Efesus
Pol re Efesus kwomri tatame remne basrasem siglow.
Kiyi late tuma.
Gwor siglow Pol re basrasem, re Efesus kwomke temenem Jisas rene habobo tatame remne newopitim. Efesus kwom et Turki nowselke tetane. Agerbo kwomri tatame rem Jisas rene habobem, rem gwor siglow kirkir poten labem.
Gwor tuma yenbo Pol re remne basrasem. God re hekna habona wos nenem. Aboyei woskene tatamekene rem Haneyen Jisas eterri kulke tete tetane. (1:10) God re etop wem. Jisas rene habobo tatame rem gesmasekap. Remri Ha wuriketwou, et Apiy God eter. God re Jisas rene habobo tatame remne kenem, rem eterri tatame tem. Jisas re remri yaper nenbem wuleke san reri nepke God rekene kelmenam. Sene re God Reri Wow werasen yam, re rene omuteke habobo tatame remne kwokwos kwokwos kwobo labo, rem wule yenbo ek nenbo. (1:14)
Pol re God reri kik tetane tuma tobo heyar op wesowem. Krais re taresi tame, rene habobo tatame rem reri wesomkap. (4:1-16) Krais re nawo segkap, rene habobo tatame rem akekap. (2:19-22) Krais re tamekap, rene habobo tatame rem reri takap. (5:22-32) Rem reri kulke tetane. Jisas Krais eterke God re tatame remne pap kenakem meten kwobo labo, re remne heyarwai lakerebo. Pol re etop basrasem.
Krais eterke God re nemne tatame ager nenem.
1
(Sapta 1—3)
1 An Pol. God re wemke, an Krais Jisas reri werasen yi tame tetane. Kem God reri tatame Efesus kwomke tetane, an kemne gwor siglow basrasbo. Kem Krais Jisas rekene tetane tatame, kem rene omuteke habon reri wule heyar sebo. 2 Nemri Apiy Godkene Haneyen Jisas Kraiskene, rep kemne pap meten kwobo labet. Rep kemri pap pultebet, kem pap yenbo temente.
Krais eterke God re nemne Hevenri wos yenbo newobo.
3 Nem God rene wese abo. Re neremri Haneyen Jisas Krais eterri God, re eterri Ha mere. Krais eterke re nemne heyarwai nenbo. Eterke re nemne aboyei Hevenri wos yenbo newobo. 4 God re nowsel be nenmenem, re nemne kiyi kenen Krais eterkene tete wem. Opkap nem eterri tatame yenbowai tete. Re nemri wule yaper be wuri late. 5 Kiyisape God re nemne pap meten Jisas Krais eterke nem reri yen tete wem. Re eterri wuribaike metekwasen etop nente habom. 6 God re nemne pap hadebaswai meten kwobo labem, eterri meseke mogulri Yen eterke re nemne heyarwai nenem. Eker nem God rene pir bukre wete.
7 Krais re nemri wule yaperke sam. Reri nepke re God rene kwar pem. Op tem, God re nemri wule yaper poten septim. God reri pap meten kwobo labo wule re sikabe tamewai. 8 Re nemne pap bukrewai metbo. Re nemne purere yenbokene wuribai yenbokene kirkir newobo. 9 Kiyi God re reri wurbaike habomkap, re Krais eterke yaku nente wem, tatame rem be metmenem. Et me berasmenem. Gwopte re reri habomkap nemne heyar peteram. 10 Reri nente wem wos er gwopkap. Eter wete yabelke, Hevenke tetane wos, nowselke tetane wos, Krais reri kulke tete. Krais re aboyei wos taresi tame tete.
11 Kiyi tem wos, yuri tete wos, God eter habon webokap, er wos rem etop tebo. Kiyisape God reri habon wemkap, re Juda tatame nemne kenem, nem Krais eterke God reri tatame tem. 12 Nem Juda, nem temnas yin Krais rene kiyi omuteke habobem. Eker nem God reri kitimenakene reri hadebas wulekene habon rene pir burkre webet.
13 Kem Juda bo tatame, kerem mere, kem God Reri Tuma sekene metem. Er Tuma Yenbo kem metem, kem pow tem. Kem Krais rene omuteke habom, eker God re nente wemkap, re Reri Wow kemne newom, kem reri tatame tem. 14 God Reri Wow re neremkene tetane, eker nem sanetene, God re reri tatame remne newote wem wos, nem potte tetane. God re nemne tupam, eker re nemne potte tetane. Nem etop heyar kowtene, opkap nem God reri kitimenakene reri hadebas wulekene habon rene pir bukre webet.
Pol re God rene wemetem, God re Efesusri tatame remne purere newote.
15 An metem, kem Haneyen Jisas rene omuteke habobo. Kem God reri tatame nugwape remne pap yewobo. 16 An etop metem, an God rene wese som abo. An kemne habon God rekene op namrebo. 17 Nemri Haneyen Jisas Krais eterri God, re Apiy hadebaswai. An rene wemetbo, reri Wow re kemne wuribai purere yenbo newote, opkap kem God reri tetanekap, kem sanete. 18 An wemetbo, re kemri wuribai lisokote. Op nente, re kemne peterabo wos kem heyar late. Re kemne wepoten heyar nente wemkap, re reri tatame remne yenbo wos newote wemkap, kem kirkir heyar sanen kowte. 19 Kem God reri kitimena bukre heyar kirkir sanete. Re reri kitimena bukrek rene omuteke habobo tatame nemne kwobo ek labo. Er kitimena bukrek re yaku sikabewai kiyi op nenem. 20 Re Krais rene wow sene newon rene Hevenke nenewun reri let mame yokwok siruwem. 21 Krais re etek sitene, re aboyei nelri keryen yen, saberawiy tetane tame, kitimenakene tame, taresi tame remne towsikwuntene. Re etemri Keryen Yen bukrewai. Gwopte re etop tetane, yuri mere, re etopwou temente tetane. 22 God re aboyei nugwape wos Krais reri tewo kulke piti wurem. Re Jisas rene lebam, re aboyei woskene rene habobo tatamekene etemri Tare Tame tem. 23 Jisas rene habobo tatame rem Krais eterri wesom. Rem eterke tetane. Rem eterkap tete. Krais eter re God eterkap tetane. Re aboyei woskene tatamekene remne gurerekeiptene.