubo. Er somsom temente Tuma, kiyi re Apiy God rekene temenem, sene re more tame tem, nem rene lam. 3 Ekeya. Nemri meten lam wos nem kemne kirkir wesowbo. Kem neremkene bogtene. Nem Apiy Godkene Reri Yen, Jisas Krais, repkene bogtene. 4 Nem nugwape okbop ten boteyate, eker nem kemne gwor tuma basrasbo.
Nem tuwke sewurbet.
5 Gwor tuma nem God Reri Yener eterke metem, nem kemne op wesoubo. God re yabel geikap. Re yenbosubuwai nenbo. Re tektekapke be tetane. Re yaper wos be nenbo. 6 Tektek sewuren yaper wos nenbo tatame rem kap op wete. Nem God rekene bogtene. Op webo tuma et me yikokobo tuma. Op webo tatame rem wule yenbo sekene be sebo. 7 Eter, re tuw. Nem er yabel geike sewuren wule yenbo nente, nem God rene omuteke habobo gesmase remkene nawoha wuriwoukap temente. God Reri Yen reri nepke God re nemne wiyruwbo, nemri nenbo yaper wos aboyei sene be temenbo.
8 Nem kap op wete. Nem yaper wos be nenbo. Op webo tame rem kworer me yikokobo. Tuma sekene et neremkene be tetane. 9 Nemri nenbo yaper wos nem kap beraste. Nem God rene ab heyar weso ute. Re wule yenbo nenbo tame, re webokap, re etop nenbo. Eker, re nemne tuma be wete. Re nemri yaper wos aboyei poten septite, nem tatame yenbo ek tete. 10 God re op webo. Aboyei tatame rem yaper wos nenbo. Nem kap op wete. Nem yaper wos be nenbo. Nem opkap webo tuma nem kirkir op webo. God re tuma yikokobo tame. Op webo tame, God Reri Tuma et remri wuribaike be tetane.