10
God rene kiyi kwar pebem wule et nemri yaper nenbo wos be poten septite.
1 God reri Moses rene newom Wule et wule sekene bo. Nem Moses rene newom Wule labo, nem yuri tete yenbo wos oknelke labokap. Moses rene newom Wule sebo tame rem nabek nabek bulmakau nep som kwar pebo. Op nenbo, er wule re God rene lom yokwobo tatame remri yaper nen wos mapurke aboyei poten septite? Rem tatame yenbo mapurke tete? 2 Berke rem God rene kwar som pebo? God rene lom yokwobo tatame remri yaper nen wos God re poten septin rem tatame yenbo tete wem, rem remri yaper nen wos sene be habote wem. Op temente wem, rem God rene kwar sene be pete wem. 3 Etopkap bo. Nabek nabek rem God rene kwar som pebo, eker rem remri yaper wos som habobo. 4 Metye. Bulmakau nepkene meme nepkene et yaper nen wos mapurke poten septite?
5 Opkap, Krais re nowselke yate nenbem yabel, re God rene op wem.
Tatame rem nene wos
newobo, rem bulmakau pen
nene kwar pebo, ne etop be
selbo.
Eker ne anne more tame
remri wesow newote nenbo.
6 Tatame rem bulmakau o
sipsip pen wiywiy kerke
lisen nene kwar pebo.
Rem agerbo agerbo wos
kwar pebo.
Rem remri yaper nen wos
tupate kirkir kwar pebo.
Rem etop nenbo, et ne
okbop sou be tebo.
7 Sene an rene op wem.
God, an gwor.
An neri wuribaike
habobokapwou nente yawo.
Kiyi rem anne habon
basrasemkap,
an neren webokap etop
nente tetane.
(Buk Song 40:6-8)
8 Re kiyi op wem. God, tatame rem nene kwar pebo, nene wos newobo, ne etop be selbo.
Moses rene newom Wule rem gwopkap nenbo. Rem bulmakau pen kerke lisen remri yaper nen wos tupate kwar pebo. Ne op labo, ne okbop be tebo. 9 Sene re op wem. God, an neri wuribaike habobokap nente yawo. Op wem, re kiyiri kwar pebo wule teitkwunen re God reri yuri wem wule heyar meten nenem. 10 Jisas Krais re God reri wuribai tobom. Tewo wuriketwou re reri wesomke God rene kwar pem. Eker nem God reri tatame yenbo tem.
Krais re God rene kwar pem, re nemri yaper wos kebese poten septim.
11 Kwokwos kwokwos God Reri Akeke yaku nenbo tame rem teten yaku nenbo. Kwar pebo wule rem etopwou tewok tewok nenbo. Op nenbo, rem tatame remri yaper nen wos kebese be poten septibo. 12 Tewo wuriketwou Krais re God rene kwar pen tatame remri yaper nen wos kelmenam. Re somsom aboyei kelmenakeipem. Kelmenakeipem, re God eterri mame yokwok yin sitene. 13 Re etek sin kowtene. God re reri peiktame remne poten reri tewo kulke piti wurte tetane. 14 Krais re God rene tewo wuriket kwar pen re tatame remri yaper nen wos poten septikeipem. Eker, rem tatame yenbo somsom temente.
15 God Reri Wou re nemne kiyi etop kirkir wem.
16 Haneyen re op wem. Sene
an gwopkap tuma Israel
tatame remkene natebote.
Yuri tete yabelke an remne
gwopkap nente.
Ari wule an remri
wuribaike raste.
Ari wule an remri papke
basraste.
17 Re sene op wem.
Remri yaper nen wos,
remri yaper nenbokap an
aboyei serte. An sene
sene be habote. 18 God re tatame remri yaper nen wos sene be habote, eker rem kwar sene be pete.
Nem God rene omuteke habon rene meknik yin tete.
19 Ari gesmase, Jisas re nemri yaper nenbem wos poten septim, nem eterri nepke nem sebera be yabo, eker re sam, nem God Reri Akeri Puri Yenbosubuwai kebese wurte, nem be akte. 20 Jisas re nemne somsom temente wule ager nemne peteram. Reri wesom et God eterri ake purik eistene matekap. Jisas re sam, re er mate tagwerasem, nem God eterri emi yenbowai kebese wurbo. 21 God Reri Akeri yaku nen tame remri keryen yen wuri tetane. Re God reri tatame remne lakerebo. 22 Reri nep re nemri wuribai yaper aboyei nibiram, nem wuribai yenbo sene tem. Ok yenbok re nemne wiyruwem. Eker, nem wuribai yenbo poten God rene omuteke habon rene mekni yin tete. 23 God re nemne wemkap, re etop nente tetane. Eker, nemri kowtene wos, nemri wesowbo wos nem etop omutekewai habote. Nem wuribai pes kap tete. 24 Nem wulare wulare nem God rene omuteke habobo gesmase remne kwobo late. Rem gesmase remne kwobo late, remne yaku yenbowou nente. 25 Kem God rene omuteke habobo tatame kem wuriwouke sin God rene lom yokwobet. Kem kap mesengente. Rane tatame rem etop be nenbo, et yaper. Kem mettene, Haneyen re sene yate Yabel matnaye, eker kem wulare wulare kem yaku murese nenbet, tatame rem God rene omutekewai habote.
Nem God Reri Yen rene kap magel taite.
26 God Reri Tuma sekene metbo tatame rem remri wuribaike yaper wos som nenbet wete, rem God rene kwar sene mapurke pen God re remri yaper nenbo wos mapurke poten septite? 27 Yehow. Er tatame rem aken God eter remne tuma nente tetane yabel kowtene. Er yabel God re reri peiktame remne ker bukrek seitte tetane. 28 Moses rene newom Wule sebo tatame rem gwopkap nenbo. Yike Moses Reri Wule biragiyete, agerbo tame pes o mur rem etop late, rem rene tuma nente. Rem rene pap be mette, rem rene pen sate. 29 God Reri Yen rene magel taibo tame rene kem map habobo? Er tame rene yaper wos nugwapewai tete tetane. Krais reri nepke God reri natebom tuma ager re kitimena potem, er tame re God reri yen tem, re tame yenbowai tem. Sene re God Reri Yen rene magel tayem, re Krais reri nep yaper webo. Re God reri pap meten kwobo labo Wow rene tame kwuyebo. Opkap tame God re rene kenakem pete tetane. 30 God reri webokap nem mettene. Re op webo. Aren, an remne yaper sein nente. Aren, an etop nente tetane. Sene re op webo. Haneyen re reri tatame remne se pen tuma nente tetane. 31 Somsom tetane God re tame remne yaper sein nente wete, er tame re kenakem akte tetane.
Nem God rene omutekewai som habobet.
32 Kiyi kem God Reri Tuma omuteke meten rene omuteke habom. Er yabel kem sene habote. Er yabel tatame rem kemne yaper nenbem, kem mus bukre metbem. Mus metbem, kem mol pan teten taskurbem. 33 Rane yabel rem kemne nugwape tatame etemri bitmik wen teten rem kemne tame kwuyen kemne pebem. Rane yabel rem kemri God rene omuteke habom gesmase remne yaper nenbem, kem remne kwobo labem. 34 God rene omuteke habobem gesmase rem ake yaperke temenem, kem remne pap meten heyar nenbem. God reri peiktame rem kemri wosbas potbem, kem pap yaper be tebem. Kem pap yenbo som ten omuteke op habobem. Yuri God re nemne som temente wos yenbowai newote tetane.
35 God re kemne heyarwai nente tetane, eker kem God rene omuteke habobo wule kap mesegente. 36 God reri wem tuma kem som nenbet. Kem kap pwoite. Kem etop nente, reri tuma kem be mesegente, God re newote wem woskap, kem etop potte tetane. 37 Ekeya. God reri siglow op webo.
Keraket tete, yate webo
tame re yate.
Re sou be kowte.
38 Ari tatame yenbo rem anne
omuteke som habote, rem
heyar somsom temente.
Remri rane rem anne
mesegente, an remne okbop
be tete.
39 God rene mesegenbo tatame rem yaper tete tetane. Nem etopkap bo. Nem God rene omuteke som habobo, eker nem heyar somsom temente tetane.
Nem God rene omuteke habon murese tetete.
(Sapta 11—13)