8
Jisas re God eterri Hevenke tetane Akeri Keryen Tame.
Ari webo tuma reri tobo re gwopkap. God Reri Akeri keryen yen re nemne kwobo labo tame, re gwopkap. Re Hevenke yawum, re Keryen Yen God bukre eterri wolbaye mame yokwok sin kwom panen sitene. God Reri Akeke re yaku nenbo. Et God Eterri Ake sekene. Keryen Yen eter re Ake nenem. More tame rem be nenem.
God Reri Akeri keryen yen rem God rene wos newobo, rene kwar pebo. Jisas re God Reri Akeri keryen yen. Eter mere, re God rene wos newote wem. Re nowselke temente, re God Reri Akeke yaku nenbo tame remri keryen yen be temente. Moses rene newom Wule rem etop nenbo, rem God rene agerbo agerbo wos newobo. Opkap, nem webo, Jisas re nowselke som temente wem, re God Reri Akeke yaku be nente wem. God Reri Akeke yaku nenbo tame, rem gwor nowselke yaku nenbo, rem yaku sekene be nenbo. God Reri Ake sekene et Hevenke tetane, et nowselke be tetane. Kiyi Moses re God Reri ake sipsip weske nente nenem, God re rene op wem. Ne Sainai kwowke temenem, an nene ake heyar nente wule peteramkap, ne etopwou nente. Op wem.
Gwopte Jisas re God Reri Akeke yaku nenbo, reri nenbo yaku et Reri Akeke yaku nenbo tame remri yaku teitkwunbo. Re borborke tetane tame, re yuri natobom tuma yeno heyar nenbo, er tuma re kitimenakene. Opkap er tuma re kiyiri tuma teitkwunem. Agerke natobom tuma re kiyiri tuma teitkwunem. Tuma ager re tatame remne wos newote webo. Er tuma re kiyiri wos newote wem tuma rene teitkwunem.
God reri agerke natobom tuma re kiyiri tuma teitkwunbo.
God re Moses rene kiyi newom Wule re kelpe emik be yite wem, God re Krais eterke nemne agerbo wule kena sene be newote wem. Tatame rem er wule nenlaweyem, God re remne op wem.
Keryen Yen re op webo.
Metye. Yuri tete yabelke,
an Israel tatame
remkene tuma ager
natebote tetane.
Juda tame beigri tatame
remkene an etop nente
tetane.
Ari remne wete tuma
et remri yeiwarege
remkene kiyi natebom
tumakap bo.
Ha rem yen remne let tobo
keren yibokap, remri
yeiwarege an remne panen
Isip nowsel mesegenen
etopkap yam.
Remne panen yam yabelke
an remkene tuma natebom.
Er tuma rem be nenem.
Rem ari wule biragiyem,
opkap an remne sene be
lakerem. Keryen Yen re
etop webo.
10 Keryen Yen re sene op wem.
Sene an gwopkap tuma
Israel tatame remkene
natebote.
Yuri tete yabelke an remne
gwop nente.
Ari wule an remri
wuribaike raste, ari wule
an remri papke basraste.
An etemri Keryen Yen God
tete, rem areri tatame tete.
11 Yike agerbo tame rene tuma
be peiken op wete. Ne
Keryen Yen rene mette.
Aboyei rem anne mette. Sig
bukre tetane tamekene sig
be tetane tamekene
rem anne aboyei mettene.
12 An remne pap meten
remri yaper nen wos poten
septite, remne yaper sein be
nente.
Remri nenem yaper wos an
aboyei serte tetane. Keryen
Yen re etop webo.
13 God re agerbo tuma ager remkene natebom, eker kiyiri tuma mesegenen re magel tayem. Be wos et kiyiri et yaper tem. Et wos et keraket ten sene be temente tetane.